CƏMİYYƏT
Mirhəsən Seyidov: Türk Şurasının Bakıdakı Zirvə görüşü türk dünyası üçün yeni strateji inkişaf xəritəsi müəyyənləşdirdi
Bakı, 16 oktyabr, AZƏRTAC
Azərbaycan Prezidenti İlham Əliyev Türkdilli Dövlətlərin Əməkdaşlıq Şurasının fəaliyyətinə daim böyük önəm verir. Digər türkdilli ölkələrin dövlət və hökumət başçıları da Türk Şurasına nə dərəcədə böyük önəm verdiklərini ötən gün Bakıda keçirilən Zirvə görüşündə iştirak etməklə bir daha təsdiqlədilər. Dünən bütün dünyanın diqqəti Azərbaycanın paytaxtı Bakıya yönəlmişdi.
AZƏRTAC xəbər verir ki, bu fikirləri Türk Şurası Gənclər Platformasının sədri Mirhəsən Seyidov deyib.
M.Seyidov bildirib ki, Zirvə görüşündə iştirak edən liderlərdən dördünün gənclər və idman məsələləri barədə səsləndirdiyi fikirlər Türk Şurası Gənclər Platformasının qarşıdakı dövrdə əsas fəaliyyət istiqamətini müəyyənləşdirir. Özbəkistan Prezidentinin Gənc Sahibkarlar Forumunun keçirilməsi barədə təklifi xüsusilə əhəmiyyətlidir. Bu istiqamət fəaliyyət planımıza daxil ediləcək. Zirvə görüşündə Prezident İlham Əliyevin Zəngəzur bölgəsinin Azərbaycandan alınıb Ermənistana birləşdirilməsi nəticəsində böyük türk dünyasının coğrafi baxımdan parçalandığını vurğulaması türk dünyası üçün vacib mesaj idi.
“Türkiyə Prezidenti Rəcəb Tayyib Ərdoğan Zirvə görüşündən bir gün öncə dünya türk iş adamlarının toplantısında ümumtürk diasporu barədə fikirlər səsləndirmişdi. Prezident Rəcəb Tayyib Ərdoğanın Zirvə görüşündə Dağlıq Qarabağ probleminin qeyd-şərtsiz Azərbaycanın ərazi bütövlüyü çərçivəsində həllinə dair qəti mövqeyi bu münaqişənin çözümünə dair qardaş ölkələrin ortaq mövqeyini əks etdirir. Macarıstan hökumətinin Türk Şurası üçün Avropada xüsusi ofis açması və Özbəkistanın Şuraya tamhüquqlu üzv qəbul olunması, eyni zamanda, Türkmənistanın da Zirvə görüşündə iştirakı bunu deməyə əsas verir ki, bu platforma daha da böyüyəcək və digər türkdilli xalqların yaşadığı ölkələrin də marağına səbəb olacaq”, - deyə M.Seyidov vurğulayıb.
Türk Şurası Gənclər Platformasının sədri bildirib ki, üzv dövlətlər arasında gömrük, ticarət dövriyyəsi, turizm məsələlərinə toxunan liderlər türk dünyası üçün yeni strateji inkişaf xəritəsi müəyyənləşdiriblər.