Bakı, 20 aprel, AZƏRTAC

Görkəmli sərkərdə, iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanov Ulu Öndər Heydər Əliyevin sevimli qəhrəmanlarındandır. Heydər Əliyevə görə Həzi Aslanov İkinci Dünya müharibəsində mərdliklə döyüşən, vuruşan Azərbaycan xalqının nümayəndələrindən ən görkəmlisidir. O, bu döyüşlərdə həlak olmuş, ancaq öz vətəndaşlıq borcunu yerinə yetirmiş, Azərbaycan xalqının hansı yüksək mənəvi keyfiyyətlərə malik olduğunu dünyaya nümayiş etdirmişdir.

İkinci Qarabağ müharibəsindən – Vətən müharibəsindən on ay əvvəl Həzi Aslanovun 110 illiyinin qeyd edilməsi haqqında Azərbaycan Respublikasının Prezidenti İlham Əliyevin Sərəncam verməsi heç də təsadüfi deyildir. Bu Sərəncam vasitəsilə Ulu Öndər Heydər Əliyevin ənənələrini uğurla davam etdirən Prezident, Silahlı Qüvvələrin Ali Baş Komandanı İlham Əliyev xalqa və Azərbaycan Ordusunun şəxsi heyətinə bir daha xatırladırdı ki, əsrlər boyu yadelli işğalçıların qarşısında boyun əyməyən, diz çökməyən sərkərdələrimizi, qəhrəmanlarımızı tanımadan, onların keçdikləri döyüş yolunu öyrənmədən yeni qəhrəmanlar yetişdirmək mümkün deyildir.

Belə igid oğulların sırasında general Həzi Aslanovun qəhrəmanlığın rəmzinə çevrilmiş adı dərin ehtiramla çəkilir. Dünyanın faşizmdən qurtulması uğrunda döyüşlərdə Həzi Aslanov mahir hərbi sərkərdə istedadı nümayiş etdirmiş və hərb salnaməsində yeni parlaq səhifələr açmışdır. Onun göstərdiyi misilsiz şücaət və başçılıq etdiyi tank alayının müstəsna rəşadəti torpaqlarımızın işğaldan azad edilməsinə hər an hazır olan Azərbaycan Ordusunun bütün şəxsi heyəti üçün əsl qəhrəmanlıq nümunəsidir.

Prezident Sərəncamının imzalandığı 2019-cu il 29 dekabr tarixindən başlayaraq, müdafiə naziri general-polkovnik Zakir Həsənovun təsdiq etdiyi tədbirlər planına əsasən Azərbaycan Ordusunun qoşun növü, birlik, birləşmə, hərbi hissə və xüsusi təyinatlı təhsil müəssisələrində general Həzi Aslanovun 110 illiyi ilə bağlı silsilə tədbirlər həyata keçirilir.

Bu gün Azərbaycan Ordusunda yüzlərlə, minlərlə Həzi Aslanov kimi qəhrəmanlar var və onlar hələ də 44 günlük müharibədəki uğursuzluqdan nəticə çıxarmayan düşmənin təxribatlarının qarşısını qətiyyətlə almağa hər an hazırdırlar.

Əməkdar incəsənət xadimi, Prezidentin fərdi təqaüdçüsü, Həzi Aslanov haqqında bir neçə kitabın müəllifi polkovnik Abdulla Qurbani AZƏRTAC-a bildirib ki, qəhrəman həmyerlimizin xatirəsi nəinki Azərbaycanda, o cümlədən bir çox ölkələrdə də yad edilir.

Bir neçə gün əvvəl Moskva şəhər Veteranlar Komitəsi və paytaxt azərbaycanlılarının təşəbbüsü və təşkilatçılığı ilə İttifaqlar Evinin Sütunlu Sarayında Stalinqrad döyüşlərində Qələbənin 80 illiyi münasibətilə Azərbaycanın şanlı oğlu Həzi Aslanovun xatirəsinə həsr olunmuş tədbir keçirilib.

