SİYASƏT


Adil Əliyev: Azərbaycan-Litva münasibətləri strateji tərəfdaşlıq ruhunda inkişaf edir

Bakı, 22 may, AZƏRTAC

Dövlətimizin başçısı İlham Əliyev Litva prezidenti Gitanas Nausedanın mayın 18-də Azərbaycana səfəri zamanı verdiyi Bəyanatında və Azərbaycan-Litva biznes forumundakı çıxışında ikitərəfli münasibətlərlə yanaşı Avropa İttifaqı ilə münasibətlər, Ermənistanla sülh müqaviləsinin imzalanması perspektivləri, enerji təhlükəsizliyi, ticarət məsələləri də daxil olmaqla bir sıra önəmli mövzulara toxundu, ölkəmizin mövqeyini ifadə etdi, fikir və mülahizələrini səsləndirdi.

AZƏRTAC xəbər verir ki, bu sözləri Milli Məclis sədrinin müavini Adil Əliyev deyib.

“Prezident İlham Əliyevin litvalı həmkarı ilə belə ciddi mövzularla bağlı bəyanatları ondan irəli gəlir ki, Litva digər Baltikyanı dövlətlər olan Estoniya və Latviya kimi Avropa İttifaqına aid platformalarda və birliyin işində fəal iştirak edir. Eləcə də, Avropa İttifaqında onların səsləri eşidilir, beynəlxalq məsələlərdə xüsusən də postsovet məkanı, o cümlədən Şərq Tərəfdaşlığı ölkələri ilə münasibətlərdə onların mövqeyi nəzərə alınır. Bu baxımdan Litva Azərbaycanın Avropa İttifaqındakı etibarlı tərəfdaşı və Avropa İttifaqına açılan bir pəncərədir. Hələ 2007-ci ildə Azərbaycanla Litva strateji tərəfdaşlıq haqqında bəyannamə imzalayıblar. 2020-ci ilin fevralında Litvanın milli qanunverici orqanı – Litva Seymi Azərbaycanın ərazi bütövlüyünü dəstəkləyən sənəd qəbul edib. Bu faktın özü də iki ölkə arasında münasibətlərin və əməkdaşlığın strateji tərəfdaşlıq ruhunda inkişaf etdiyini göstərir”, - deyə Adil Əliyev qeyd edib.

O bildirib ki, litvalı həmkarı ilə görüşdə Prezident İlham Əliyev Ermənistanla sülh müqaviləsinin bağlanması mövzusunda fikirlərini bildirdi. Prezident İlham Əliyev qeyd etdi ki, İkinci Qarabağ müharibəsi bitən kimi Azərbaycan Ermənistanla sülh müqaviləsinin bağlanmasını, eləcə də sərhədlərin delimitasiyası ilə bağlı birgə komissiyanın yaradılmasını açıq şəkildə dəstəkləmişdir və hazırda da dəstəkləməkdədir. Müvafiq olaraq, Azərbaycan sülh sazişinin hazırlanması üçün beş prinsipdən ibarət təklif irəli sürmüşdür və həmin prinsiplər BMT Nizamnaməsi, Helsinki Yekun Aktı və beynəlxalq hüquq normalarına uyğundur. Ermənistanın həmin beş prinsipi qəbul etməsi müsbət haldır və müəyyən nikbinlik yaradır. Amma digər tərəfdən Ermənistanın həmin mövqeyinə sadiq qalması və müvafiq mövqeyi praktik müstəviyə keçirib- keçirməyəcəyi tam aydın deyil. Sərhədlərin delimitasiyası ilə bağlı hər iki ölkənin işçi qruplarının yaradılması və aprelin sonuna qədər ilk görüşün keçirilməsi barədə razılıq əldə edilmişdi. Yeri gəlmişkən, bu razılıq Avropa Şurası Prezidenti Şarl Mişelin təşəbbüsü ilə Azərbaycan və Ermənistan rəhbərlərinin 6 apreldə Brüsseldə keçirilmiş görüşündə əldə edilmişdi. Lakin Ermənistan razılaşdırılmış görüşü ləğv etdi və bu günə qədər görüşün keçirilməsindən yayınmaqdadır. Prezident İlham Əliyev tərəfindən litvalı həmkarının bu mövzuda ətraflı məlumatlandırılması həm də ona görə vacibdir ki, Gitanas Nauseda Bakıdan sonra İrəvana səfər edəcək və Ermənistan baş naziri Nikol Paşinyanla görüşəcək.

Azərbaycan və Litva prezidentləri ikitərəfli gündəmə xüsusi önəm verdilər. Təsadüfi deyildir ki, hər iki ölkənin nümayəndə heyətlərinin iştirakı ilə Azərbaycan-Litva biznes forumu keçirildi. Burada da əsas məqsəd iki ölkə arasında ticarət, biznes və iqtisadi əlaqələrin inkişaf etdirilməsi, bu sahədə olan potensialın daha effektiv surətdə reallaşdırılmasıdır. Bu mövzudan bəhs edərkən Litva prezidenti bildirdi ki, iki ölkə arasında ticarət dövriyyəsi artıb və bu artım Azərbaycandan Litvaya edilən ixracın həcminin artması hesabınadır. Litva prezidentinin bu qeydi Azərbaycanda aparılmış iqtisadi islahatların müsbət nəticələrindən, qeyri-neft sektorunun inkişafından xəbər verir və bizi sevindirməyə bilməz.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.