Bakı, 10 iyun, AZƏRTAC

Misirin “Əl-Hivar” (Dialoq) Siyasi və Media Araşdırmaları Mərkəzində Ümummilli Lider Heydər Əliyevin anadan olmasının 100 illiyi və Ümumdünya Ətraf Mühitin Mühafizəsi Günü çərçivəsində “Heydər Əliyev və dünya sülhü: Minalarla mübarizəyə giriş” adlı seminar keçirilib.

Bu barədə AZƏRTAC-a Azərbaycanın Misirdəki səfirliyindən məlumat verilib.

Seminarda səfir E.Poluxov çıxış edərək Azərbaycan xalqının Ümummilli Lideri Heydər Əliyevin həyat və fəaliyyəti, tarixdəki rolu, onun Azərbaycan torpaqlarının işğalı zamanı vəziyyətdən çıxış yolu üçün göstərdiyi səylər haqqında geniş məlumat verib. Ulu Öndər Heydər Əliyevin dünyanın bir çox ölkələrində sülhə verdiyi töhfələr ilə xatırlandığını qeyd edərək, Ulu Öndərin Azərbaycanın müstəqillik əldə etdikdən sonra çətin mərhələdən çıxmasını təmin etdiyini bildirib, hakimiyyət illərində minalarla mübarizədə göstərdiyi çoxsaylı səylərə toxunaraq, onun uğurlarının Azərbaycan Prezidenti İlham Əliyev tərəfindən davam etdirildiyini söyləyib. E.Poluxov 44 günlük Vətən müharibəsindən sonra azad olunmuş torpaqlarda indiyədək qalmış mina təhlükəsindən söhbət açaraq, bu ərazilərdə mina partlaması nəticəsində yüzlərlə dinc sakinin həlak olması və şikəst qalmasını bəşəriyyət qarşısında ağır cinayət kimi dəyərləndirib.

General H.Ləbib çıxış edərək Azərbaycanın Ümummilli Lideri Heydər Əliyevin Misirdə xoş xatirələrlə yad edildiyini, Ulu Öndərin Azərbaycan daxilində və hüdudlarından kənarda sülhün bərqərar olması istiqamətində göstərdiyi səyləri yüksək qiymətləndirərək, onu yaranmış böhranlardan səmərəli şəkildə çıxan mahir bir siyasətçi kimi xarakterizə edib.

O, minalardan əziyyət çəkən ölkələrin bu problemdən qurtulması üçün beynəlxalq təşkilatlar tərəfindən maliyyə və texniki dəstək göstərilməsinin vacibliyini qeyd edib, belə ölkələrə maliyyə qrantlarının verilməsi ilə məşğul olan beynəlxalq təşkilatların dəstəklənməsinin vacibliyini bildirib. General minalardan daha çox mülki əhalinin əziyyət çəkdiyini və minalardan istifadə edən dövlətləri beynəlxalq məsuliyyətə çəkməyin zəruriliyini vurğulayıb.

“Əl-Hivar” (Dialoq) Mərkəzinin direktor müavini N. Abu Əl-Futuh çıxış edərək, mina probleminə toxunub və “Ərazilərin minalardan təmizlənməsi: Lider Heydər Əliyev baxışının öyrənilməsi” adlı işçi sənədi tədbir iştirakçılarına təqdim edib. Qeyd olunub ki, məhz Heydər Əliyevin 1998-ci ildə imzaladığı Sərəncamla Azərbaycanda minatəmizləmə sahəsində ixtisaslaşmış ANAMA agentliyi yaradılıb və Ulu Öndərin səyləri nəticəsində BMT-nin müvafiq proqramları bu problemin həllinə cəlb edilib.

Misirin ekologiya nazirinin keçmiş müavini Dr A.Haiba minaların ətraf mühitə vurduğu fəsadlar haqqında söhbət açıb, buna dair işçi sənəd təqdim edib. A. Haiba Misirin də İkinci Dünya müharibəsi zamanından basdırılmış və Sinay yarımadasında müharibədən sonra qalan minalardan əziyyət çəkdiyini və bu problemin həllinə dair bütün dünyada minalardan əziyyət çəkən ölkələrin vahid bir mövqedən çıxış etmək vacibliyini qeyd edib.

Seminarda Süveyş Universitetinin dekan müavini Dr.A. El-Derby çıxış edərək, dünyada mina məsələsi ilə əlaqədar beynəlxalq hüquqda olan məsələlərə toxunub və “Beynəlxalq hüquqda minaların təmizlənməsi" adlı sənəd təqdim edib.

Tədbirdə həmçinin azərbaycanlı ekspert, Beynəlxalq Avrasiya Mətbuat Fondunun prezidenti Ümüd Mirzəyevin seminar iştirakçılarına mövzu ilə bağlı videomüraciəti nümayiş etdirilib.

Sonra məruzəçilər tədbir iştirakçılarının çoxsaylı suallarını cavablandırıblar.

Qeyd etmək lazımdır ki, seminar “Əl-Hivar” (Dialoq) Mərkəzinin minatəmizləmə sahəsinə marağı ilə yanaşı, sülhün qurulması və gələcək nəsillər üçün daha yaxşı gələcəyin təmin edilməsi üçün mühüm sahə kimi xarakterizə edilib və bir çox yerli mətbuat orqanları tərəfindən geniş işıqlandırılıb.