Tədbirdə çıxış edən veteranlar və ictimaiyyət nümayəndələri görkəmli həmyerlimizin Stalinqrad döyüşlərindəki müstəsna xidmətlərindən söhbət açıb, unudulmaz sərkərdəni ehtiramla yad ediblər.

Qeyd olunub ki, Stalinqrad ətrafında gedən döyüşlərdə Həzi Aslanovun başçılığı ilə 55-ci tank briqadasının tankçıları düşmən üzərinə ağır zərbələr endirərək vuruşa-vuruşa Stalinqrad-Stalsk dəmir yolunu tutub. Faşistləri Stalinqrad qruplaşmasının əsas magistralından məhrum edərək, düşmənin xeyli qüvvəsini və texnikasını zərərsizləşdiriblər. Kotelnikovo yaxınlığında gedən döyüşlərdə Aslanovçular daha böyük şücaət göstərərək faşistlərin 30 əks-hücumunun qarşısını alıb, bir piyada taborunu, 30-dan çox tankını, 50 avtomobilini sıradan çıxarıblar. Bu döyüşlərdə göstərdiyi igidlik və şücaətə görə o vaxtlar “podpolkovnik” rütbəsində olan Həzi Aslanov 1942-ci il dekabrın 22-də Sovet İttifaqı Qəhrəmanı adına layiq görülüb.

Stalinqrad döyüşləri iştirakçılarından istefada olan tankçı polkovnik Dmitri İvanoviç Ryazançevin sevimli komandiri Həzi Aslanov haqqında kövrək xatirələri tədbir iştirakçılarına duyğulu anlar yaşadıb.

Həzi Aslanovun Stalinqrad döyüşlərindəki xidmətlərini əks etdirən sənədli videoçarx nümayiş etdirilib.

Azərbaycan Respublikası Veteranlar Təşkilatının sədri, Stalinqrad döyüşlərinin iştirakçısı Fatma Səttarova ilə videobağlantı yaradılıb. O, cəbhə xatirələrindən danışıb, Azərbaycanda müharibə veteranlarına dövlət səviyyəsində göstərilən qayğıdan bəhs edib.

Rusiya Azərbaycanlıları Federal Milli-Mədəni icmasının prezidenti Xanoğlan Əliyev çıxış edərək Azərbaycan xalqının dünya hərb tarixinə bəxş etdiyi Həzi Aslanov kimi görkəmli sərkərdənin xatirəsini əziz tutduqları üçün Moskva veteranlarına və təşkilatçılara dərin minnətdarlığını bildirib.

Kadetlər və gənc döyüşçülər tədbir iştirakçılarını salamlayıb, Həzi Aslanov haqqında şeirlər söyləyiblər. İncəsənət nümayəndələrinin ifasında müharibə illərinin mahnıları səsləndirilib.

Azərbaycan Ordusunun Sənədli və Tədris Filmləri Mərkəzinin hazırladığı videoçarx tədbir iştirakçılarının böyük marağına səbəb olub. Əməkdar incəsənət xadimi A.Qurbaninin sözlərinə tanınmış bəstəkar Azad Zahidin yazdığı Stalinqrad döyüşlərinə həsr olunmuş mahnının müşayiəti ilə təqdim olunan videoçarxda Stalinqrad döyüşlərinin fonunda Həzi Aslanovun nadir görüntüləri canlandırılıb.

Azərbaycan Prezidenti, Müzəffər Ali Baş Komandan İlham Əliyevin və Birinci vitse-prezident Mehriban Əliyevanın Həzi Aslanovun məzarını ziyarət etməsi kadrları görüntülənərkən veteranlar ayağa qalxaraq bu mənzərəni alqışlayıblar.

Videoçarxda yer alan görkəmli sərkərdənin nəvəsi, polis general-mayoru Həzi Aslanovun tədbir iştirakçılarına minnətdarlıq dolu müraciəti diqqətlə izlənilib.