DÜNYA


Misirə məxsus 5 min qədim artifakt ABŞ-dan geri qaytarılıb

Qahirə, 28 yanvar, AZƏRTAC

Yanvarın 27-də əksəriyyəti Vaşinqtondakı Müqəddəs Bibliya Muzeyində nümayiş etdirilən və qədim Misir dövrünə aid olan 5 min artifakt Qahirə Beynəlxalq Aeroportuna gətirilib.

AZƏRTAC xəbər verir ki, bu barədə Misirin Turizm və Qədim Abidələr Nazirliyi məlumat yayıb.

Nazirliyin rəsmisi Şaban Əbdül Cavad jurnalistlərə müsahibəsində qeyd edib ki, onun təmsil etdiyi qurum və Xarici İşlər Nazirliyi artifaktların qaytarılması ilə bağlı 2016-cı ildən ABŞ-ın uyğun strukturları, o cümlədən Daxili Təhlükəsizlik Departamenti ilə danışıqlar aparıblar. Onun sözlərinə görə, bu qədim irs nümunələri qanunsuz olaraq Misirdən çıxarılıb.

Misirə qaytarılan kolleksiyada 5 min artifakt, o cümlədən manuskriptlər və papirus parçaları, qibti misirlilərin, habelə ərəb və yunan dilində yazılmış mətnlər, üzərində fironların rəsmləri olan taxta lövhələr, maskalar, daş heykəllərin parçaları və mumiyalar var. Qaytarılan artifaktlar Misirdəki Qibti Muzeyində nümayiş etdiriləcək.

Birləşmiş Ştatların Misirdəki səfiri Conatan Kohen artifaktların öz sahibinə qaytarılmasından məmnunluğunu ifadə edib.

Oqtay Bayramov

AZƏRTAC-ın xüsusi müxbiri

Qahirə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.