CƏMİYYƏT


Miqrasiya qanunvericiliyinə dəyişikliklər sahibkarlıq subyektlərinə bir sıra güzəştləri ehtiva edir

Bakı, 20 fevral, AZƏRTAC

Dövlət Miqrasiya Xidməti (DMX) yanında Məşvərət Şurasının növbəti iclası keçirilib. İclasda Azərbaycanda fəaliyyət göstərən sahibkar təşkilatlarının, işəgötürənlərin assosiativ birliklərinin və iri şirkətlərin nümayəndələri iştirak ediblər.

DMX-dən AZƏRTAC-a bildiriblər ki, Dövlət Miqrasiya Xidmətinin rəisi Vüsal Hüseynov görüşdə çıxış edərək respublikada sahibkarlığın inkişafı məqsədilə biznes mühitinin daim yaxşılaşdırılması, bu sahədə miqrasiya qanunvericiliyinin təkmilləşdirilməsi istiqamətində həyata keçirilən tədbirlər barədə məlumat verib. Bildirib ki, miqrasiya qanunvericiliyinə edilən dəyişikliklər ölkəmizə gələn əcnəbilərin və vətəndaşlığı olmayan şəxslərin Azərbaycanda qanuni əsaslarla olması, yaşaması, işləməsi üçün şəffaf, daha operativ və rahat şəkildə sənədləşmə proseslərini həyata keçirməyə imkan yaradır. Dəyişikliklər müraciətlərin daha qısa müddətdə cavablandırılmasını, ölkədə olma və yaşama icazələri almaq üçün əsasların dairəsinin genişləndirilməsini, sahibkarlıq subyektlərinə bir sıra güzəştləri və miqrasiya prosesləri üzərində nəzarətin effektivliyinin təmin olunmasını özündə ehtiva edir.

Xidmət rəisi qanunvericiliyə dəyişikliklərdə vətəndaş maraqlarının, biznes nümayəndələrinin mənafeyinin önə çəkildiyini, bunun üçün Dövlət Miqrasiya Xidmətində iş adamları ilə mütəmadi görüşlərin, müzakirələrin keçirildiyini, sahibkarların təkliflərinin nəzərə alındığını bildirib. Vüsal Hüseynov bundan sonra da sahibkarlıq subyektlərinin və vətəndaşların məmnunluğunun təmin edilməsinin prioritet olacağını, miqrasiya sahəsində normativ-hüquqi bazanın təkmilləşdirilməsi istiqamətində işlərin davam etdiriləcəyini söyləyib.

Xidmət rəisi, həmçinin DMX-nin yenicə istifadəyə verilmiş www.migrationto.az saytı və onun imkanları barədə tədbir iştirakçılarını məlumatlandırıb. Bildirib ki, sayt ölkəmizə səfər edən əcnəbilərin və vətəndaşlığı olmayan şəxslərin Azərbaycanın müvafiq dövlət qurumları tərəfindən göstərilən xidmətlər, o cümlədən ölkəmizin mədəniyyəti, tarixi, adət-ənənələri, turizm məkanları barədə məlumatlandırılmaları, eləcə də Azərbaycanın turizm baxımından cəlbedici bir məkana çevrilməsi və ölkəmizə investisiya axınının təşviq edilməsi məqsədi daşıyır.

Görüş çərçivəsində DMX tərəfindən təşkil olunmuş onlayn sorğunun nəticələri və 2020-ci ilin ölkəmizdə “Könüllülər ili” elan edilməsi nəzərə alınaraq, “Miqrasiya Könüllüsü” İctimai Birliyinin nümayəndələrinin özəl sektorun təşkil etdiyi müvafiq kampaniyalara cəlb olunmasının mümkünlüyü ilə bağlı müzakirələr aparılıb.

Dövlət Miqrasiya Xidmət yanında İctimai Şuranın nümayəndələri bir sıra məsələlərə dair fikirlərini bölüşüblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.