Monteneqronun Baş naziri əhalini elektrik enerjisi və yanacaqdan qənaətlə istifadə etməyə çağırıb

Podqoritsa, 21 iyun, AZƏRTAC

Monteneqronun Baş naziri Dritan Abazoviç ölkə vətəndaşlarını elektrik enerjisi və yanacaqdan qənaətlə istifadə etməyə çağırıb.

AZƏRTAC xəbər verir ki, hökumətin yanacağın yüksək qiymətlərinin vətəndaşlara təsirinin minimuma endirilməsi üçün əlindən gələni etdiyini bildirən Baş nazir payız fəslində ölkədə ən böyük narahatlığın təkcə enerji böhranı deyil, həm də ərzaq problemi olacağını deyib.

Vətəndaşları elektrik enerjisi və yanacaqdan qənaətlə istifadə etməyə çağıran D.Abazoviç bunun həyat tərzini dəyişmək çağırışı olmadığını, lakin bütün dünyanı çətin bir il gözlədiyini və bu proseslərin Monteneqrodan da yan keçməyəcəyini qeyd edib.

Baş nazir bildirib ki, koronavirus pandemiyası dövründə olduğu kimi, bu vəziyyətdən ən yaxşı şəkildə ağıllı siyasətlə və regional əməkdaşlıqla çıxmaq olar.

Nihad Budaqov

AZƏRTAC-ın xüsusi müxbiri

Podqoritsa