Bakı, 3 avqust, AZƏRTAC

İyulun 22-dən 29-dək Mingəçevir Dövlət Universitetində (MDU) növbəti dəfə birhəftəlik “Tyutor xidməti” təlim proqramı təşkil edilib.

MDU-dan AZƏRTAC-a bildirilib ki, proqram çərçivəsində universitetin təcrübəli akademik və inzibati heyət üzvləri tərəfindən “Bolonya prosesi haqqında ümumi məlumat”, “Kredit sisteminin mahiyyəti və məzmunu”, “Ali təhsil müəssisələrinin bakalavriat və magistratura səviyyələrində kredit sistemi ilə tədrisin təşkili Qaydaları”nda əsas anlayışlar”, “Tədrisin təşkili və idarə olunması”, “Akademik məsləhətçi (tyutor) xidməti”, “Tələbələrin hüquq və vəzifələri. Yay məktəbinin təşkili”, “Tələbə və müəllim mobilliyi” və “Təqdimat və onun hazırlanması” mövzusunda təlimlər keçirilib.

Avqustu 3-də MDU-nun rektoru Şahin Bayramov ikinci təlim proqramını müvəffəqiyyətlə bitirən iştirakçılarla görüşüb.

Görüşdə təlimlərə marağın getdikcə artmasından məmnunluğunu ifadə edən MDU-nun rektoru Şahin Bayramov çoxsaylı müraciətləri nəzərə alaraq proqramın yenidən təşkil olunmasında və icrasında əməyi olan bütün akademik, inzibati və texniki heyət üzvlərinə təşəkkür edib. Sözügedən proqramın müvəffəqiyyətlə başa çatdığını vurğulayan rektor təlim iştirakçılarını təbrik edib və karyera inkişafı yolunda onlara uğurlar arzulayıb.

Son dövrdə MDU-da ali təhsil xidmətlərinin keyfiyyət səviyyəsinin yüksəldilməsi istiqamətində görülən işlərdən və qarşıda dayanan vəzifələrdən söhbət açan Ş.Bayramov əldə etdikləri yeni bilik və bacarıqlarla təlim iştirakçılarının tədris prosesinin təşkili və idarə olunmasında daha effektiv fəaliyyət göstərəcəklərinə əminliyini bildirib.

Sonda, təlim iştirakçılarına müvafiq sertifikatlar təqdim edilib.