SİYASƏT
Milli Məclisin növbəti plenar iclası keçirilib
Bakı, 12 oktyabr, AZƏRTAC
Oktyabrın 12-də Milli Məclisin növbəti plenar iclası keçirilib.
AZƏRTAC xəbər verir ki, oktyabrın 12-si və 16-da keçiriləcək iclasların gündəliyinə 54 məsələ daxil edilib.
Əvvəlcə cari məsələlər müzakirə olunub.
Sonra hüquq siyasəti və dövlət quruculuğu komitəsinin sədri Əli Hüseynli “Normativ hüquqi aktlar haqqında” Konstitusiya Qanununda dəyişiklik edilməsi barədə sənədi ikinci oxunuşda təqdim edib. Bildirilib ki, normativ hüquqi aktların hazırlanmasında səmərəliliyin artırılması və çevikliyin təmin edilməsi məqsədi ilə qanunun 29 maddəsində kiçik dəyişiklik edilib.
Sənəd səsə qoyularaq ikinci oxunuş üçün qəbul edilib.
İqtisadi siyasət, sənaye və sahibkarlıq komitəsinin sədri Ziyad Səmədzadə “Kiçik sahibkarlığa dövlət köməyi haqqında”, “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” və “Rəsmi statistika haqqında” qanunlarda dəyişikliklər edilməsi barədə sənədlərlə əlaqədar məlumat verərək qeyd edib ki, bu qanun layihələrinin hər üçü “Sahibkarlıq fəaliyyəti haqqında” Qanunda dəyişiklik edilməsi barədə 2017-ci il 29 dekabr tarixli qanunun tətbiqi ilə əlaqədar hazırlanıb. Komitə sədri müvafiq dəyişiklikləri diqqətə çatdırdıqdan sonra sənədlər ayrı-ayrılıqda səsə qoyularaq təsdiq olunub.
Sonra Əli Hüseynli Cəzaların İcrası Məcəlləsində dəyişiklik edilməsi haqqında qanun layihəsini şərh edib. Diqqətə çatdırıb ki, “Cinayət Məcəlləsində dəyişikliklər edilməsi barədə 7 mart 2012-ci il tarixli Qanunla Məcəlləyə “xüsusi müsadirə” adlanan 15-1-ci və “hüquqi şəxslər barəsində tətbiq olunan cinayət-hüquqi tədbirlər” adlanan 15-2-ci fəsillər əlavə edilib, eyni zamanda, cəza növlərinin siyahısından əmlak müsadirəsi cəzası çıxarılıb. Cəzaların İcrası Məcəlləsində dəyişikliklər edilməsi barədə qanun layihəsi adıçəkilən qanuna uyğun olaraq, xüsusi müsadirə və hüquqi şəxslər barəsində tətbiq olunan cinayət-hüquqi tədbirlərin icrası mexanizmini müəyyən edir.
Cinayət Məcəlləsində dəyişiklik edilməsi haqqında qanun layihəsini şərh edən Əli Hüseynli bildirib ki, sənəd dənizdə yerləşən stasionar platformaların təhlükəsizliyinə, aviasiya təhlükəsizliyinə təhdid yaradan əməllərə, habelə radioaktiv materialları talamaqla, bu materiallardan istifadə edərək ölüm hallarına və sağlamlığa ağır zərər vurmağa, əmlaka zərər vurmaqla hədələməyə görə cinayət məsuliyyətini müəyyən etmək məqsədi ilə hazırlanıb.
Əli Hüseynli “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Qanunda dəyişiklik edilməsi barədə sənədi təqdim edərkən bildirib ki, təklif olunan dəyişikliklər bu sahədə monitorinq, qiymətləndirmə, nəzarət mexanizmlərini təkmilləşdirmək və məsuliyyət tədbirlərini gücləndirmək məqsədi daşıyır.
Hər üç qanun layihəsi ayrı-ayrılıqda səsə qoyularaq təsdiqlənib.
