REGİONLAR
Müstəqil Azərbaycan Respublikası ulu öndər Heydər Əliyevin şah əsəridir
Naxçıvan, 15 iyun, AZƏRTAC
AMEA Naxçıvan Bölməsinin və muxtar respublikadakı ali təhsil müəssisələrinin birgə təşkilatçılığı ilə “Milli Qurtuluş dövlətçilik tariximizdə” mövzusunda keçirilən tədbirdə xalqımızın ümummilli lideri Heydər Əliyevin müstəqil Azərbaycan Respublikasının gələcəyi naminə fədakarlıqla gördüyü əvəzolunmaz işlərdən, həyata keçirdiyi tədbirlərdən, müəyyənləşdirdiyi inkişaf strategiyasından bəhs olunub.
AMEA Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, tədbirdə çıxış edən AMEA Naxçıvan Bölməsinin sədri, akademik İsmayıl Hacıyev “Ulu öndər Heydər Əliyevin xilaskarlıq missiyası” mövzusunda məruzə edib. Akademik məruzəsində ötən əsrin 90-ci illərinin əvvəllərindən ölkədə mövcud olan ictimai-siyasi vəziyyətdən söz açaraq bildirib ki, həmin illərdə hökm sürən hakimiyyət böhranı, ölkənin mühüm güc strukturlarının özbaşınalığı və separatizm cəhdlərinin intensivləşməsi, əzəli torpaqlarımızın işğalı kimi mühüm problemlər xalqı bu bəlalardan xilas edəcək bir liderin gəlişini labüd edirdi. Natiq 1993-cü ilin 15 iyun tarixinin əhəmiyyətindən, dövrün və xalqın tələbi ilə hakimiyyətə gələn dahi rəhbərin həyata keçirdiyi uzaqgörən siyasət strategiyasından, Azərbaycanın gələcək inkişafına hesablanmış məqsədyönlü addımlardan danışıb. Vurğulayıb ki, daim xalqı üçün çalışan ulu öndər Heydər Əliyev ağır şəraitdə ayaqda qalmağa çalışan ölkəmizi düşdüyü acınacaqlı vəziyyətdən xilas edərək əsl xilaskarlıq missiyasını yerinə yetirdi. Atəşkəs haqqında sazişin imzalanması, balanslaşdırılmış daxili və xarici siyasətin yürüdülməsi, beynəlxalq təşkilatlarla uzunmüddətli əlaqələrin qurulması, ordu quruculuğu və həyatın digər sferalarında əsaslı islahatların aparılması, xarici investorların ölkəyə cəlb olunması həmin xilaskarlıq missiyasının aparıcı istiqamətləridir.
Qeyd olunub ki, bu missiya hazırda Heydər Əliyev ideyalarına sədaqətlə xidmət edən dövlət başçısı tərəfindən uğurla davam etdirilir. Yürüdülən düzgün siyasət nəticəsində bu gün Azərbaycan öz ərazi bütövlüyünü təmin edərək regionda qalib dövlətə çevrilib.
Naxçıvan Muxtar Respublikasında Heydər Əliyev ideyalarının müvəffəqiyyətlə davam etdirilməsindən bəhs edən akademik deyib ki, aparılan uğurlu siyasət sayəsində Azərbaycan, eləcə də onun tərkib hissəsi olan Naxçıvan Muxtar Respublikası inkişafının ən qüdrətli dövrünü yaşayır.
Naxçıvan Dövlət Universitetinin rektoru, tarix üzrə fəlsəfə doktoru, dosent Elbrus İsayev “Siyasətdə varisliyin uğurlu formulu” mövzulu məruzəsində dahi rəhbər Heydər Əliyevin sahib olduğu liderlik bacarıqlarına diqqət çəkib. Müstəqillik dövründə qazanılan inkişafdan söz açan rektor informasiya cəbhəsində, diplomatiya və beynəlxalq hüquq sahəsində qazanılan uğurlardan, Qarabağ Zəfərindən danışıb. Azərbaycanın 44 günlük Vətən müharibəsində qazandığı parlaq qələbə ilə regionda tarixi ədaləti bərpa etdiyini deyən Elbrus İsayev Zəngəzur dəhlizinin açılması ilə ölkəmizin türkdilli ölkələri nəqliyyat əlaqələri ilə birləşdirmək missiyasını uğurla icra edəcəyini və Naxçıvanın buradakı mühüm əhəmiyyətini qeyd edib.
“Qurtuluşun çətin və məşəqqətli yolları” mövzusunda məruzə ilə çıxış edən Naxçıvan Müəllimlər İnstitutunun rektoru, pedaqogika üzrə fəlsəfə doktoru, dosent Azad Novruzov Sovetlər Birliyinin dağıldığı ərəfədə xarici dövlətlərin Azərbaycanla bağlı fərqli maraqlarına diqqət çəkib. Yenicə müstəqilliyini bərpa etmiş ölkəni inkişafa istiqamətləndirmək, xalqın gələcəyi üçün islahatlar aparmaq böyük siyasi bacarıq və əsl sərkərdə cəsarəti tələb edirdi. Belə məsuliyyətli missiyanın öhdəsindən yalnız Heydər Əliyev kimi dahi gələ bilərdi.
“Bu gün milli qurtuluş ideologiyasının təntənəsi müstəqil respublikamızın davamlı inkişafında özünü büruzə verir. Ölkəmizin dünyadakı nüfuzu gündən-günə artır”. Bu fikirləri “Naxçıvan” Universitetinin rektoru, filologiya üzrə fəlsəfə doktoru, dosent Nurlana Əliyeva “Qurtuluşdan başlanan inkişaf strategiyası” mövzulu məruzəsində səsləndirib. Rektor 15 İyun tarixini müstəqil Azərbaycan dövlətinin inkişafının yeni mərhələsinə qədəm qoyduğu gün kimi xarakterizə edib, ordu quruculuğu, iqtisadiyyat, mədəniyyət sahələrində qazanılan nailiyyətlərdən söz açıb.