Qahirə, 9 avqust, AZƏRTAC

Hazırda Səudiyyə Ərəbistanında istehsal edilən müqəddəs Kəbənin Kisva adlanan örtüyü Osmanlı imperiyası dövründə Qahirənin mərkəzindəki Xan əl-Xəlil bazarındakı emalatxanada hazırlanıb.

Bu qədim məkanın sahibi Əhməd Osman AZƏRTAC-ın xüsusi müxbiri ilə söhbətində bildirib ki, indi də ipək parçanın üzərində Quran ayələri işlənmiş kisva hazırlanır, lakin bu gözəl sənət əsəri suvenir kimi satılır. Onun sözlərinə görə, bir əsr öncə Qahirənin əl-Hüseyn meydanında yerləşən emalatxanada onun babası tərəfindən istehsal olunan örtük hər Həcc ziyarətindən əvvəl müqəddəs Kəbənin üzərinə salınırdı. Həmin iş məkanı da böyük olub, orada 10 usta çalışıb. Lakin Səudiyyə Ərəbistanı Krallığı elan edildikdən sonra bu missiyanı Məkkənin Oum Əl-Cud məhəlləsində yerləşən fabrikdə yerinə yetirməyə başlayıblar.

Vaxtilə müsəlman aləminin ən böyük sifarişini yerinə yetirən məkanda indi təkcə Əhməd Osman çalışır və turistlər üçün suvenirlər hazırlayır. Divarlarını qara və qəhvəyi keçə vərəqlərində yazılmış ayələr və dualar bəzəyən, gümüş və qızıl saplarla zərif şəkildə işlənmiş parçalar asılmış emalatxana əcnəbi turistlərin diqqətini cəlb edir.

Osmanın babası Osman Abdülhamid XX əsrin əvvəlində sırf Misir istehsalı olan Kisvaya nəzarət edən sonuncu şəxs olub. Bundan sonra isə ailənin ən böyük sifarişləri keçmiş prezidentlər Camal Əbdel-Nasir və Ənvər Sadat da daxil olmaqla, Misir və xarici dövlətlərin yüksək vəzifəli şəxsləri üçün hərbi paltar tikmək olub.

Oqtay Bayramov

AZƏRTAC-ın xüsusi müxbiri

Qahirə