İclasda Milli Məclis sədrinin müavini, təbii ehtiyatlar, energetika və ekologiya komitəsinin sədri Valeh Ələsgərov “Xəzər dənizinin Azərbaycan sektorunda D230 perspektiv kəşfiyyat blokunun kəşfiyyatı, işlənməsi və hasilatın pay bölgüsü haqqında” Azərbaycan Respublikasının Dövlət Neft Şirkəti ilə BP EKSPLOREYŞN (AZƏRBAYCAN) LİMİTED şirkəti və SOCAR-ın Ortaq Neft Şirkəti arasında Sazişin qəbul və təsdiq edilməsi, həyata keçirilməsinə icazə verilməsi barədə” qanun layihəsi haqqında məlumat verib. Sənədi ətraflı şərh edən Valeh Ələsgərov bildirib ki, Saziş Azərbaycan Dövlət Neft Şirkəti ilə BP Eksploreyşn (Azərbaycan) Limited şirkəti arasında bu il aprelin 26-da imzalanıb. Kontrakt sahəsi Xəzər dənizi ərazisində 3197 kvadratkilometri əhatə edir. Bu ərazidə indiyə qədər kəşfiyyat işləri aparılmayıb.
Sənəd səsə qoyularaq təsdiq olunub.
İclasda “Azərbaycan Respublikası ilə Serbiya Respublikası arasında strateji tərəfdaşlıq üzrə Birgə Fəaliyyət Planının təsdiq edilməsi haqqında”, “Azərbaycan Respublikası Hökuməti ilə Serbiya Respublikası Hökuməti arasında hava əlaqəsi haqqında”, “Azərbaycan Respublikası Hökuməti ilə Serbiya Respublikası Hökuməti arasında beynəlxalq avtomobil daşımaları haqqında”, “Azərbaycan Respublikası Hökuməti ilə Serbiya Respublikası Hökuməti arasında bitki karantini və mühafizə sahəsində əməkdaşlıq haqqında” sazişlərin təsdiq edilməsi barədə, Beynəlxalq Mülki Aviasiya haqqında Konvensiyaya dəyişikliklərə dair protokolların təsdiq edilməsi barədə qanun layihələri müzakirə olunub. Bu sənədlər barədə ətraflı məlumatlar dinlənilib və hər bir qanun layihəsi ayrı-ayrılıqda səsə qoyularaq təsdiqlənib.
Milli Məclis sədrinin birinci müavini, müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov “Hərbi vəzifə və hərbi xidmət haqqında” Qanunda dəyişiklik edilməsi barədə sənədi təqdim edib. Qanunda edilən dəyişikliklərin mahiyyəti barədə danışan Ziyafət Əsgərov bildirib ki, sənədin preambula hissəsində “Azərbaycan Respublikasının qanunvericiliyinə uyğun olaraq yaradılmış başqa silahlı birləşmələrə” sözləri “hərbi xidmət nəzərdə tutulmuş digər dövlət orqanlarına (dövlət orqanlarının strukturuna daxil olan qurumlara)” sözləri ilə əvəz edilir. Buna uyğun olaraq, Qanunun əsas anlayışlar maddəsində “hərbi xidmət”in mənası düzəlişdən sonra “dövlət qulluğunun xüsusi növü olmaqla Azərbaycan Respublikasının Silahlı Qüvvələrində və siyahısı müvafiq icra hakimiyyəti orqanı tərəfindən təsdiq edilmiş digər dövlət orqanlarında (dövlət orqanlarının strukturuna daxil olan qurumlarda) qanunvericiliklə nəzərdə tutulmuş qaydada və müddətlərdə Azərbaycan Respublikası vətəndaşlarının, əcnəbilərin və vətəndaşlığı olmayan şəxslərin həyata keçirdikləri xidməti fəaliyyət” kimi göstərilir. Qanunun bir sıra digər müddəalarında “Azərbaycan Respublikasının qanunvericiliyinə uyğun olaraq yaradılmış başqa silahlı birləşmələr” ifadəsinin çıxarılması nəzərdə tutulub.
