SİYASƏT


Milli Məclisin sədri Sahibə Qafarova Cakartada Namibiya Milli Şurasının sədri ilə görüşüb

Bakı, 5 oktyabr, AZƏRTAC

Milli Məclisin sədri Sahibə Qafarova oktyabrın 5-də İndoneziyaya işgüzar səfəri çərçivəsində paytaxt Cakartada Namibiya Respublikası Milli Şurasının sədri Lukas Sinimbo Muha ilə görüşüb.

Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, Sahibə Qafarova Azərbaycan ilə Namibiya arasında ikitərəfli münasibətlərin qısa tarixə malik olmasına baxmayaraq, ölkələrimiz arasında qarşılıqlı faydalı ikitərəfli münasibətlərin inkişafı üçün böyük potensial olduğunu bildirib.

Milli Məclisin sədri ölkələrimizin beynəlxalq platformalarda əməkdaşlığından razılığını ifadə edərək, Qoşulmama Hərəkatı çərçivəsində də faydalı əlaqələrin mövcudluğunu diqqətə çatdırıb. O xatırladıb ki, 2019-cu il oktyabrın 23-26-da Bakıda keçirilən Qoşulmama Hərəkatına üzv ölkələrin Dövlət və Hökumət Başçılarının 18-ci Zirvə Toplantısı çərçivəsində Namibiya Respublikasının Prezidenti Hage Qotfrid Geinqobun rəhbərlik etdiyi nümayəndə heyəti Azərbaycanda səfərdə olub. S.Qafarova, həmçinin Namibiyanın Azərbaycanın Qoşulmama Hərəkatının sədri kimi təşkilatın parlament ölçüsünün yaradılması ilə bağlı təşəbbüsünə dəstəyini vurğulayaraq qeyd edib ki, bu ölkənin parlament nümayəndə heyəti Parlament Şəbəkəsinin 2021-ci ilin noyabrında Madriddə keçirilən təsis iclasında iştirak edib. Namibiya Qoşulmama Hərəkatının Parlament Şəbəkəsinin Bakı Konfransında da təmsil olunub.

Sahibə Qafarova Qoşulmama Hərəkatının Parlament Şəbəkəsinin sədri kimi, Bakı Konfransının nəticələri, təşkilatın qarşısında duran vəzifələr, planlaşdırılan tədbirlər barədə məlumat verib.

Namibiya Respublikası Milli Şurasının sədri Lukas Sinimbo Muha Azərbaycan parlamentinin sədrini səmimiyyətlə salamlayaraq, görüşdən məmnunluğunu ifadə edib. O, ölkəsinin Azərbaycanla əlaqələrin genişləndirilməsində maraqlı olduğunu vurğulayaraq, bu kontekstdə qanunverici orqanlar arasında əməkdaşlığın rolunu qeyd edib.

Lukas Sinimbo Muha beynəlxalq təşkilatlar çərçivəsində əməkdaşlıqdan danışaraq qeyd edib ki, BMT, Parlamentlərarası İttifaq, Qoşulmama Hərəkatının Parlament Şəbəkəsi kimi beynəlxalq platformalarda əməkdaşlıq onun ölkəsi üçün olduqca vacibdir. O cümlədən Namibiya Qoşulmama Hərəkatı ilə əməkdaşlığa çox böyük əhəmiyyət verir və təşkilatın beynəlxalq münasibətlər sistemində fəal rolunu yüksək qiymətləndirir.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.