REGİONLAR
Muxtar respublikada uşaqlarla bağlı müsbət statistika aparılan uğurlu sosial siyasətin nəticəsidir
Naxçıvan, 18 noyabr, AZƏRTAC
Muxtar respublikada aparılan uğurlu sosial-iqtisadi siyasət əhalinin güzəranının yaxşılaşmasına, məskunlaşmanın sıx dinamikasına əsas yaradıb. Əhali sağlamlığının və rifahının davamlı yüksəlişi, tibbi xidmətlərin keyfiyyətinin və əhatəliliyinin artırılması öz növbəsində körpə ölümləri üzrə göstəricini kəskin şəkildə aşağı salıb. Bu isə demoqrafiq vəziyyətin müsbətə doğru dəyişməsi ilə müşayiət olunmaqdadır.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, bu ilin yanvar-sentyabr aylarına olan məlumata əsasən, muxtar respublikada 165 min 652 uşaq yaşayır. Bu da ümumi muxtar respublika əhalisinin 36,80 faizini təşkil edir. Muxtar respublikada yaşayan uşaqların sayı ötən illə müqayisədə 0.08 faiz çoxdur. Cari ilin 9 ayı ərzində muxtar respublikada 3014 nəfər uşaq doğulub ki, bu da hər gün orta hesabla 8-10 körpənin dünyaya gəlişi deməkdir. Cari ilin müvafiq dövrü ərzində 12-si qızlar olmaqla, 22 əkiz uşaq dünyaya gəlib. Muxtar respublikada yaşayan uşaqlardan 81-i şəhid, 71-i hər iki valideynini itirmiş və valideyn himayəsindən məhrum olmuş uşaqlardır ki, onlardan da 36-sı hər iki valideynini itirmiş, 35-i valideyn himayəsindən məhrum olmuş uşaqlardır.
Hazırda muxtar respublikada 1880 sağlamlıq imkanları məhdud uşaq yaşayır. Qeyd edək ki, 2003-cü il təvəllüdlü 134 sağlamlıq imkanları məhdud uşaq qeydə alınmışdırsa, 2019-cu ildə bu göstərici 12, 2020-ci ildə isə bu sahədə müvafiq göstərici qeydə alınmamışdır. Mövcud statistik rəqəmlərdən də məlum olur ki, ildən-ilə sağlamlıq imkanları məhdud uşaqların sayı azalmaqdadır.
Muxtar respublikada uşaqların istedad və bacarıqlarının, intellektual biliklərinin artırılması da hər zaman diqqətdə saxlanılır. Məhz bu səbəbdən istər ölkə, istərsə də beynəlxalq yarışlarda azyaşlı və yeniyetmələr kifayət qədər uğur qazanır, onların bu uğurları lazımınca qiymətləndirilir. Hazırda ölkədaxili və ölkədənkənar bilik yarışlarının qalibi olmuş uşaqların sayı 79 olub ki, bu da ötən ilin müvafiq dövrü ilə müqayisədə 51 nəfər çoxdur. Naxçıvan Muxtar Respublikası Gənc İstedadlarının “Qızıl kitabı”na adları qeyd edilmiş uşaqların sayı isə 15 nəfərdir. Bu, ötən illə müqayisədə 36,36 faiz çoxdur.
Muxtar respublikada uşaqların təhsilinə ən yüksək səviyyədə qayğı göstərilib, bu istiqamətdə lazımi tədbirlər həyata keçirilib, ən müasir standartlara cavab verən təhsil mühiti yaradılıb. Yaradılan bu şərait ali təhsil müəssisələrinə qəbul imtahanlarında da yüksək nəticələrlə özünü göstərib. Belə ki, cari ildə ali təhsil müəssisələrinə 1621 nəfər daxil olub ki, onlardan da 261 nəfəri 500-700 intervalında bal toplayıb. Cari il ərzində orta ixtisas təhsili müəssisələrində də yüksək nəticələr əldə olunub. Belə ki, 701 şagird orta ixtisas təhsili müəssisələrinə qəbul olub. Bu da ötən illə müqayisədə 544 nəfər çoxdur.
Muxtar respublikada aparılan uğurlu dövlət uşaq siyasətinin nəticəsidir ki, burada fəaliyyət göstərən müvafiq uşaq müəssisələrində atılmış uşaq, həmçinin 18 yaşadək olan yeniyetmələr tərəfindən hüquq pozan və cinayət məsuliyyətinə cəlb olunan uşaq yoxdur. Digər müsbət göstərici isə muxtar respublikada uşaq əməyindən istifadə hallarının qeydə alınmamasıdır.
Naxçıvanın bütün sahələr üzrə davamlı inkişafı, icra olunan layihələr və atılan konkret addımlar ailə, qadın və uşaq sahəsini də əhatə etməklə, gələcəkdə daha da uğurlu, müsbət statistik göstəricilərə şahidlik etməyimizə yol açacaq.