Bildirilib ki, cari il sentyabrın 1-dən tətbiqinə başlanılan yeni nəsil şəxsiyyət vəsiqələrinin 15 yaşdan verilməsi nəzərə alınaraq, baş verə biləcək uyğunsuzluqların qarşısının alınması məqsədi ilə qanunun müvafiq maddəsində vətəndaşların ilkin hərbi qeydiyyatının da 15 yaşdan aparılması təklif olunur. Ali təhsil müəssisələrində hərbi kafedraların artıq mövcud olmadığı nəzərə alınaraq, qanunun ali təhsil müəssisələri tələbələrinin zabitlər hazırlanan xüsusi proqram üzrə hərbi hazırlığı ilə bağlı 11-ci maddəsi ləğv edilir.
Bu sənəd də müzakirələrdən sonra qəbul olunub.
Sonra Əli Hüseynli Cəzaların İcrası Məcəlləsində edilən dəyişiklikləri diqqətə çatdırıb. Qeyd edib ki, dəyişikliklər “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin gücləndirilməsi barədə Azərbaycan Prezidentinin 2017-ci il 10 fevral tarixli Sərəncamının icrası ilə əlaqədar təklif edilir. Mövcud dəyişikliklər “Cinayət-Prosessual Məcəllədə dəyişikliklər edilməsi barədə” 2017-ci il 1 dekabr tarixli Qanuna uyğunlaşdırma məqsədi ilə hazırlanıb. Ömürlük azadlıqdan məhrumetmə növündə cəzanın yüngül cəza ilə əvəz etmə və ya şərti olaraq vaxtından əvvəl azadetmə barədə müraciət rədd edildikdə, təkrar ərizəyə bir il sonra baxıla bilər.
Əli Hüseynli “Həbs yerlərində saxlanılan şəxslərin hüquq və azadlıqlarının təmin edilməsi haqqında” Qanunda nəzərdə tutulan dəyişikliklərin də “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin gücləndirilməsi barədə Azərbaycan Prezidentinin 2017-ci il 10 fevral tarixli Sərəncamının icrası ilə əlaqədar təklif edildiyini deyib.
Sonra deputatlar hər iki qanun layihəsinə münasibət bildirərək təsdiqləyiblər.
“Vəkillər və vəkillik fəaliyyəti haqqında” Qanunda dəyişiklik edilməsi barədə sənədi birinci oxunuşa təqdim edən komitə sədri Əli Hüseynli bu qanun layihəsinin də “Cinayət-Prosessual Məcəllədə dəyişikliklər edilməsi barədə” 2017-ci il 1 dekabr tarixli qanuna uyğunlaşdırma məqsədi ilə hazırlandığını bildirib. Qeyd olunub ki, zərərçəkmiş şəxs öldükdə və onun hüquqi varisi olmadıqda vəkil tərəfindən göstərilən hüquqi yardım məhkumun üzərinə qoyulduğu hallar istisna olmaqla dövlət büdcəsi vəsaiti hesabına təmin edilir.
Sənəd birinci oxunuşda səsə qoyularaq qəbul olunub.
Milli Məclis sədrinin birinci müavini, müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov “Hərbi vəzifə və hərbi xidmət haqqında” Qanunda dəyişiklik edilməsi barədə sənədi və Azərbaycan Respublikasının 1997-ci il 3 oktyabr tarixli 377-IQ nömrəli Qanunu ilə təsdiq edilmiş “Hərbi xidmətkeçmə haqqında Əsasnamə”də dəyişiklik edilməsi barədə qanun layihəsini birinci oxunuşda təqdim edib. Hər iki qanun layihəsinin “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual
məcburiyyət tədbirlərinin tətbiqinin gücləndirilməsi barədə Azərbaycan Prezidentinin 2017-ci il 10 fevral tarixli Sərəncamının icrası ilə əlaqədar təklif edildiyini söyləyib. Mövcud dəyişikliklərin “Cinayət-Prosessual Məcəllədə dəyişikliklər edilməsi barədə” 2017-ci il 1 dekabr tarixli Qanuna uyğunlaşdırma məqsədi ilə hazırlandığı vurğulanıb.
Hər iki sənəd ayrı-ayrılıqda səsə qoyularaq təsdiq edilib.
