REGİONLAR


Muxtar respublika sakinlərə dayanıqlı rabitə və internet xidmətləri göstərilir

Naxçıvan, 12 noyabr, AZƏRTAC

Naxçıvan Muxtar Respublikası Rabitə və Yeni Texnologiyalar Nazirliyində payız-qış mövsümünün uğurla başa vurulması məqsədilə görülən işlər müzakirə olunub.

Nazirlikdən AZƏRTAC-ın Naxçıvan bürosuna bildirilib ki, tədbirdə çıxış edən Naxçıvan Muxtar Respublikası rabitə və yeni texnologiyalar nazirinin müavini Həbib Novruzov Naxçıvan Muxtar Respublikasında 2020-2021-ci illərin payız-qış mövsümünə hazırlıq və qarşıda duran vəzifələrlə əlaqədar keçirilən müşavirədə nazirliyə yaşayış məntəqələrində sakinlərə kəsintisiz rabitə və internet xidmətlərinin göstərilməsinə diqqətin artırılması, mal-material ehtiyatının yaradılması barədə tapşırıqlar verildiyini bildirib.

Qeyd olunub ki, həmin tapşırıqların icrası ilə bağlı qarşıda duran vəzifələr müəyyənləşdirilib, “Tədbirlər Planı” hazırlanaraq təsdiq olunub, tabe qurumların bu sahədə fəaliyyəti müəyyənləşdirilib.

Sonra Nахçıvаn Muхtаr Rеspublikаsı fövqəlаdə hаllаr nаzirliyinin şöbə rəisi, polkovnik Emin Qasımov tədbir iştirakçılarına nazirlikdə və tabe qurumlarında mülki müdafiə hazırlığının təşkilinə və tədbirlərin keçirilməsinə diqqətin artırılması, vəzifəli şəxslər tərəfindən mülki müdafiə, fövqəladə hallardan qorunma və yanğın təhlükəsizliyinin təmin olunması sahəsində müəyyən olunmuş qaydaların yerinə yetirilməsi, payız-qış mövsümünü təhlükəsiz keçirmək üçün məişətdə istifadə olunan qaz təsərrüfatı və elektrik cihazlarından düzgün istifadə, istismar qaydaları, həmçinin dəm qazının yaranma səbəbləri və ondan mühafizə üsulları barədə məlumat verib.

Rabitə və yeni texnologiyalar nazirliyinin aparat rəhbəri Əziz Hümbətov bildirib ki, muxtar respublika əhalisinə kəsintisiz rabitə və internet xidmətlərinin göstərilməsi məqsədilə mal-material ehtiyatının yaradılması başa çatdırılıb, rabitə mütəxəssisləri mövsümə uyğun geyimlə təmin olunublar. Bunlarla yanaşı, avtomat telefon stansiyalarında istismar olunan qurğulara, o cümlədən generatorlara və akkumulyatorlara texniki baxış keçirilir, aşkar olunan çatışmazlıqlar qısa müddət ərzində aradan qaldırılır. Həmçinin rayon (şəhər) rabitə idarələri tərəfindən yerlərdə xətt təsərrüfatının vəziyyəti təhlil edilir, müəyyən edilmiş müxtəlif tutumlu yararsız kabel və dayaqlar yeniləri ilə əvəz olunur.

Avtomat telefon stansiyalarının fasiləsiz fəaliyyəti üçün müvafiq yanacaq ehtiyatının yaradılması da diqqət mərkəzində saxlanılır.

Qeyd olunub ki, qazanxana və istilik sistemləri üzrə yeni ixtisaslı kadrların hazırlanması üçün müvafiq peşə kurslarında onların iştirakı təmin edilib, peşə kursu keçmiş və sertifikat almış ocaqçıların işlə təmin olunması nəzərdə tutulur.

Eyni zamanda, nazirlikdə və tabe qurumlarda yanğın təhlükəsizliyi ilə bağlı tədbirlər də ardıcıllıqla davam etdirilir. Bunlarla yanaşı, səlahiyyətli nümayəndələr tərəfindən Rabitə və Yeni Texnologiyalar Nazirliyi və tabeliyində olan qurumların inzibati binalarına baxış təşkil olunub, istilik, su və kanalizasiya xətlərinin istismara yararlılığı araşdırılıb, nasazlıq aşkar edilməyib.

Fövqəlаdə Hаllаr Nаzirliyinin əməkdaşları Azadə Cəfərova və Afaq Alməmmədova dəm qazı ilə zəhərlənmə zamanı davranış və fəaliyyət qaydaları haqqında tədbir iştirakçılarına ətraflı məlumat veriblər.

Tədbirin sonunda iştirakçıların sualları cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.