SİYASƏT
Müvəqqəti işlər vəkili : Ermənistanın İraqdakı səfirinin isteriyası bu ölkənin Azərbaycana qarşı qarayaxma cəhdlərinin hüdudunun olmadığını göstərir
Bağdad 6 may, AZƏRTAC
Ermənistanın İraqdakı səfirinin Bakıdakı Hərbi qənimətlər Parkı ilə əlaqədar “Azzaman” qəzetində və nəşrin saytında dərc etdirdiyi məqaləyə Azərbaycanın bu ölkədəki müvəqqəti işlər vəkili Nəsir Məmmədov cavab verib.
AZƏRTAC xəbər verir ki, N.Məmmədov cavabında dünya təcrübəsinə istinad edib və Ermənistanın nifrət siyasətini davam etdirdiyini bildirib.
Qeyd olunub ki, paytaxtı Bakı şəhərində Hərbi Qənimətlər Parkının açılışı, orada 44 günlük Vətən müharibəsi zamanı Ermənistandan qənimət götürülmüş və məhv edilmiş texnikanın nümayişi ilə bağlı Ermənistanın İraqdakı səfirinin isteriyası bu ölkənin Azərbaycana qarşı qarayaxma cəhdlərinin heç bir hüdudunun olmadığını göstərir.
Dünya təcrübəsində də geniş şəkildə qəbul olunduğu kimi, bu şanlı Zəfərin paradlar, parklar, muzeylər və digər vasitələrlə əbədiləşdirilməsi bizim mənəvi haqqımızdır. Parkda müharibə iştirakçısı olan erməni hərbçilərinin manekenlərinin sərgilənməsinə gəldikdə, dünyanın bir çox ölkələrində hərbi muzeylərdə manekenlərin nümayiş etdirilməsi təcrübəsi mövcuddur. Parkın və orada sərgilənən kompozisiyaların verdiyi mesaj birmənalıdır: dövlətə qarşı həyata keçirilən təcavüz siyasəti və qanunsuz işğal üzərində çalınan böyük Qələbə beynəlxalq hüququn təntənəsidir.
Azad edilmiş ərazilərimizdə Ermənistan tərəfindən dövlət səviyyəsində törədilən məqsədyönlü dağıntı və talan siyasətinin nəticələri bu gün bütün dünyanın gözləri qarşısındadır. Tarixi, mədəni, dini irsimizi yerlə-yeksan edən, təbii ehtiyatlarımızı talayan, bir milyon insanın fundamental hüquqlarını pozaraq 30 il ərzində mülkiyyətini mənimsəyən bir ölkənin talançılıqdan danışması heç bir çərçivəyə sığmır. Faşist cəlladı Qaregin Njdeyə Yerevanda heykəl ucaldan, Birinci Qarabağ müharibəsi zamanı əli azərbaycanlıların qanına bulaşan beynəlxalq terrorçu Monte Melkonyanı qəhrəmanlaşdıran, terrorçu Soqomon Teyliryana ayaqları altında kəsilmiş insan başı ilə abidə ucaldan bir ölkənin səfirinin onlara qarşı nifrətdən danışmağa heç bir haqqı yoxdur.
Müvəqqəti işlər vəkili Ermənistan tərəfinin hər fürsətdə dilə gətirdiyi “hərbi əsirlər” mövzusuna da toxunub. O deyib: “Bir daha bu səfirə yalan və iftira dolu ritorikadan çəkinməyi məsləhət görürük. Ermənistan hökumətinin də imza atdığı üçtərəfli Bəyanatdan bir ay sonra Azərbaycan ərazilərinə terrorçuluq məqsədilə göndərilən diversant qrupun üzvləri “hərbi əsir” hesab oluna bilməz, bunu dəfələrlə bəyan etmişik. Azərbaycan hər zaman öz öhdəliklərinə sadiqdir, 2020-ci il 10 noyabr tarixli Birgə Bəyanatın icrası ilə bağlı bütün tədbirləri həyata keçirir, o cümlədən erməni hərbi əsirləri qısa müddət ərzində qarşı tərəfə qaytarıb.
Ermənistanın isə üçtərəfli razılığa zidd olaraq, pozucu fəaliyyəti ilə bağlı üzrxahlıq bildirmək əvəzinə, əsassız iddialarla çıxış etməsi, Azərbaycana qarşı yalan və iftira dolu kampaniya aparması bu ölkənin hələ də düşmənçilik mövqeyində qaldığını, beynəlxalq hüquq əsasında münasibətlərin normallaşdırılmasına hazır olmadığını və beləliklə, yaxın keçmişdə baş verənlərdən nəticə çıxarmadığını göstərir”.
Rabil Kətanov
AZƏRTAC-ın xüsusi müxbiri
Bağdad