Bakı, 12 iyun (AZƏRTAC). İyunun 12-də Milli Məclisin növbədənkənar sessiyasının ilk iclası keçirilmişdir.

Azərbaycan Respublikasının dövlət himni səsləndirilmişdir.

Milli Məclisin sədri Oqtay Əsədov sessiyanı açıq elan edərək bildirmişdir ki, 2011-ci ilin noyabr ayında parlamentin qəbul etdiyi “Azərbaycan Respublikasının keçmiş Prezidentinin və onun ailə üzvlərinin təminatı haqqında” Konstitusiya qanunu prosedura uyğun olaraq 6 aydan sonra yenidən təkrar səsverməyə çıxarılmışdır.

Qanun layihəsi barədə məlumat verən Milli Məclisin hüquq siyasəti və dövlət quruculuğu komitəsinin sədri Əli Hüseynli demişdir ki, referendum yolu ilə Konstitusiyaya etdiyimiz əlavə və dəyişikliklərdən biri də eks-prezidentlərlə bağlı qanun layihəsinin qəbul edilməsi məsələsi idi. Bununla bağlı parlamentdə fəaliyyət göstərən işçi qrupu dünya təcrübəsini öyrənmiş və Konstitusiya qanununun layihəsini hazırlamışdır. Bu qanunun qəbulu ölkəmizdə keçirilən demokratik islahatların tərkib hissəsidir.

Sonra səsvermə keçirilmiş və Konstitusiya qanunu 109 səs lehinə olmaqla qəbul edilmişdir.

İclasda “Ölkədən getmək, ölkəyə gəlmək və pasportlar haqqında” qanuna təklif olunan dəyişikliklər müzakirəyə çıxarılmışdır. Bildirilmişdir ki, bu dəyişikliklər gələcəkdə pasport alınmasında problemlərin aradan qaldırılmasına imkan verəcəkdir.

Deputatların rəy və təklifləri dinlənildikdən sonra dəyişikliklər səsə qoyularaq qəbul edilmişdir.

Daha sonra iclasda “Ərazi quruluşu və inzibati ərazi bölgüsü haqqında” qanuna dəyişikliklər edilməsi barədə” qanun layihəsinə baxılmışdır.

Parlamentin regional məsələlər komitəsinin sədri Arif Rəhimzadə bildirdi ki, dəyişikliklərdə inzibati ərazi bölgüsü olmayan rayonlarda sahə inzibati ərazi dairələrinin yaradılması nəzərdə tutulmuşdur. Layihədə deyilir ki, rayon bölgüsü olmayan şəhər inzibati ərazi vahidinin inzibati mərkəzi olan ərazi vahidinin ərazisində və şəhər rayonu inzibati ərazi vahidinin ərazisinin inzibati ərazi dairəsi ilə əhatə olunmayan hissəsində dövlət hakimiyyəti orqanlarının əhaliyə yaxınlaşması və idarəetmənin səmərəliliyinin artırılması məqsədi ilə sahə inzibati ərazi dairələri yaradılacaqdır. Sahə inzibati ərazi dairələri əhalisi 20 min nəfərə qədər olan ərazilərdə yaradılacaqdır.

Müzakirələr zamanı çıxış edən deputatlar bildirmişlər ki, bu qurumlar ölkədə yeni iş yerlərinin açılmasına, gənc kadrların işlə təmin olunmasına və əhalinin icra strukturlarına daha da yaxınlaşmasına yardımçı olacaqdır. Eyni zamanda, bu, çox mühüm idarəetmə islahatıdır.

Məsələyə münasibət bildirən Milli Məclis sədrinin müavini Bahar Muradova demişdir ki, bu dəyişiklik icra hakimiyyəti institutunun təkmilləşməsində yaranan ehtiyacdan irəli gəlir. Bu təkliflər müasir tələblərə cavab verir və onun yerinə yetirilməsi üçün Azərbaycanın dövlət büdcəsində kifayət qədər vəsait vardır.

Milli Məclis sədrinin birinci müavini Ziyafət Əsgərov diqqətə çatdırmışdır ki, yeni yaradılacaq qurumlar icra strukturlarının xalqa daha da yaxınlaşdırılmasını təmin edəcəkdir. Məqsəd yalnız ondan ibarətdir ki, Azərbaycanda bütün kateqoriyalardan ibarət insanların hüquq və azadlıqlarının təminatı, o cümlədən siyasi təminatı həllini tapsın.

Müzakirələrdən sonra dəyişikliklər səsə qoyularaq qəbul edilmişdir.

