CƏMİYYƏT


Miqrasiya sahəsində əcnəbi tələbələrin maarifləndirilməsi məqsədilə tədbirlər davam etdirilir

Bakı, 13 mart, AZƏRTAC

Dövlət Miqrasiya Xidmətinin (DMX) yaradılmasının 11-ci ildönümü ərəfəsində Bakı Slavyan Universitetində və Azərbaycan Dövlət Rəssamlıq Akademiyasında maarifləndirmə tədbirləri keçirilib.

DMX-nin mətbuat xidmətindən AZƏRTAC-a bildiriblər ki, görüşlərdə miqrasiya qanunvericiliyinə edilmiş bir sıra dəyişikliklər, ölkədə miqrasiya proseslərini əhatə edən yeniliklər, eləcə də respublikamızda əcnəbilər və vətəndaşlığı olmayan şəxslər üçün yaradılmış şərait barədə məlumat verilib. Bildirilib ki, miqrasiya proseslərinin vahid və çevik prosedurlar əsasında tənzimlənməsinə, sənədləşmənin sadələşdirilməsinə xidmət edən tədbirlərdən biri də “Miqrasiya proseslərinin idarəolunmasında “bir pəncərə" prinsipinin tətbiqi haqqında” Prezident İlham Əliyev tərəfindən 2009-cu il martın 4-də imzalanmış Fərman olub. Həmin Fərmanın tətbiqi ölkədə miqrasiya proseslərinin daha çevik və işlək mexanizmlər əsasında idarə edilməsinə, bu sahədə operativliyin təmin olunmasına və həllini gözləyən problemlərin aradan qaldırılmasına imkan verib.

Diqqətə çatdırılıb ki, multikultural dəyərlərin hakim olduğu ölkəmizdə yaşayan əcnəbilər Azərbaycan dilinin, tarixinin, mədəniyyətinin, əcnəbilərin və vətəndaşlığı olmayan şəxslərin hüquq və vəzifələri ilə bağlı qanunvericiliyin öyrənilməsi üçün Dövlət Miqrasiya Xidmətinin təlim-tədris mərkəzinə müraciət edə bilərlər.

Görüşdə müvəqqəti və daimi yaşama icazəsi, haqqı ödənilən əmək fəaliyyəti üçün iş icazəsinin verildiyi və müddətlərin uzadıldığı hallar iştirakçıların diqqətinə çatdırılıb. Həmçinin ölkədə əcnəbi tələbələr üçün nəzərdə tutulan güzəştlər barədə məlumat verilib.

Bildirilib ki, görülmüş işlərin nəticəsidir ki, bu gün Dövlət Miqrasiya Xidməti Vahid Miqrasiya Məlumat Sistemi vasitəsilə hər bir əcnəbinin və vətəndaşlığı olmayan şəxsin hansı tarixdə ölkəyə daxil olduğuna, harada yaşadığına, işləməsinə və nə vaxt ölkəni tərk etməsinə tam nəzarət edir. Ona görə də respublika ərazisində olan əcnəbilər ölkəyə gəlişinin bəyan edilmiş məqsədlərinə riayət etməlidirlər.

Sonda görüş iştirakçılarını maraqlandıran suallar Xidmət əməkdaşları tərəfindən cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.