REGİONLAR
Muxtar respublikada 124 min hektardan çox əkin sahəsi su ilə təmin olunub
Naxçıvan, 27 iyul, AZƏRTAC
Bu ilin ötən dövründə muxtar respublika ərazisindəki 303,5 milyon kubmetr su tutumuna malik olan sututarlara 195 milyon kubmetr su ehtiyatı toplanıb. Su istifadəçilərinə mexaniki üsulla və öz axımı ilə 148,1 milyon kubmetr suvarma suyu verilib, təkrar suvarma nəzərə alınmaqla 124 min 8 hektar əkin sahəsi su ilə təmin olunub.
AZƏRTAC-ın Naxçıvan bürosu xəbər verir ki, bu faktlar Naxçıvan Muxtar Respublikası Dövlət Meliorasiya və Su Təsərrüfatı Komitəsində keçirilmiş kollegiya iclasında səsləndirilib.
İclasda çıxış edən komitə sədri Əsgər Əsgərov bildirib ki, hesabat dövründə komitə tərəfindən muxtar respublikada torpaq sahələrində su təminatının yaxşılaşdırılması, suvarılan torpaq sahələrinin genişləndirilməsi, yeni torpaq sahələrinin əkin dövriyyəsinə qatılması, su itkisinin qarşısının alınması üçün mühüm tədbirlər həyata keçirilib, mütərəqqi suvarma metodlarının tətbiqinə üstünlük verilib.
“Kəngərli rayonunun Böyükdüz kəndi ərazisində 600 hektar sahədə qapalı suvarma şəbəkəsinin tikintisi davam etdirilib, ümumilikdə, 2018-ci ilin birinci yarısında muxtar respublika ərazisində 35,7 kilometr yeni suvarma boru xətti çəkilib, 12,7 kilometr suvarma boru xətti əsaslı təmir olunub. 2018-ci ilin birinci yarısında muxtar respublika üzrə 161,9 kilometr beton və torpaq kanal, 197,5 kilometr ara arxlar lildən təmizlənib” – deyən Əsgər Əsgərov vurğulayıb ki, yeni torpaq sahələrinin əkin dövriyyəsinə daxil edilməsi məqsədilə Kəngərli rayonunun Böyükdüz kəndi ərazisində 39,5 hektar sahə, Sədərək rayonunda Dəhnə adlanan ərazidə 8 hektar sahə hamarlanaraq əkin üçün yararlı vəziyyətə gətirilib.
Bildirilib ki, suvarma və içməli su təminatında qədim hidrotexniki qurğular olan kəhrizlərdən də geniş istifadə edilir. Belə ki, bu gün muxtar respublikanın şəhər və rayonlarında 332 kəhriz istismar olunmaqdadır. 2018-ci ilin ilk yarısında 8 kəhrizin təmir-bərpası bitib və təmir-bərpası aparılan 5 kəhrizdə işlər davam etdirilib.
Qeyd olunub ki, “Şəhər Su Təchizatı və Kanalizasiya İnvestisiya Proqramı” layihəsi çərçivəsində 2018-ci ilin birinci yarısında Babək rayonunun Şəkərabad kəndində görülən işlər nəticəsində 5 min sakin fasiləsiz olaraq təmiz içməli su ilə təmin olunub. “Rayon mərkəzi və ətraf kəndlərin içməli su təchizatı və kanalizasiya sistemlərinin yenidən qurulması” layihəsi çərçivəsində Şahbuz şəhər çirkab sutəmizləyici qurğuda 220 metr istinad divarı tikilib, hovuz ətrafına 180 metr drenaj xətti çəkilib. Şərur rayonunun Yengicə kəndində 29,2 kilometr su xətti çəkilib, 4 ədəd yanğın hidrantı quraşdırılıb, 860 ev birləşməsi aparılıb. Ordubadda isə 6 su anbarının tikintisi başa çatdırılıb, 73,5 kilometr su, 72,1 kilometr kanalizasiya xətləri çəkilib, 3211 ədəd ev birləşməsi, 3207 kanalizasiya bağlantısı aparılıb.
Sonra qarşıdakı dövr üçün vəzifələr diqqətə çatdırılıb, su ehtiyatlarından səmərəli istifadə ilə bağlı tapşırıqlar verilib.