SİYASƏT
Misirli politoloq: Azərbaycan BMT Təhlükəsizlik Şurasının qətnamələrini öz gücünə yerinə yetirdi
Qahirə, 17 noyabr, AZƏRTAC
Azərbaycan torpaqlarını işğaldan azad etməklə BMT Təhlükəsizlik Şurasının Ermənistan qoşunlarının işğal altındakı ərazilərdən çıxarılmasına dair məlum qətnamələrini öz gücünə yerinə yetirdi. XXI əsrdə hər hansı bir ölkənin qonşu dövlətin ərazilərini işğal altında saxlaması yolverilməzdir.
Bu fikirləri AZƏRTAC-ın xüsusi müxbirinə açıqlamasında Misirin tanınmış politoloqu, Misir Xarici Əlaqələr Şurasının üzvü, Qahirə Universitetinin Rusiya Araşdırmalar Mərkəzinin direktoru, professor Nurhan əl-Şeyx söyləyib.
Professor bildirib ki, Rusiya, Azərbaycan və Ermənistan liderlərinin müharibənin dayandırılması və işğalçı qoşunların ərazilərdən çıxarılması haqqında bəyanatı Cənubi Qafqaz regionunda sülhün və sabitliyin bərqərar olması baxımından mühüm addımdır. “Düşünürəm ki, bu şərtlər daha əvvəl, danışıqları yolu ilə yerinə yetirilməli idi. Çünki ədalətli olsa belə, müharibə münaqişə tərəfləri üçün arzuolunmazdır. Lakin ATƏT-in Minsk qrupunun vasitəçiliyi ilə 27 ildən çox davam edən danışıqlar prosesinin nəticə vermədiyi də faktdır. Ermənistanın Azərbaycan torpaqlarından çıxması və davamlı sülhün təmin edilməsi regionda tərəqqinin də sürətlənməsinə töhfə olacaq”, - deyə politoloq vurğulayıb.
Nurhan Əl-Şeyx qeyd edib ki, hələ sentyabrda Ermənistanın Qarabağda demoqrafik şəraiti dəyişməsi, Yaxın Şərq ölkələrindən erməniləri bu ərazidə qanunsuz yerləşdirməsi dünya ictimaiyyətinin etirazına səbəb olmuşdu. “Məhz beynəlxalq hüquqa zidd olan bu cür hərəkətlər danışıqlar prosesinə zərbə vurdu və insan tələfatı, dağıntılarla nəticələnən müharibə başladı. Ümidvaram ki, gələcəkdə bütün münaqişələr diplomatik yollarla həllini tapacaq. Bundan sonra Azərbaycan öz ərazilərində quruculuq işləri aparacaq. Xalqınıza sülh və tərəqqi arzulayıram”, -deyə misirli politoloq sözlərinə yekun vurub.
Oqtay Bayramov
AZƏRTAC-ın xüsusi müxbiri
Qahirə