CƏMİYYƏT


Muxtar Babayev: rəqəmsal kənd təsərrüfatı artan su tələbatını ödəmək üçün çox vacib əhəmiyyət daşıyır

Bakı, 6 may, AZƏRTAC

Tarixən kənd təsərrüfatı Azərbaycanda strateji bir sektor olub. Bu, bizim iqtisadi inkişafımızda çox vacib rol oynayır. Bu gün rəqəmsal kənd təsərrüfatına keçid nəinki kənd təsərrüfatının inkişafı üçün vacib bir addımdır, həmçinin gələcəkdə ərzaq bazarı və onun istehlakı üçün də vacib əhəmiyyət daşıyır. Bu, həmçinin gələcəkdə inklüziv kənd təsərrüfatının ətraf mühitlə birgə nəzərə alınmasında vacib bir prosesin başlanğıcıdır.

Kənd təsərrüfatı, həmçinin su istehlakını özündə ehtiva edir, o cümlədən təbii resurslardan dayanıqlı istifadə üçün məlumatı tələb edir. Azərbaycan su qıtlığından əziyyət çəkən ölkələrdən biridir. Gələcəkdə artan su tələbatını ödəmək üçün rəqəmsal kənd təsərrüfatı çox vacib əhəmiyyət daşıyır. Biz elektron su informasiya sisteminə mərkəzləşdirilmiş və rəqəmsallaşdırılmış bir bölüm kimi baxmağa davam edirik.

AZƏRTAC xəbər verir ki, bunu ekologiya və təbii sərvətlər naziri Muxtar Babayev "Gələcəyə baxış: rəqəmsal kənd təsərrüfatına keçid" beynəlxalq konfransında deyib.

Nazir bildirib ki, iqlim dəyişikliyi, o cümlədən su itkisinə yol verilməsi torpağın deqradasiya və eroziyasına səbəb olub. Buna görə də suyun səmərəli istifadə edilməsi texnologiyası və kənd təsərrüfatı torpaqlarının düzgün istifadə edilməsi çox vacib əhəmiyyət daşıyır: "Həmin sektorun müqavimətini təmin etmək üçün erkən xəbərdarlıq sistemlərini yaratmışıq. Bu sistemlər xüsusilə də təhlükəli meteohadisələrin qarşısını almağa da xidmət edir. Bu vacib sektorun dayanıqlılığını təmin etmək məqsədilə Ekologiya və Təbii Sərvətlər Nazirliyi Kənd Təsərrüfatı Nazirliyi ilə birlikdə işləyir. Yaşıl kənd təsərrüfatına dəstək verilməsi üçün birgə fəaliyyət planı hazırlanıb və hazırda həmin plan istifadə edilməkdədir.

Bizim torpaqların işğaldan azad edilməsi bu sektorun inkişafında yeni bir mərhələ olub. Ermənistan tərəfindən torpaqlarımızın bir hissəsinin 30 il ərzində işğalda saxlanılması bizim meşələrə, biomüxtəlifliyə, su resurslarına mənfi təsir edib. Azərbaycan azad edilmiş ərazilərdə meşəbərpa tədbirlərini həyata keçirməyi qarşısına məqsəd qoyub. Bu da iqlim dəyişikliyi və torpaq deqradasiyasının qarşısının alınmasına yönəlib".

Muxtar Babayev ötən il noyabrda Şotlandiyanın Qlazqo şəhərində keçirilən BMT-nin İqlim Dəyişikliyi üzrə Çərçivə Konvensiyasının 26-cı konfransında Azərbaycanın azad edilmiş ərazilərdə 2050-ci ilə qədər "netto sıfır emissiya" zonasının yaradılması planını bəyan etdiyini də diqqətə çatdırıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.