İclasda, eyni zamanda, “İstehsalat və məişət tullantıları haqqında” qanuna və İnzibati Xətalar Məcəlləsinə dəyişikliklər edilməsi haqqında məsələlər də müzakirə olunmuşdur. Birinci sənədlə bağlı Milli Məclis sədrinin müavini, təbii ehtiyatlar, energetika və ekologiya komitəsinin sədri Valeh Ələsgərov, digər layihə ilə bağlı isə Əli Hüseynli məlumat vermişlər. Bildirilmişdir ki, İnzibati Xətalar Məcəlləsinə edilən dəyişikliklərə görə, məişət tullantılarının tutumlardan (urnalardan) kənar yerlərə atılması, həmin yerlərdə saxlanılmasına görə fiziki şəxslər 20 manat, vəzifəli şəxslər 100 manat, hüquqi şəxslər isə 500 manat məbləğində cərimə olunacaqlar. Şəhərlərdə və rayon (şəhər rayonları istisna olmaqla) inzibati ərazi vahidlərinin inzibati mərkəzlərində tutumların (urnaların) yerləşdirilməsi zamanı qanunvericiliklə müəyyən edilmiş məsafənin nəzərə alınmamasına görə vəzifəli şəxslər 500 manat, hüquqi şəxslər isə 1000 manat cərimə olunacaqlar.

Dəyişikliklərə əsasən, həmçinin piyadalar tərəfindən yolun hərəkət hissəsinin və ya dəmir yolu keçidinin müəyyən olunmayan yerdən keçilməsinə görə cərimə tətbiq ediləcəkdir. Bu cür qanun pozuntusuna görə 20 manat cərimə tətbiq olunacaqdır (hazırda bu məbləğ 10 manatdır).

Axşam iclasında deputatlar Vergi Məcəlləsinə, “Kommersiya sirri haqqında”, “Hüquqi şəxslərin dövlət qeydiyyatı və dövlət reyestri haqqında” qanunlara təklif olunan dəyişiklikləri də təsdiq etmişlər.

“İnformasiya əldə etmək haqqında” Qanuna təklif olunan dəyişikliyi təqdim edən hüquq siyasəti və dövlət quruculuğu komitəsinin sədri Əli Hüseynli məlumat vermişdir. Qanuna təklif olunan əlavədə deyilir: “İnformasiyanın əldə olunmasına o şərtlə icazə verilir ki, bu, Azərbaycan Respublikasının siyasi, iqtisadi və hərbi sahələrdə milli maraqlarının, maliyyə-kredit və valyuta siyasəti sahələrində mənafelərinin qorunması, ictimai qaydanın, sağlamlığın və mənəviyyatın qorunması, digər şəxslərin hüquq və azadlıqlarının, kommersiya və digər iqtisadi maraqlarının qorunması, məhkəmənin nüfuzunun və qərəzsizliyinin təmin edilməsi məqsədlərinə zidd olmasın”. Əli Hüseynli demişdir ki, belə bir müddəa ölkəmizdə qəbul olunmuş “Azərbaycan Respublikasında İnsan hüquq və azadlıqlarının həyata keçirilməsinin tənzimlənməsi haqqında” Konstitusiya Qanununda öz əksini tapmışdır. “İnformasiya əldə etmək haqqında” Qanuna təklif olunan əlavə isə onun daha da təkmilləşdirilmiş formasıdır. Bildirildi ki, Ukraynada, Rusiyada, Türkiyədə və bir sıra digər dövlətlərin qanunvericiliklərində informasiya əldə etmək hüququnun sərhədləri dəqiq müəyyənləşdirilmişdir.

Müzakirələrdən sonra dəyişiklik səsə qoyularaq təsdiq edilmişdir.

Sonra iclasda Şəhərsalma və Tikinti Məcəlləsinin layihəsi ikinci oxunuşda müzakirəyə çıxarılmışdır. Qeyd olunmuşdur ki, bu məcəllə şəhərsalma və tikinti fəaliyyətinin hüquqi əsaslarını, prinsiplərini, eləcə də dövlətin, fiziki və ya hüquqi şəxslərin şəhərsalma və tikinti fəaliyyəti sahəsində hüquq və vəzifələrini müəyyən edəcəkdir. Deputatlar sənədin əhəmiyyətini yüksək dəyərləndirdilər, məcəllənin çox əhatəli hazırlandığını, üçüncü oxunuşa qədər bugünkü təkliflərin də nəzərə alınmasının vacibliyini qeyd etmişlər.

Müzakirələrin sonunda məcəllə ikinci oxunuşda qəbul edilmişdir.

Bununla da Milli Məclisin növbədənkənar sessiyasının ilk iclası başa çatmışdır.