SİYASƏT


Milli Məclisin payız sessiyası başa çatıb

Bakı, 30 dekabr, Ə.Məmmədov, X.Məmmədov, AZƏRTAC

Dekabrın 30-da Azərbaycan Respublikası Milli Məclisinin payız sessiyasının son plenar iclası keçirilib.

AZƏRTAC xəbər verir ki, iclası Milli Məclisin sədri Oqtay Əsədov açaraq gündəliyi təqdim edib.

Sonra gündəlikdə duran məsələlərin müzakirəsinə başlanılıb.

İclasda  G.L.Rzayevanın Azərbaycan Respublikası Ali Məhkəməsinin hakimi təyin edilməsi haqqında qanun layihəsi qəbul edilib.

"Azərbaycan Respublikası Hökuməti ilə Qətər Dövləti Hökuməti arasında təhlükəsizlik məsələləri üzrə əməkdaşlığa dair", "Azərbaycan Respublikası Hökuməti ilə Aviasiya və Hava Məkanından İstifadə üzrə Səlahiyyətli Nümayəndələrin Dövlətlərarası Şurası arasında onun Azərbaycan Respublikası ərazisində yerləşməsi şərtləri haqqında" sazişlərin, "Azərbaycan Respublikası və Səudiyyə İnkişaf Fondu arasında Xırdalan şəhərinin su təchizatı və kanalizasiya sisteminin genişləndirilməsi və yenidən qurulması layihəsi üzrə" Kredit Sazişinin, Azərbaycan Respublikası ilə İran İslam Respublikası arasında dostluq və əməkdaşlıq haqqında Birgə Bəyannamənin, "Azərbaycan Respublikası ilə İran İslam Respublikası arasında sərhəd çaylarının nizamlanması və sahillərinin mühafizəsi tədbirləri üzrə əməkdaşlıq haqqında" Memorandumun, Avropa Şurasının immunitet və imtiyazları haqqında Baş Sazişə dair Altıncı Protokolun, Azərbaycan Respublikası Prezidentinin və Bolqarıstan Respublikası Prezidentinin Birgə Bəyannaməsinin, "Azərbaycan Respublikası ilə Malayziya arasında dostluq münasibətləri və tərəfdaşlıq haqqında" Birgə Bəyannamənin təsdiq edilməsi haqqında qanun layihələri təsdiqlənib. 

Azərbaycan Respublikası ilə İran İslam Respublikası arasında dostluq və əməkdaşlıq haqqında Birgə Bəyannamənin təsdiq edilməsi barədə qanun layihəsinin müzakirəsi zamanı bildirilib ki, bu sənəd ölkələrimiz arasında əlaqələrin daha da inkişafı üçün əsaslı zəmin yaradır. Əlaqələrimiz dostluq, qardaşlıq, qarşılıqlı faydalı əməkdaşlıq üzərində qurulub. Qeyd edilib ki, sənədin birinci bəndində tərəflər öz ərazisində bir-birinin dövlət suverenliyi və ərazi bütövlüyü əleyhinə yönəlmiş təşkilatlar, qruplar və ayrı-ayrı şəxslərin fəaliyyətinin qarşısının alınması ilə bağlı müvafiq tədbirlərin görülməsinə hazır olduqlarını bir daha təsdiq edirlər.

İclasda, həmçinin İnzibati Xətalar, Vergi, Əmək məcəllələrində "Hərbi vəzifə və hərbi xidmət haqqında", "Dövlət qulluğu haqqında", "Azərbaycan Respublikasının vətəndaşlığı haqqında", "Aviasiya haqqında", "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında", "Məhkəmələr və hakimlər haqqında", "Məhkəmə-Hüquq Şurası haqqında" Azərbaycan Respublikasının qanunlarında dəyişikliklər edilməsi barədə qanun layihələri qəbul edilib.

Diqqətə çatdırılıb ki, Azərbaycan Respublikasının Əmək Məcəlləsinə edilən dəyişikliklər müvafiq icra hakimiyyəti orqanının informasiya sisteminə daxil edilən əmək müqaviləsi bildirişlərinin gücləndirilmiş elektron imza ilə təsdiq edilməsi məqsədi daşıyır.

Vergi Məcəlləsinə isə yerli bank və xarici bankın Azərbaycandakı filialı tərəfindən fiziki şəxslərin əmanətləri üzrə ödənilən illik faiz gəlirlərinin 500 manatadək olan hissəsinin gəlir vergisindən azad edilməsini nəzərdə tutan maddə əlavə edilir.

Bildirilib ki, "Hərbi vəzifə və hərbi xidmət haqqında" Qanuna dəyişikliklər hərbi uçot və qeydiyyat qaydalarının təkmilləşdirilməsi məqsədi ilə edilib.

