Bakı, 8 may, AZƏRTAC

Moldovanın “Tribuna” xəbər portalında AZƏRTAC-ın Ukrayna, Belarus və Moldova üzrə xüsusi müxbiri Emil Hüseynlinin ümummilli lider Heydər Əliyevin anadan olmasının 98-ci ildönümü barədə məqaləsi dərc edilib.

Məqalədə müəllif qeyd edir ki, ulu öndər Heydər Əliyev Azərbaycan multikulturalizminin siyasi qurucusudur. Heydər Əliyev demişdir: “Azərbaycan əhalisinin çoxmillətli olması bizim irsimizdir”. Ümummilli lider Heydər Əliyev bütün siyasi fəaliyyətlərini bu irsin əbədiləşdirilməsinə həsr etdi. Ulu Öndərin təşəbbüsü və tapşırığı ilə Azərbaycanın çoxmədəniyyətli ənənələrinin dövlət tərəfindən qorunub saxlanılması hüquqi sənədlərdə, o cümlədən Azərbaycan Konstitusiyasında öz əksini tapdı. Multikulturalizm siyasətinin əsasını təşkil edən tolerantlıq prinsipi əsas Qanunun - Azərbaycan Konstitusiyasının bir sıra maddələrində açıq şəkildə təsbit edildi.

Hazırda Azərbaycanda 2 mindən çox məscid, 7 sinaqoq, 13 xristian kilsəsi var. Bu gün ölkəmizdə 760-a qədər dini icma qeydiyyata alınmışdır. Onların sərbəst fəaliyyəti dinlərarası harmoniyadan xəbər verir.

Vurğulanır ki, Ümummilli Liderin əsasını qoyduğu multikulturalizm siyasəti müasir dövrdə Prezident İlham Əliyev tərəfindən uğurla davam etdirilir. Dövlətimizin başçısının dəfələrlə qeyd etdiyi kimi, multikulturalizm xalqın həyat tərzinə çevrilib. Azərbaycan bu gün də müxtəlif sivilizasiyalar arasındakı mənəvi bir körpünün tarixi rolunu layiqincə davam etdirərək, dini və mədəni müxtəlifliyin harmoniyasına əsaslanan bir cəmiyyət qurmağın mümkünlüyünü bütün dünyaya nümayiş etdirir. Azərbaycanın dövlət başçısı multikulturalizm, İslam həmrəyliyi ideyalarının fəal təbliğatçısı, mədəniyyətlərarası əməkdaşlıq üzrə “Bakı prosesi”nin müəllifidir. Azərbaycanın Birinci vitse-prezidenti Mehriban Əliyevanın beynəlxalq müstəvidə genişmiqyaslı fəaliyyəti, milli və mənəvi irsimizin yüksək səviyyədə təbliği, ümumbəşəri dəyərlərə himayədarlıq etməsi Azərbaycanı dünyada multikultural dövlət kimi tanıdıb.

Sonda Azərbaycanın 44 günlük Vətən müharibəsindəki tarixi qələbəsinə toxunan müəllif yazıb ki, müharibə zamanı Azərbaycan ata-baba torpaqlarını işğaldan azad edərək tarixi ədaləti bərpa etdi. Ermənistanın işğalı nəticəsində bir vaxtlar çiçəklənən Azərbaycan şəhərləri dağıdıldı, ərazilərimizdə tarixi, dini, dünya əhəmiyyətli mədəniyyət abidələri, ziyarətgah və qəbiristanlıq, İslam, xristian və yəhudi məbədləri dağıdıldı.

Azərbaycan dövləti azad edilmiş torpaqlarda multikultural dəyərlərin, bütün xalqların tarixi və dini abidələrinin qorunacağını açıqladı. Dağlıq Qarabağda yaşayan digər etnik qruplara Azərbaycan qanunvericiliyinə uyğun olaraq şərait yaradılacaq. Azərbaycan bu prinsipi əsrlər boyu tətbiq etdiyi üçün bu humanist yolu davam etdirəcək.