DÜNYA


Misir Prezidenti Liviyada sülh planını açıqlayıb

Qahirə, 7 iyun, AZƏRTAC

Misir Prezidenti Əbdülfəttah Əl-Sisi iyunun 8-dən etibarən, Liviyada atəşkəs elan edilməsi və sülhə nail olunması üzrə planını açıqlayıb.

AZƏRTAC xəbər verir ki, sözügedən planın detalları Liviya Parlamentinin spikeri Aqela Saleh və Liviya Milli Ordusunun komandanı Xəlifə Həftarın iştirakı ilə Qahirədə keçirilən mətbuat konfransında elan edilib.

“Qahirə təşəbbüsü” adlanan plana əsasən, Liviyada böhran sülh yolu ilə həll edilməlidir. Misir Prezidenti bildirib ki, atəşkəs elan edildikdən sonra Liviyadakı bütün əcnəbi muzdlu əsgərlər bu ölkəni tərk etməlidir. “Liviyada sülh Misirin təhlükəsizliyi deməkdir”, deyən Prezident əlavə edib ki, münaqişənin nizama salınması üzrə Cenevrədə keçirilən “5+5” formatında komissiya öz işini yekunlaşdırmalıdır.

Misir Prezidentinin sülh planında Liviyanın üç regionunun hakimiyyətdə təmsil olunması, BMT-nin himayəsi ilə Prezident Şurasına seçkilərin keçirilməsi, regionlara parlamentdə bərabərhüquqlu imkanlar verilməsi, on səkkiz ay müddətində keçid dövrünün elan edilməsi, ölkədə vahid iqtisadi sistemin və maliyyə strukturlarının yaradılması nəzərdə tutulur.

Oqtay Bayramov

AZƏRTAC-ın xüsusi müxbiri

Qahirə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.