Əli Hüseynli növbəti üç məsələni - Azərbaycan Respublikasının 1997-ci il 30 dekabr tarixli 421-IQ nömrəli Qanunu ilə təsdiq edilmiş “Azərbaycan Respublikasında daimi yaşayan vətəndaşlığı olmayan şəxslərin xüsusi sənədləri haqqında Əsasnamə”də dəyişiklik edilməsi barədə, “Azərbaycan Respublikası vətəndaşının şəxsiyyət vəsiqəsi haqqında”, “15 yaşı tamam olmamış Azərbaycan Respublikası vətəndaşının fərdi identifikasiya kartı haqqında” qanunlarda dəyişiklik edilməsi barədə sənədləri birlikdə şərh edib. Diqqətə çatdırılıb ki, hər üç sənəddəki dəyişikliklər “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin gücləndirilməsi barədə Azərbaycan Prezidentinin 2017-ci il 10 fevral tarixli Sərəncamının icrası ilə əlaqədar təklif edilir. Dəyişikliklər “Cinayət-Prosessual Məcəllədə dəyişikliklər edilməsi barədə” 2017-ci il 1 dekabr tarixli qanuna uyğunlaşdırma məqsədi ilə hazırlanıb.
Hər üç sənəd də ayrı-ayrılıqda səsə qoyularaq təsdiqlənib.
Sonra Aqrar siyasət komitəsinin sədri Eldar İbrahimov “Torpaq bazarı haqqında” və “Məcburi köçkünlərin və onlara bərabər tutulan şəxslərin sosial müdafiəsi haqqında” qanunlarda dəyişikliklər edilməsi barədə qanun layihəsini təqdim edib. Qeyd olunub ki, sənəd “Topraq icarəsi haqqında” Qanunda dəyişikliklər edilməsi barədə 2018-ci il 31 may tarixli Qanuna uyğunlaşdırma məqsədi ilə hazırlanıb. Dövlət mülkiyyətində olan kənd təsərrüfatı təyinatlı torpaq sahələrinin icarəyə verilməsinin yeni qayda və şərtlərini müəyyən edir.
Sənəd səsə qoyularaq qəbul olunub.
İclasda “Dövlət rüsumu haqqında”, “Baytarlıq haqqında”, “Fitosanitar nəzarəti haqqında” və “Yeyinti məhsulları haqqında” qanunlarda dəyişikliklər edilməsi barədə sənədlərə də baxılıb.
Birinci oxunuş üçün təqdim edilən bu sənədlərdə edilən dəyişikliklər Qida Təhlükəsizliyi Agentliyi işçilərinin sosial müdafiəsini gücləndirmək, maddi təminatını yaxşılaşdırmaq məqsədi ilə hazırlanıb. Bu sənədlərdə edilən dəyişikliklər də Milli Məclisin deputatları tərəfindən razılıqla qarşılanıb. Sənədlər ayrı-ayrılıqda səsə qoyularaq ilk oxunuşda qəbul edilib.
Sonra komitə sədri Əli Hüseynli “Diplomatik xidmətə verilən töhfəyə görə” medalının və “Azərbaycan Respublikası dövlət təhlükəsizliyi və xarici kəşfiyyat orqanlarının 100 illiyi (1919-2019)” yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Qanunda dəyişikliklər edilməsi barədə sənədləri ikinci oxunuşa təqdim edib. Hər iki sənəd ikinci oxunuş üçün təsdiq olunub.
“Təhsil haqqında” Qanunda dəyişikliklər edilməsi barədə sənədi ikinci oxunuşa təqdim edən elm və təhsil komitəsinin sədri İsa Həbibbəyli bildirib ki, nəzərdə tutulan dəyişikliklər Azərbaycan Prezidentinin “İslam Əməkdaşlıq Təşkilatına üzv dövlətlərin vətəndaşlarına Azərbaycanda ali təhsil almaq üçün qrantların verilməsi haqqında” 2017-ci il 6 dekabr tarixli və “Qoşulmama Hərəkatına üzv dövlətlərin vətəndaşlarına Azərbaycanda ali təhsil almaq üçün qrantların verilməsi haqqında” 2018-ci il 10 yanvar tarixli Sərəncamlarının icrası məqsədi ilə hazırlanıb.
