QAN YADDAŞI
Mingəçevir Gənclər evində “Xocalıya könüllü gedək” mövzusunda seminar təşkil olunub
Bakı, 26 fevral, AZƏRTAC
Xocalı faciəsinin 28-ci ildönümü ilə əlaqədar Mingəçevir regional “ASAN xidmət” mərkəzinin və şəhərdəki Gənclər evinin birgə təşkilatçılığı, Mingəçevir Dövlət Universitetinin, şəhər gənclər və idman idarəsinin tərəfdaşlığı ilə “Xocalıya könüllü gedək” mövzusunda seminar keçirilib.
AZƏRTAC xəbər verir ki, əvvəlcə Azərbaycanın dövlət himninin səsləndirilib və şəhidlərimizin xatirəsi bir dəqiqəlik sükutla yad olunub.
Mingəçevir regional “ASAN xidmət” mərkəzinin direktor müavini Elşən Əliyev tədbirdə çıxış edərək təkcə xalqımıza qarşı deyil, bütün bəşəriyyət əleyhinə ən qanlı cinayətlərdən olan Xocalı soyqırımının beynəlxalq səviyyədə tanıdılması istiqamətində görülən işlərdən, o cümlədən Heydər Əliyev Fondunun uğurlu fəaliyyətindən danışıb.
Mingəçevir Dövlət Universitetinin rektoru Şahin Bayramov Xocalı faciəsinin erməni vandallarının azərbaycanlılara qarşı iki əsr ərzində həyata keçirdikləri etnik təmizləmə siyasətinin növbəti səhifəsi olduğunu bildirib. Rektor Prezident İlham Əliyevin yürütdüyü məqsədyönlü siyasət nəticəsində torpaqlarımızın işğaldan azad olunacağına əminliyini ifadə edib.
Mingəçevir Gənclər evinin direktoru Tural Kərimov Xocalı faciəsinin dünya ictimaiyyətinə çatdırılmasında gənclərin üzərinə düşən öhdəliklərdən, qarşıda duran vəzifələrdən danışıb.
Mingəçevir Şəhər Gənclər və İdman İdarəsinin rəisi Kamal Nəcəfli Xocalı faciəsinə ilk dəfə hüquqi-siyasi qiymətin ulu öndər Heydər Əliyev tərəfindən verildiyini vurğulayıb. Qeyd edib ki, tarixin ən dəhşətli soyqırımı aktlarından olan Xocalı faciəsi haqqında həqiqətlərin beynəlxalq ictimaiyyətə çatdırılması istiqamətində Prezident, Silahlı Qüvvələrin Ali Baş Komandanı İlham Əliyev və Heydər Əliyev Fondu tərəfindən ardıcıl və qətiyyətli iş aparılır.
Anım tədbirində Xocalı sakini Alim İsmayılov çıxış edərək faciə günü yaşadıqları dəhşətli anları iştirakçılarla bölüşüb.
Sonda Xocalı soyqırımı ilə bağlı videoçarx nümayiş olunub.