Qahirə, 26 fevral, AZƏRTAC

XX əsrin ən dəhşətli cinayətlərindən biri olan Xocalı soyqırımı qurbanlarının qisası Azərbaycanın rəşadətli ordusu tərəfindən döyüş meydanında alındı. Bu fikri AZƏRTAC-ın xüsusi müxbirinə müsahibəsində vurğulayan Qahirə Universitetinin Şərq ölkələri bölməsinin rəhbəri, professor Calal Əl Səid Əl Həfnəvi deyib: “Azərbaycan xalqını Ermənistan üzərində böyük Qələbə münasibətilə təbrik edirəm. Biz uzun illərdir bu Zəfəri, erməni faşizminin məğlub olmasını gözləyirdik və ötən ilin sonunda buna nail olundu. Qarabağ torpağı yenidən öz sahiblərinə qovuşdu. Biz buna çox sevinirik. Azərbaycanın həmin ərazidə olan məscidləri, qədim abidələri bu diyarın əsl sakinlərinə qucaq açdı. Bu gün də Xocalı soyqırımının 29-cu ildönümünü birlikdə qeyd edirik. Erməni faşistlərinin 1992-ci ildə törətdiyi bu qanlı cinayətin əsas məqsədi məhz yerli əhalini öz doğma yurdlarından didərgin salmaq, etnik təmizləmə siyasəti aparmaq idi. Xocalıda 613 mülki şəxs, o cümlədən qadın, yaşlı insanlar və uşaqlar amansızcasına qətlə yetirilib, itkin düşənlərin bir çoxunun taleyi hələ də məlum deyil. Allaha şükürlər olsun ki, Azərbaycan xalqının Zəfəri faciə qurbanlarının ruhunun rahat olmasına səbəb oldu. Azərbaycan Prezidentinin böyük səbir nümayiş etdirməsi, təmkinlə ölkənin inkişafını və ordunun güclənməsini təmin etməsi bu Zəfərin rəhni oldu. BMT-nin, digər beynəlxalq təşkilatların, ATƏT-in Minsk qrupunun bacara bilmədiklərini qəhrəman Azərbaycan Ordusu həyata keçirdi və ölkənizin ərazi bütövlüyünü təmin etdi. Eyni zamanda, soyqırımı qurbanlarının qisası döyüş meydanında alındı. Bu il Xocalı qurbanlarının xatirəsini anarkən zillət deyil, fəxr hissləri keçiririk. Biz indiyədək Azərbaycan səfirliyinə toplaşarkən bu qədər fərəh və ehtişam hissi keçirməmişdik. Bu gün dahi şəxsiyyət Heydər Əliyevin də ruhu şad olub, çünki onun varisi bu böyük Zəfəri gerçəkləşdirə bilib”.

Misirli professor daha sonra deyib: “Mən Azərbaycana səfərim zamanı Naxçıvana getdim və orada həmin vaxt universitetin rektoru İsa Həbibbəyli tərəfindən təltif edildim. Azərbaycanın bu qədim diyarına təyyarə ilə yollandıq, amma bu Qələbə nəticəsində yaxın gələcəkdə oraya qatar və avtomobillə də getmək mümkün olacaq. Biz görkəmli Azərbaycan yazıçısı Cəlil Məmmədquluzadə haqqında kitabı da ərəb dilinə tərcümə etmişik. Biz Qahirə Universitetində ilk dəfə olaraq Azərbaycan dilinin tədrisinə başladıq. Artıq tələbələrdən bir çoxu azərbaycanca danışır. Sözlərimin sonunda qardaş Azərbaycan xalqına uğurlar arzulayıram. Misirdə sizinlə fəxr edirik”.

Oqtay Bayramov

AZƏRTAC-ın xüsusi müxbiri

Qahirə