REGİONLAR


Muxtar respublikada gənclərin təşkilatlanması və fəaliyyəti üçün hərtərəfli şərait yaradılıb

Naxçıvan, 13 oktyabr, AZƏRTAC

Muxtar respublikada gəncliyə göstərilən dövlət qayğısı etibarlı gələcəyimizə xidmət edir. Görülən işlərin nəticəsidir ki, Naxçıvan şəhəri 2018-ci il üçün ölkəmizin Gənclər Paytaxtı seçilib.

AZƏRTAC-ın Naxçıvan bürosu xəbər verir ki, bu fikirlər Naxçıvan şəhərinin 2018-ci il ölkəmizin Gənclər Paytaxtı seçilməsi ilə əlaqədar ali və orta ixtisas təhsili müəssisələrinin birinci kursunda təhsil alan tələbələrlə “Gələcəyə doğru” layihəsi çərçivəsində keçirilən görüşdə səsləndirilib.

Görüş Naxçıvan Muxtar Respublikası Gənclər və İdman Nazirliyi, Yeni Azərbaycan Partiyası Naxçıvan Muxtar Respublika Təşkilatının İcra Katibliyi və təşkilatın Heydər Əliyev adına Gənclər Birliyi tərəfindən təşkil olunub.

Tədbirdə Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsi müdirinin müavini Sahir Rüstəmov çıxış edərək bildirib ki, Naxçıvan Muxtar Respublikası Ali Məclisi Sədrinin diqqət və qayğısı ilə muxtar respublikada gənclik mərkəzləri, elektron kitabxanalar, mədəniyyət evləri, ali və orta ixtisas təhsili müəssisələri üçün yeni tədris korpusları, olimpiya-idman kompleksləri, idman mərkəzləri tikilərək gənclərin istifadəsinə verilib. Gənc istedadlar dövlət qayğısı ilə əhatə olunub. Dövlət idarəçiliyinin bütün sahələrində gənclər irəli çəkilir. Muxtar respublikada gənclərin təşkilatlanması və fəaliyyəti üçün hərtərəfli şərait yaradılıb. Gənclərlə iş sahəsində muxtar respublikada Gənclər və İdman Nazirliyi, Gənclər Fondu, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi, partiyanın şəhər və rayon təşkilatlarının gənclər birlikləri, ali və orta ixtisas təhsili müəssisələrində tələbə-gənclər təşkilatları fəaliyyət göstərir.

Sahir Rüstəmov vurğulayıb ki, Naxçıvan şəhərinin 2018-ci il üçün ölkəmizin Gənclər Paytaxtı seçilməsi ilə bağlı hazırlanmış tədbirlər planına uyğun olaraq, Naxçıvan şəhərində “Hünər” XII vətənpərvərlik mahnıları festivalı keçirilib, gənclərin qış və yay məktəbləri, “Qurtuluşdan Əlincəqalaya” devizi altında yürüş, “Azərbaycançılıq və gənclik” adlı təbliğat kampaniyası təşkil edilib, muxtar respublikanın şəhər və rayonlarında “Gənclər bağı” salınıb. Gənclərin Azərbaycana layiqli vətəndaş kimi yetişmələrinin qarşıda duran əsas vəzifə olduğunu vurğulayan Sahir Rüstəmov “Gələcəyə doğru” layihəsinin bu baxımdan faydalı olacağını bildirib, gənclərə uğurlar arzulayıb.

Naxçıvan Muxtar Respublikası gənclər və idman naziri Azad Cabbarov diqqətə çatdırıb ki, Azərbaycan gənclərinin aparıcı qüvvə kimi formalaşmasında dövlətimizin gənclər siyasətinin mühüm rolu var. Bu siyasətin banisi isə xalqımızın ümummilli lideri Heydər Əliyevdir. Ulu Öndərin ideyalarını və irəli sürdüyü prinsipləri əsas götürən dövlət başçısının həyata keçirdiyi dövlət gənclər siyasəti nəticəsində gənclərimiz cəmiyyətimizin inkişafında fəal sosial təbəqəyə çevriliblər.

“Bu gün muxtar respublikada məşğul əhalinin əksəriyyətini təşkil edən gənclər hərtərəfli diqqət və qayğı ilə əhatə olunub. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında gənc istedadlara dövlət qayğısının artırılması haqqında” Fərmanı gənclərə göstərilən diqqət və qayğının məntiqi davamıdır. Bu fərmanla Naxçıvan Muxtar Respublikası Gənc İstedadlarının “Qızıl kitabı” təsis olunub, idman və yaradıcılıq sahəsində fərqlənən istedadlı gənclərin adları həmin kitaba daxil edilib” – deyən nazir vurğulayıb ki, muxtar respublikada hər zaman diqqətdə saxlanılan məsələlərdən biri də savadlı, təhsilli gənclərin yetişdirilməsidir. Bu gün burada fəaliyyət göstərən ali və orta ixtisas təhsili müəssisələri müasir dünya təhsil standartlarına cavab verir. Muxtar respublika gəncləri bu gün göstərilən qayğıya cavab olaraq özlərini cəmiyyətin ən layiqli təbəqəsi kimi formalaşdırmağa, dövlətçiliyimizin möhkəmləndirilməsi və ölkəmizin inkişafında potensial imkanlarını səfərbər etməyə çalışırlar.

Yeni Azərbaycan Partiyası (YAP) Naxçıvan Muxtar Respublika Təşkilatının icra katibi Anar İbrahimov çıxışında partiyanın cəmiyyətimizdəki mövqeyi və siyasi sistemdəki rolu barədə tələbələrə məlumat verib. Qeyd edilib ki, hazırda YAP Naxçıvan Muxtar Respublika Təşkilatında 54 min 611 nəfər partiya üzvü birləşib. Partiya üzvlərinin 41 faizə yaxını gənclər, onlardan 4515 nəfəri isə tələbədir. Bu rəqəm onu göstərir ki, gənclər indiki siyasi iqtidara inanır və onun siyasi təşkilatı olan YAP-ı özünün siyasi və ictimai ifadəsinin əsas vasitəsi kimi görür. YAP Naxçıvan Muxtar Respublika Təşkilatının Sədri Vasif Talıbovun rəhbərliyi ilə muxtar respublikada həyata keçirilən hər bir tədbir, təşəbbüs bu partiyanın adı ilə bağlıdır.

2018-ci ildə qəbul imtahanlarından yüksək bal toplayan Zübeydə Zeynalova çıxış edərək muxtar respublikada gənclərə göstərilən diqqət və qayğıya görə minnətdarlığını bildirib.

Sonra muxtar respublikada həyata keçirilən gənclər siyasəti ilə bağlı slayd nümayiş etdirilib, Naxçıvan Dövlət Televiziyasının hazırladığı qısametrajlı film göstərilib.

Tədbirdə Gənclər və İdman Nazirliyi tərəfindən sosial şəbəkələrdə keçirilən “Naxçıvan Gənclər Paytaxtıdır” mövzusunda gənclər arasında fotomüsabiqənin qalibləri mükafatlandırılıblar.

“Gələcəyə doğru” layihəsi adı altında görüş konsert proqramı ilə davam etdirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.