SİYASƏT
Milli Məclisdə 2020-ci ilin dövlət büdcəsi ilə bağlı müzakirələr davam edir YENİLƏNİB
Bakı, 13 noyabr, AZƏRTAC
Noyabrın 13-də Milli Məclisin plenar iclasında Azərbaycan Respublikasının 2020-ci il üçün dövlət büdcəsi zərfinə daxil olan sənədlərin müzakirəsi davam etdirilib. Milli Məclisin Sədri Oqtay Əsədov iclası açdıqdan sonra deputatlar qanun layihəsi ətrafında müzakirələrə başlayıblar.
AZƏRTAC xəbər verir ki, Milli Məclisin deputatları Eldar Quliyev, Elçin Quliyev, Tahir Kərimli, Hüseynbala Mirələmov, Mahir Abbaszadə, Rafael Hüseynov, Şahin İsmayılov, Hikmət Məmmədov, Rauf Əliyev çıxış edərək 2020-ci il dövlət büdcəsini mükəmməl şəkildə hazırlanmış, sosialyönümlü büdcə kimi dəyərləndiriblər. Qeyd olunub ki, ölkəmizdə dövlət büdcəsi ildən-ilə təkmilləşir. Büdcə layihəsinin əsaslandırılması səviyyəsi tamamilə qənaətbəxşdir. Son illər ərzində Azərbaycanda dinamik inkişaf var, ölkədə qərarlaşmış, səriştəli büdcə institutu artıq formalaşıb. Azərbaycan sürətlə inkişaf edir. Əhalinin sosial müdafiəsini xarakterizə edən göstəricilər, ümumi daxili məhsulun həcmi, büdcə gəlirləri parametrləri onu göstərir ki, əsası ümummilli lider Heydər Əliyev tərəfindən qoyulan və bu gün uğurla davam etdirilən bu siyasət Azərbaycanı daha parlaq gələcəyə doğru aparır.
Milli Məclis Sədrinin müavini Valeh Ələsgərov iclasda çıxış edərək Azərbaycanın təşəbbüskarı və iştirakçısı olduğu qlobal infrastruktur layihələrindən söz açıb, büdcədən belə layihələrə ayrılan vəsaitin yetərli olduğunu vurğulayıb. O, ölkəmizdə neft-qaz ixracından əldə edilən daxilolmaların yüksək səviyyədə olduğunu, bu gün bu göstəricilərin dünyanın mədən sənayesi gəlirləri arasında ən yüksək səviyyədə durduğunu bildirib. Valeh Ələsgərov dövlət büdcəsinə xarici neft-qaz şirkətləri tərəfindən daxil olan vergilərin miqyasını açıqlayıb.
Vitse-spiker çıxışında tələbə yataqxanalarının tikilməsi ilə bağlı təklifini də bildirib. O, dünyanın bir çox ölkələrində “Tik-idarə et-təhvil ver!” (TİT) modelindən səmərəli istifadə olunduğunu, bu modeldən istifadə edərək tez bir vaxtda tələbə kampuslarının tikilməsinin məqsədəuyğun hesab edildiyini deyib.
Valeh Ələsgərovun çıxışından sonra “Azərbaycan Respublikasının 2020-ci ilin dövlət büdcəsi haqqında” qanun layihəsi səsə qoyularaq birinci oxunuşda qəbul edilib.
Sonra Milli Məclisin Əmək və sosial siyasət komitəsinin sədri Hadi Rəcəbli “Sosial təminatı və müdafiəni həyata keçirən müvafiq icra hakimiyyəti orqanının 2020-ci il büdcəsi haqqında” qanun layihəsini birinci oxunuşda təqdim edib. Komitə sədri bildirib ki, 2019-cu ilin ötən dövrü Azərbaycan dövlətçiliyi tarixində çox ciddi məqamlarla yadda qalıb. 2019-cu il ölkəmizdə sosial müdafiənin gücləndirilməsi ili kimi xatırlanacaq. Belə ki, Azərbaycan əhalisinin 4,2 milyon nəfəri təxminən 3 milyard manat civarında sosial müdafiə ilə əhatə olunub, vətəndaşlarımızın böyük bir qrupuna ödənişlər 2 dəfəyə qədər yüksəlib. Azərbaycanın müstəqilliyi tarixində ilk dəfə olaraq gələnilki büdcəmiz təxminən 27 milyard manat təşkil edəcək. Bu maliyyə toplumunun böyük bir hissəsi - təxminən 40 faizi bilavasitə sosial məqsədlərə yönələcək. Ünvanlı dövlət sosial yardımları üçün 2019-cu ilə nəzərdə tutulmuş vəsaitlərin həcmi gələn il 30 faiz artırılacaq və əlavə 13 min ailənin müavinət almaq imkanları artacaq. Belə ailələrin sayı 90 mini ötəcək. Hadi Rəcəbli vurğulayıb ki, gələn il üçün bu büdcədə nəzərdə tutulan vəsait əvvəlki illə müqayisədə 697,41 milyon manat və ya 17 faiz çoxdur. Bu büdcənin artan böyük məbləği məhz DSMF-nin öz imkanları hesabına toplanacaq. Daha bir sevindirici hal Prezidentimizin apardığı struktur islahatları nəticəsində qeyri-leqal məşğulluğun 160 min nəfərinin sığortaya cəlb olunmasıdır. Bu büdcənin artımında özünü göstərib. Rəqəmlər bir daha onu deməyə imkan verir ki, gələn il pensiyaların və əməkhaqlarının artım tempi davamlı surətdə çoxalacaq.
