REGİONLAR


Mutant pambıq toxumları əkilib

Bitki Mühafizə və Texniki Bitkilər Elmi-Tədqiqat İnstitutunda xəstəliklərə davamlı yeni məhsuldar pambıq sortları yaradılacaq

Gəncə, 11 iyul, Rauf Hacıyev, AZƏRTAC

Bitki Mühafizə və Texniki Bitkilər Elmi-Tədqiqat İnstitutunun apardığı tədqiqatlarla respublikada xəstəliklərə davamlı yeni məhsuldar pambıq sortları yaradılacaq.

AZƏRTAC-ın bölgə müxbiri xəbər verir ki, bu məqsədlə pambıq bitkisində xəstəliklərə, quraqlığa, şoranlığa davamlı yeni mutant xətlərin alınması üzrə Ucar rayon Şirvan Təcrübə Stansiyasında və Samux Təcrübə Stansiyasında sınaqlara başlanılıb.

Samuxda xəstəliklərə, Ucarda isə şoranlığa və quraqlığa davamlı sortların alınması üzrə tədqiqat işləri aparılır. Bunun üçün toxumlar Radiasiya Problemləri İnstitutunda 3 dozada şüalandırılaraq sahələrə əkilib. Proses zamanı heç bir dərmandan istifadə edilməyib. Artıq mutant toxumlar üzrə ilkin nəticələr var.

İnstitutun aparıcı elmi işçisi Nizami Hüseynov bildirib ki, “Gəncə-78” və “Gəncə-80” sortlarında hər variantda, 3 dozada (150, 300, 450 qrey) tədqiqat işlərinə başlanılıb. Şüanın çoxluğundan 450 qrey toxumun rüşeymində müəyyən dəyişikliklər olub. Ona görə də, hazırda bitkidə çıxış zəifdir. Lakin, bu, normal sayılır. Növbəti tədqiqat ilində isə həmin sahələrdən götürülmüş toxumlar ikinci nəsil olaraq, yenə həmin sahələrə əkiləcək. Artıq seleksiya prosesi göstərir ki, 8-10 ilə bu sahədə nəticə almaq mümkündür. Analoji üsul daha əvvəl Türkiyə, Yunanıstan və Pakistanda tətbiq olunub və müsbət nəticələr əldə edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.