CƏMİYYƏT
“Mir-24” telekanalında AZƏRTAC-ın 100 illik yubileyinə həsr edilmiş reportaj verilib
Bakı, 12 avqust, AZƏRTAC
Şərqdə və MDB-də ən qədim xəbər agentliklərindən biri, Azərbaycanda dövlət statusuna malik olan yeganə informasiya agentliyi olan AZƏRTAC bu il bir əsrlik yubileyini qeyd edir.
AZƏRTAC xəbər verir ki, bu əlamətdar hadisə münasibətilə “Mir-24” teleşirkəti tərəfindən hazırlanmış reportajda AZƏRTAC-ın tarixindən, onun uğurlarından və beynəlxalq informasiya məkanında yüksək nüfuzundan bəhs edilir.
Qeyd olunur ki, AZƏRTAC-ın inkişafında Heydər Əliyevin böyük xidmətləri olub. Məhz Ümummilli Liderin sayəsində Agentlik ən müasir texniki vasitələrlə təchiz olunub. Hazırda AZƏRTAC səkkiz dildə xəbərlər buraxır. Onun saytında fotoinformasiya və videomateriallar yerləşdirilir. Dövlətin bu xəbər resursunun ölkədə və xaricdə ən böyük müxbir şəbəkəsi var. Dünyanın 21 dövlətində AZƏRTAC-ın nümayəndəlikləri fəaliyyət göstərir.
Reportajda Agentliyin əməkdaşları ilə müsahibələr yer alıb. Onlar öz sevimli işləri, habelə dövlət agentliyi statusundan irəli gələn məsuliyyət barədə danışırlar.
Agentliyin fotomüxbiri İlqar Cəfərov qiymətli bir relikviyanı nümayiş etdirərək deyib: “Mən əvvəllər bu “Nikon-FM-2” fotoaparatı ilə işləyirdim. O, mənə vicdanla xidmət edib”.
İlqar Cəfərov bu fotoaparatı 1980-ci illərin sonunda, Agentlikdə işləməyə gəldiyi vaxt almışdı. O vaxt ali məktəbin gənc məzununu redaksiyanın idman şöbəsinə təyin etdilər. O, on ildən çox həmin fotokamera ilə işlədi.
Otuz il ərzində minlərlə fotoşəkil çəkmiş AZƏRTAC-ın fotomüxbiri deyir: “Mən Azərbaycan nümayəndə heyətinin tərkibində bir neçə dəfə Paralimpiya və Olimpiya oyunlarında olmuşam. Respublikada və xaricdə, o cümlədən 1998-ci ildə Moskvada, 1999-cu ildə Danimarkada Gənclərin Ümumdünya Oyunlarında fotoşəkillər çəkmişəm”. Bu şəkillərin hər biri ona əzizdir.
Fotomüxbir İlqar Cəfərov ən uğurlu iş anlarından birini belə xatırlayır: “Bir dəfə yarışlardan fotoşəkillər çəkirdim. Fotoreportyorlardan biri mənə dedi ki, gəl stadiona gedək, bu gün orada tarixi qaçış olacaq – Hüseyn Bolt 200 metr məsafəyə qaçacaq. Mən onunla stadiona getdim. Hüseyn Boltun həm qaçışını, həm də portretini çəkməli oldum. Sanki bəxtim gətirmişdi. O, mənim yaxınlığımdan keçəndə şəklini çəkdim”.
Fotoarxivin əməkdaşı içərisində plyonkalar olan zərflərin saxlandığı balaca şkafı açır. Bu fotoarxivdə respublikanın və dünyanın həyatına aid mühüm hadisələr əks olunub. Azərbaycanın müstəqilliyinin ildönümü, Heydər Əliyevin BMT-nin Baş katibi ilə görüşü... Bütün plyonkalar xüsusi temperatur rejimində ayrıca zərflərdə qayğı ilə qorunub saxlanır.
Agentliyin meneceri Sədaqət Alışova deyir: “Burada 1991-ci ildən bəri çəkilmiş plyonkalar saxlanılır. 2003-cü ildən bizim fotoqraflar rəqəmsal fotoaparatlarla çəkiliş aparmağa başlayıblar. Bu şəkillər disklərdə saxlanılır. Onlar da burada, foto arxivindədir. Bundan əlavə, hazırda biz konvertasiya işləri görürük, yəni fotoşəkilləri plyonka formatından rəqəmsal formata çeviririk”.
İnformasiya rus dilinə tərcümə şöbəsinin rəhbəri Nazim Xıdırov deyir: “Mənim fikrimcə, bizim işin əsas dəyəri ondan ibarətdir ki, bizim informasiya mötəbərdir. Əgər bir informasiyanı AZƏRTAC dərc edibsə, bu, ən mötəbər mənbədir. Bizim informasiyaya istinad edirlər. Bizim informasiyaya etibar edirlər. Məsələn, çox tez-tez görürəm ki, materialı işləyib, tərcümə edib qurtarandan dərhal sonra o, başqa bir agentliyin saytında yerləşdirilir”.
Şərqdə və MDB-də ən qocaman xəbər agentliklərindən biri olan AZƏRTAC 1920-ci ildə Azərbaycan Xalq Cümhuriyyəti dövründə yaradılıb. Əvvəlcə teleqraf agentliyi kimi, sonra TASS agentliyinin bir bölməsi kimi fəaliyyət göstərib. 1991-ci ildə Azərbaycan dövlət müstəqilliyini bərpa edəndən sonra bu informasiya agentliyi müstəqil struktura çevrilib.