Bakı, 6 noyabr, AZƏRTAC

Noyabrın 6-da Azərbaycan Dövlət Pedaqoji Universiteti (ADPU) Rusiya Dövlət Humanitar Universiteti (RDHU) ilə birgə “1917-1920-ci illərin mühacirətinin öyrənilməsinin və tədrisinin müasir meyilləri” mövzusunda beynəlxalq elmi-praktik seminar keçirib.

ADPU-dan AZƏRTAC-a bildirilib ki, beynəlxalq seminar “Vətən tarixi” Fondunun dəstəyi ilə “Rusiya mühacirətinin birinci dalğası Avropa ölkələrinin və xalqlarının tarix və mədəniyyətində” layihəsi çərçivəsində reallaşıb.

ADPU-nun rektoru, professor Cəfər Cəfərov rəhbərlik etdiyi universitetin uğurları haqqında məlumat verib. Qeyd edib ki, bu il 566 nəfər gənc 500-dən çox bal toplayaraq ali təhsil almaq üçün Pedaqoji Universiteti seçib. Bu, əvvəlki illərlə müqayisədə çox yüksək göstəricidir. 100 illik yubileyini qeyd etməyə hazırlaşan universitet ölkəmizin aparıcı ali təhsil müəssisələrindən biridir. Universitetin beynəlxalq əlaqələrindən danışan rektor RDHU ilə birgə elmi-praktik seminarın keçirilməsini yüksək dəyərləndirib.

Seminarda çıxış edən dosentlər Aleksandr Levçenkov, İrina Xanova tədbirin əhəmiyyətini vurğulayıblar. Çıxışlarda qeyd edilib ki, xarici ölkələrdə, o cümlədən Azərbaycanda mühacirət mövzusunun araşdırılmasına, öyrənilməsinə maraqlıdırlar.

Tanınmış diplomat, ictimai xadim Ramiz Abutalıbov Azərbaycan Xalq Cümhuriyyəti liderlərinin mühacirət dövrü fəaliyyətləri barədə məlumat verib.

Sosial və humanitar məsələlər üzrə prorektor, professor Fikrət Rzayev, tarix və coğrafiya fakültəsinin dekanı, dosent Şahin Pənahov və digər çıxış edənlər mühacirət mövzusunun öyrənilməsinin ictimai-siyasi fikrin zənginləşməsinə xidmət etdiyini bildiriblər. Onlar beynəlxalq elmi-praktik seminarın aktual mövzuya həsr olunduğunu qeyd edərək bu sahədə birgə əməkdaşlığın vacibliyini vurğulayıblar.

Seminarda mühacirət mövzusunun Rusiyanın və Azərbaycanın ali təhsil müəssisələrində öyrənilməsinin və tədrisinin aktual məsələləri, 1917-1920-ci illərin mühacirətinin tarixi və tarixi siyasət məsələləri barədə müzakirələr aparılıb.