Sonra iclasda Əmək və Əhalinin Sosial Müdafiəsi naziri Sahil Babayev çıxış edərək “İşsizlikdən sığorta fondunun 2020-ci il büdcəsi haqqında” qanun layihəsi barədə birinci oxunuşda məlumat verib. Qeyd olunub ki, Əmək və Əhalinin Sosial Müdafiəsi Nazirliyi yanında İşsizlikdən sığorta fondunun 2020-ci il büdcəsinin gəlirləri və xərcləri 128 235 400 manat məbləğində proqnozlaşdırılıb. Gələn il fondun gəlirləri işsizlikdən sığorta üzrə sığorta haqları 111 869 600 manat, büdcədən maliyyələşən təşkilatlar üzrə 17 834 800 manat, qeyri-büdcə sektoru üzrə 76 200 000 manat və sair gəlirlərdən daxilolmalar hesabına təmin ediləcək. Nazir çıxışında fondun xərclərinin istiqamətləri barədə ətraflı danışıb. 2020-ci ildə fond tərəfindən işsizliyə görə sığorta ödənişləri, peşə hazırlığı və əlavə təhsilin təşkili, peşə yönümünə dair məsləhət xidmətlərinin göstərilməsi, əmək yarmarkaları və əmək birjalarının təşkili, haqqıödənilən ictimai işlərin təşkili, özünüməşğulluq tədbirlərinin təşkili, peşə standartlarının hazırlanması üzrə xərclərin miqyası açıqlanıb.
Fasilədən sonra Milli Məclisin iclası öz işini davam etdirib.
Deputatlar Qüdrət Həsənquliyev, Fazil Mustafa, Fəzail Ağamalı, Jalə Əliyeva, Əli Məsimli, Qənirə Paşayeva, Elmira Axundova, Musa Quliyev, Sədaqət Vəliyeva, Cavid Osmanov çıxış edərək bölgələrdə aztəminatlı və xüsusi imtiyazlı ailələr üçün tikilən mənzillərin kommunal infrastruktur problemləri, sosial evlərin tikintisi, rayonlarda yaşayan sahibkarlara güzəştli kreditlərin verilməsi, pensiyaların artırılması, əlil və müharibə veteranlarının sosial müdafiəsinin daha da gücləndirilməsi, hərbi qulluqçuların sosial müdafiəsi məsələlərinə diqqətin artırılmasının vacibliyini bildiriblər.
Əmək və Əhalinin Sosial Müdafiəsi naziri Sahil Babayev deputatları maraqlandıran bəzi məsələlərə aydınlıq gətirib.
Sonra hər iki məsələ ayrı-ayrılıqda səsə qoyularaq birinci oxunuşda qəbul edilib.
İqtisadi siyasət, sənaye və sahibkarlıq komitəsinin sədri Ziyad Səmədzadə iclasda “Azərbaycan Respublikasında 2020-ci il üçün yaşayış minimumu haqqında” qanun layihəsini birinci oxunuşda təqdim edib. Bildirilib ki, gələn il üçün yaşayış minimumu ölkə üzrə 190 manat, əmək qabiliyyətli əhali üçün 201 manat, pensiyaçılar üçün 151 manat, uşaqlar üçün 170 manat nəzərdə tutulur. Qanun layihəsi səsə qoyularaq qəbul edilib.
Əmək və sosial siyasət komitəsinin sədri Hadi Rəcəbli “2020-ci il üçün ehtiyac meyarının həddi haqqında” sənədi birinci oxunuşda şərh edərək bildirib ki, gələn il üçün ehtiyac meyarı 160 manat nəzərdə tutulur. Qanun səsvermə yolu ilə təsdiqlənib.
Sonra iclasda “Əmək pensiyaları haqqında” və “Məşğulluq haqqında” qanunlarda dəyişiklik edilməsi barədə sənədlər müzakirə edilərək birinci oxunuşda təsdiq edilib.
Hadi Rəcəbli “Sosial müavinətlər haqqında” Qanunda dəyişiklik edilməsi barədə qanun layihəsini birinci oxunuşda şərh edərək bildirib ki, əvvəllər sağlamlıq imkanları məhdud və valideynlərini itirən uşaqlar onlar üçün nəzərdə tutulan müavinətlərdən yalnız birini almaq hüququna malik idilər. Amma növbəti ildən bu müavinətlərin ayrı-ayrılıqda hər ikisini ala biləcəklər. Bu qanun layihəsi də razılıqla qarşılanıb.
Milli Məclisdə büdcə müzakirələri noyabrın 14-də davam etdiriləcək.