Bu Qanuna təklif olunan dəyişikliklər də səsə qoyularaq təsdiqlənib.
Hüquq siyasəti və dövlət quruculuğu komitəsinin sədri Əli Hüseynli İnzibati Xətalar Məcəlləsində dəyişikliklər edilməsi haqqında qanun layihəsini ikinci oxunuşa təqdim edib. Bildirib ki, dəyişikliyə əsasən, yetkinlik yaşına çatmayanlara tütün məmulatı almaqla, verməklə, tütün məmulatından istifadəni təklif və ya tələb etmək yolu ilə onların tütündən istifadə prosesinə cəlb edilməsinə görə yüz manat məbləğində cərimə tətbiq edilir. Tütün məmulatlarının ətraf mühitə atılmasına görə əlli manat məbləğində cərimə nəzərdə tutulur. “Tütün məmulatlarının istifadəsinin məhdudlaşdırılması haqqında” Azərbaycan Respublikasının Qanunu ilə qadağan edilmiş yerlərdə (tütün çəkmək üçün təşkil edilmiş xüsusi yerlər istisna olmaqla) tütün çəkilməsinə şərait yaradılmasına, yaxud tütün çəkilməsinin təklif edilməsinə görə vəzifəli şəxslər beş yüz manat məbləğində, hüquqi şəxslər min iki yüz manat məbləğində cərimələnəcək.
Qanun layihəsi səsə qoyularaq təsdiq edilib.
Aqrar siyasət komitəsinin sədri Eldar İbrahimov “Tütün və tütün məmulatı haqqında” Qanunda dəyişikliklər edilməsi barədə qanun layihəsini ikinci oxunuşa təqdim edib. Qeyd edilib ki, dəyişikliyə görə sənədin 1.0.4-cü maddəsi yeni redaksiyada veriləcək. Belə ki, tütün məmulatlarının buraxılmasını bilavasitə həyata keçirən şəxs (satıcı) tütün məhsulunu istifadə edən şəxsin (alıcının) yetkinlik yaşına çatmasına şübhə etdikdə satıcı alıcıdan onun şəxsiyyətini təsdiq edən və yaşını müəyyən etməyə imkan verən sənəd tələb edə bilər.
Mədəniyyət komitəsinin sədr müavini Jalə Əliyeva ikinci oxunuşda müzakirə üçün “Televiziya və radio yayımı haqqında”, “İctimai televiziya və radio yayımı haqqında”, “Teatr və teatr fəaliyyəti haqqında” qanunlarda dəyişiklik edilməsi barədə qanun layihələrini təqdim edib.
Qeyd olunub ki, hər üç qanunda nəzərdə tutulan dəyişikliklər “Tütün məmulatlarının istifadəsinin məhdudlaşdırılması haqqında” Qanuna uyğunlaşdırılma məqsədi daşıyır. Nəzərdə tutulan dəyişikliklərin televiziya yayımlarında və teatr tamaşalarında tütün məmulatlarının, tütün istifadəsi prosesinin və insan sağlamlığına zərər vuran digər məhsulların reklamına məhdudiyyətlərin qoyulması ilə bağlı olduğu vurğulanıb.
Qanun layihələri səsə qoyularaq təsdiqlənib.
İqtisadi siyasət, sənaye və sahibkarlıq komitəsinin sədri Ziyad Səmədzadə Vergi və Gömrük məcəllələrində dəyişikliklər edilməsi haqqında qanun layihələrini ikinci oxunuşda təqdim edib. bildirilib ki, məcəllələrdə dəyişikliklər edilməsi haqqında qanun layihələri “Dövlət məhkəmə ekspertizası fəaliyyəti haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının 2017-ci il 15 dekabr tarixli Qanununun icrası məqsədilə hazırlanıb.
Qanun layihələri səsə qoyularaq qəbul edilib.
Bununla da Milli Məclisin plenar iclası başa çatıb.