REGİONLAR
Mingəçevir Dövlət Universiteti Litvanın Mikolas Romeris Universiteti ilə əməkdaşlıq edəcək
Mingəçevir, 30 iyun, Rauf Hacıyev, AZƏRTAC
Mingəçevir Dövlət Universiteti (MDU) ilə Litvanın Mikolas Romeris Universiteti (MRU) arasında əməkdaşlığın qurulmasına dair görüş keçirilib.
AZƏRTAC-ın bölgə müxbiri xəbər verir ki, “Microsoft Teams” platforması üzərindən onlayn formatda keçirilən görüşdə MDU-nun rektoru Şahin Bayramov və MRU-nun rektoru xanım İnqa Zaleniene iştirak ediblər.
MDU-nun rektoru iki ölkə arasında hərtərəfli əməkdaşlığın inkişafı sahəsində əldə olunmuş uğurlardan və xalqlarımız arasında mövcud dostluq münasibətlərindən bəhs edib. Aprelin 27-də Azərbaycan Prezidenti İlham Əliyev ilə Litva Prezidenti Qitanas Nauseda arasında videobağlantı formatında keçirilmiş görüşün önəminə toxunan rektor hər iki ölkənin liderlərinin strateji tərəfdaşlığın əsas istiqamətləri sırasında təhsil sahəsini vurğuladıqlarını diqqətə çatdırıb.
Ş.Bayramov MDU-nun tarixi, bu ali təhsil ocağında kadr hazırlığı istiqamətləri, universitetin qısa, orta və uzunmüddətli dövrlər üzrə strateji hədəfləri barədə ətraflı məlumat verib. Rektor MRU-nun Litvanın və Avropa İttifaqının sürətlə inkişaf edən ali təhsil müəssisələrindən biri olduğunu və bu universitetlə qarşılıqlı faydalı əməkdaşlıqda maraqlı olduqlarını bildirib.
MRU-nun rektoru İnqa Zaleniene MDU ilə yaradılacaq işbirliyinin iki ölkə arasındakı humanitar əməkdaşlığa töhfə verəcəyinə əminliyini ifadə edib və Azərbaycanın digər universitetləri ilə indiyədək reallaşdırılmış uğurlu layihələrdən bəhs edib. Rektor 30 illik yubileyini qeyd etdikləri MRU-nun keçdiyi inkişaf yolu, hazırda universitetdə 59 ölkədən altı mindən artıq tələbənin təhsil alması, bakalavriat, magistratura və doktorantura səviyyələri üzrə təhsil proqramları və həyata keçirilən elmi tədqiqatlar barədə ətraflı məlumat verib.
Daha sonra İ.Zaleniene son dövrlərdə MRU-nun dünya universitetlərinin beynəlxalq reytinq siyahılarındakı mövqeyinin yaxşılaşması istiqamətində əldə olunmuş uğurlar, Avropa və Asiyanın aparıcı ali təhsil müəssisələri ilə birgə həyata keçirilən tədris proqramları, innovasiyaların təşviqi və universitet idarəçiliyinin təkmilləşdirilməsi sahəsində görülən işlər haqqında danışıb.
Görüşdə iki universitet arasında tələbə və müəllim mübadiləsi, Avropa İttifaqının Erasmus+ və Horizon 2020 proqramlarında birgə iştirak, birlikdə elmi tədqiqatların aparılması və elmi jurnallarda nəşr imkanları, ortaq elmi konfransların və yay məktəblərinin təşkili, gələcəkdə ikili diplom proqramlarının yaradılması üçün geniş imkanların olduğu bildirilib.
Görüşün sonunda hər iki universitetin beynəlxalq əməkdaşlıq ofislərinin rəhbərlərindən ibarət ortaq İşçi Qrupunun yaradılması qərara alınıb. İşçi Qrupuna müvafiq birgə təhlillər aparmaqla cari il oktyabrın 1-dək 2020/2021-ci tədris ilində MDU ilə MRU arasında reallaşdırılacaq konkret tədbirləri əks etdirən İş Planı hazırlanması tapşırılıb.
Qarşılıqlı faydalı və məhsuldar müzakirələrin aparıldığı görüşdə hər iki universitetin müvafiq struktur bölmələrinin əməkdaşları da iştirak ediblər.