REGİONLAR


Muxtar respublikada taxıl zəmilərindən 107 min 418 ton məhsul götürülüb

Naxçıvan, 3 avqust, AZƏRTAC

Muxtar respublikada taxıl zəmilərindən 107 min 418 ton yüksəkkeyfiyyətli taxıl götürülüb. Sahələrdən hektarın orta məhsuldarlığı 32,1 sentner təşkil edib. Müvafiq olaraq bu rəqəmlər ötən il 31,6 sentner və 103 min 372 ton olub.

AZƏRTAC-ın Naxçıvan bürosu xəbər verir ki, ötən ilin payızında və cari ilin yazında muxtar respublikada 33 min 466 hektar sahədə taxıl əkilib. Bu, əvvəlki illə müqayisədə 745 hektar çoxdur. Mövsüm boyu əkin sahələrinə göstərilən aqrotexniki qulluq öz bəhrəsini verib. Əvvəlcədən həyata keçirilən hazırlıq tədbirləri, torpaq mülkiyyətçiləri, mexanizatorlar arasında aparılan maarifləndirici tədbirlər yeni nəticəyə nail olunmasında başlıca rol oynayıb.

Müxtəlif təsərrüfat sahələrinin inkişafında mühüm rol oynayan və muxtar respublikanın ən böyük bölgəsi kimi tanınan Şərur rayonunda hər il taxılçılıqda yüksək məhsuldarlığa nail olunur. Bu il də bölgə taxılçılarının zəhməti hədər getməyib. Rayon taxıl tədarükündə birinci yerə çıxıb. Belə ki, 4 min 38 hektar sahədən məhsuldarlıq 40,8 sentner olmaqla, 16 min 484 ton taxıl tədarük edilib.

Bu il də Sədərək rayonu ikinci yerdə qərarlaşıb. Belə ki, cari ildə 2 min 441 hektar sahə taxılçıların zəhmətini yerə vurmayıb: sərhəd bölgəsində 8 min 941 ton məhsul yığılıb, məhsuldarlıq 36,6 sentner olub.

Taxılçılıqda qazanılan zəngin təcrübə Babək rayonunda da özünü göstərib. Qeyd edək ki, hər təsərrüfat ilini uğurla başa vuran rayonun taxılçıları 2022-ci ilin məhsulu üçün muxtar respublika üzrə əkin sahəsinin həcminə görə ilk yerdə olmaqla, yəni 11 min 94 hektar taxıl zəmisindən 35 min 308 ton məhsul əldə ediblər. Bu isə orta məhsuldarlığın 31,8 sentner olması deməkdir.

Cari ilin məhsulu üçün Kəngərli rayonunun taxılçıları 6 min 56 hektar sahə ayırmışdılar. Torpaq mülkiyyətçiləri sahələrdən 18 min 64 ton məhsul tədarük etməklə mövsümü başa vurub, 29,8 sentner məhsuldarlığa nail olublar.

Digər yerlərdə Culfa, Ordubad rayonları, Naxçıvan şəhəri və Şahbuz rayonu qərarlaşıb. Qazanılan uğurların təməlində duran başlıca amil isə, təbii ki, dinamik xarakter alan dövlət qayğısıdır. Belə ki, muxtar respublikaya müasir kənd təsərrüfatı texnikalarının gətirilməsi, meliorasiya və irriqasiya tədbirlərinin həyata keçirilməsi, taxılçıların yüksək reproduksiyalı toxum və gübrələrlə təmin edilməsi bu sahənin inkişafını təmin edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.