REGİONLAR


Muxtar respublikada fövqəladə hallara hazırlıq işləri davam etdirilir

Naxçıvan, 24 noyabr, AZƏRTAC 

Oktyabr ayında muxtar respublikada qəza və hadisələrin baş vеrməməsi üçün 14 оbyеktdə texniki təhlükəsizliyə əməl olunması yоxlanılıb, 6 müəssisədə aşkar edilmiş nöqsanlar aradan qaldırılıb.

Naxçıvan Muxtar Respublikası Fövqəladə Hallar Nazirliyindən AZƏRTAC-ın Naxçıvan bürosuna bildirilib ki, “Naxçıvan Duz İstehsalı” Məhdud Məsuliyyətli Cəmiyyətində yeni istismara veriləcək şaxtada aparılan işlərdə texniki təhlükəsizliyin vəziyyəti, habelə Sədərək gömrük-keçid məntəqəsində tikilən tuneldə elektrik və şəbəkə kabellərinin çəkilməsi, radiasiya aşkar edən portal monitorların quraşdırılması zamanı texniki və yanğın təhlükəsizliyi tələblərinin həyata keçirilməsi vaxtaşırı yoxlanılıb. 7 təhlükə potensiallı obyektdə texniki təhlükəsizlik tələblərinə əməl olunmasına, Naxçıvan şəhəri 49-cu məhəllədə inşa edilən yaşayış binalarında istismar edilən qülləli kranın və 14 sərnişin liftinin təhlükəsiz istismar edilməsinə nəzarət olunub. 4 müəssisədə 10 qurğu sınaqdan keçirilərək texniki təhlükəsizlik sertifikatı verilib, 10 texnoloji nəqliyyat vasitəsi dövlət qeydiyyatından keçirilərək dövlət nömrə nişanı və texniki pasportla təmin edilib, 42 texnoloji nəqliyyat vasitəsi 2020-ci il üçün texniki baxışdan keçirilib. 8 təhlükə potensiallı obyektdə mühafizə işinin təşkili yoxlanılıb, 11 müəssisədə 213 nəfər işçinin iştirakı ilə maarifləndirmə işi aparılıb.

Fövqəladə hallarda fəaliyyəti zəruri olan 13 xəstəxanada, 10 rabitə, 26 energetika, 4 qaz təchizatı və 8 sənaye obyektində fövqəladə hallara hazırlığın vəziyyəti təkrar yoxlanılıb, 14 obyektdə aşkar olunmuş nöqsanların aradan qaldırılması istiqamətində tədbirlər görülüb. 24 ümumtəhsil məktəbində mülki müdafiə üzrə sənədlər toplusunun icra vəziyyəti yoxlanılıb, 13 obyektdə mülki müdafiə sahəsində sənədlərin işlənilməsinə metodik köməklik göstərilib.

Muxtar respublikada pandemiyaya qarşı dezinfeksiya tədbirləri davam etdirilərək şəhər və rayonlarda küçələr, prospektlər, döngələr və səkilər daxil olmaqla, ümumilikdə, 4 milyon 674 min kvadratmetr sahə, 207 müxtəlif təyinatlı obyektin ərazisi, 92 yaşayış binasının girişi və ətrafı, 30 yaşayış binasının zirzəmisi, uşaq əyləncə yerləri, 2 yeraltı dayanacaq, 2 yerüstü və 1 yeraltı keçid, 4 hərbi hissənin ərazisi, 2 hərbi şəhərcik, 13 mərasim evi, 12 məscid, 15 muzey və dini ziyarət yerləri, istirahət parkları, qəbiristanlıqlar, 16 inzibati ərazi dairəsi üzrə nümayəndəliyin həyəti, 17 ticarət və xidmət mərkəzinin ətrafı dezinfeksiya olunub. Dezinfeksiya tədbirlərinə Fövqəladə Hallar Nazirliyinin 11 yanğın avtomobili, Dövlət Baytarlıq Xidmətinin 7 dezinfeksiya avtomobili və ümumilikdə, 85 nəfər şəxsi heyət cəlb olunub.

Muxtar respublikada yanğın təhlükəsizliyinin etibarlı təmin olunması məqsədilə 103 obyektdə diqqətli, 198 obyektdə nəzəri, 6 obyektdə məqsədli yanğın-texniki müayinə aparılıb, pаyız-qış mövsümünə hazırlıqlа bağlı 772 qazanxanada texniki və yanğın təhlükəsizliyi tədbirlərinə əməl olunmasına nəzarət edilib. Kənd yaşayış məntəqələrində 3904 yaşayış evinə baxış keçirilib, standarta uyğun olmayan 36 elektrik xətti, 133 şlanqla çəkilmiş qaz xətti dəyişdirilib, 6 suqızdırıcının və 119 tezqatlanan tüstü borusunun istismarı dayandırılıb.

Aid dövlət orqanları ilə birlikdə standarta uyğun olmayan və sənaye üsulu ilə hazırlanmayan qızdırıcı elektrik və qaz cihazlarının istismarına yol verilməməsi üçün ticarət obyektlərinin sahibkarları ilə görüşlər keçirilib və onlara bildirişlər təqdim edilib. Daşınmaz əmlakın icbari sığortası ilə bağlı sahibkarlıq subyektlərində izahat işləri aparılaraq 57 obyektlə icbari sığorta müqaviləsinin bağlanılmasına əməli köməklik göstərilib.

Peşə məktəblərində 267 nəfərin qazanxana maşinisti peşə ixtisası kurslarına cəlb olunması üçün maarifləndirmə işi aparılıb, bu müdavimlərlə elektrik avadanlıqları, yanğın təhlükəsizliyinə nəzarət və əməyin mühafizəsi fənləri üzrə təyin olunmuş dərslərin keçilməsi təmin edilib.

Dövlət Tikintidə Təhlükəsizliyə Nəzarət İdarəsi tərəfindən tikintisi başa çatmış 4 obyektin istismara hazırlığı yoxlanılaraq istismara hazırlıq aktı verilib, mühəndis-geoloji, beton və sement laboratoriyasında yeni tikilən obyektlərin ərazisindən qrunt nümunələri götürülərək onların fiziki-mexaniki xüsusiyyətləri araşdırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.