"Azərbaycan Respublikasının vətəndaşlığı haqqında" Qanuna edilən əlavələrə görə, 14 yaşı tamam olmuş şəxs Azərbaycan Respublikasının dövlət dilində Azərbaycan Respublikasına sadiq olacağı barədə and içir. Əlavələr 15-1-ci – “Azərbaycan Respublikası vətəndaşının andı haqqında” maddə ilə bağlıdır. Qeyd edilib ki, vətəndaşlıqla bağlı qanunvericilikdə son vaxtlar bir sıra önəmli dəyişikliklər edilib. Ölkəmizin sosial-iqtisadi inkişafı Azərbaycan vətəndaşı adını daha da nüfuzlu edib. Azərbaycan regionun ən qüdrətli dövlətinə çevrilib. Qüdrətli dövlətin vətəndaşı olmaq da şərəflidir. Bu səbəbdən qanunvericilikdə də bir sıra önəmli dəyişikliklər edilir. Bu da ölkənin inkişafının bir göstəricisidir.

"Məhkəmələr və hakimlər haqqında" Qanun layihəsində edilən dəyişikliklər ədalət mühakiməsinin səmərəliliyinin artırılması, məhkəmə idarəçiliyinin təkmilləşdirilməsi, hakimlərin müstəqilliyinin gücləndirilməsi və onlar barədə tətbiq edilən həvəsləndirmə tədbirlərinin dəqiqləşdirilməsi məqsədi ilə, habelə bir sıra beynəlxalq təsisatların, o cümlədən Avropa Şurasının Azərbaycanın məhkəmə sistemi ilə bağlı tövsiyələrinə uyğun olaraq hazırlanıb. Bu layihədə apelyasiya və ağır cinayət məhkəmələrinin sədrlərinin təyinatının Məhkəmə-Hüquq Şurasının təklifinə əsasən aparılması, ilk dəfə hakim vəzifəsinə təyin edilmiş şəxslərin təyinat müddətinin dəyişdirilməsi, müxtəlif instansiya məhkəmələrinin hakimləri üçün müvafiq qəti son yaş həddinin müəyyən edilməsi, hakimlərin həvəsləndirmə tədbirlərinin dəqiqləşdirilməsi məsələləri öz əksini tapıb.

Sonra Milli Məclis Azərbaycan Prezidenti İlham Əliyevi Dünya Azərbaycanlılarının Həmrəyliyi Günü və Yeni il bayramı münasibətilə təbrik edib. Dövlətimizin başçısına parlament adından təbrik ünvanlanıb. Milli Məclis, həmçinin Dünya Azərbaycanlılarının Həmrəyliyi Günü münasibətilə müraciət qəbul edib. Dünyanın müxtəlif ölkələrində yaşayan soydaşlarımıza ünvanlanan müraciətdə ümummilli məqsədlər naminə birliyə çağırış ifadə olunub.

Payız sessiyasına yekun vuran Milli Məclisin sədri Oqtay Əsədov deyib ki, bu sessiya müddətində parlamentdə 21 iclas keçirilib, 286 qanun və qərar qəbul edilib. Yəni, Milli Məclis üzərinə düşən qanunvericilik səlahiyyətini tam yerinə yetirib.

Parlamentin xarici əlaqələrindən danışan Oqtay Əsədov bildirib ki, deputatlarımız beynəlxalq təşkilatların fəaliyyətində yaxından iştirak edərək 50-yə yaxın ölkəyə 115 səfər ediblər. 60-dan çox xarici dövlətin və beynəlxalq təşkilatın 90-a yaxın nümayəndə heyəti Milli Məclisdə olub. Onlar arasında 6 prezident, 6 baş nazir və 11 parlament sədri olub. Beynəlxalq təşkilatların xətti ilə Azərbaycan 10 beynəlxalq tədbirə ev sahibliyi edib. Avropa Şurası Parlament Assambleyası Bürosunun və Daimi Komitəsinin iclasları, Türkdilli Ölkələrin Parlament Assambleyasının 5-ci plenar iclası, NATO Parlament Assambleyasının 86-cı Rouz-Rout seminarı, ATƏT Parlament Assambleyasının 23-cü illik sessiyası və digər mötəbər toplantılar ölkəmizdə uğurla keçirilib. Təkcə bu tədbirlərdə beynəlxalq parlament təşkilatlarının 1000-ə yaxın nümayəndəsi iştirak edib.

Sonda Azərbaycan Respublikasının dövlət himni səsləndirilib.

Bununla da Milli Məclisin payız sessiyası başa çatıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.