Naxçıvan, 17 aprel, AZƏRTAC

Sığorta insanların əmlakı, həyatı, sağlamlığı, mülki məsuliyyəti, o cümlədən sahibkarlıq fəaliyyəti ilə əlaqədar olan əmlak mənafelərinin müdafiəsi sahəsində riskin ötürülməsinə əsaslanan mühüm münasibətlər sistemi kimi daim inkişaf etdirilib təkmilləşdirilir. Artıq Naxçıvan Muxtar Respublikasında 25-dən çox sığorta növü üzrə vətəndaşlara xidmətlər göstərilir.

AZƏRTAC-ın Naxçıvan bürosu xəbər verir ki, bu barədə “Naxçıvan” Universitetində sığorta fəaliyyəti və onun əhəmiyyəti mövzusunda keçirilən tədbirdə danışılıb.

Tədbirdə çıxış edən ali təhsil ocağının rektoru, professor İsmayıl Əliyev ictimai həyatın əksər sahələrində, o cümlədən iqtisadiyyatın inkişafında sığortanın rolundan söz açıb, bu istiqamətdə həyata keçirilən maarifləndirmə tədbirlərinin əhəmiyyətini qeyd edib.

Sığorta münasibətlərinin tarixi təkamülü və sığorta işinin nəzəri-iqtisadi əsasları haqqında çıxış edən universitetin İqtisadiyyat kafedrasının dosenti Əli Cabbarov cəmiyyət həyatının müxtəlif sahələrində rast gəlinən riskli halların yaratdığı maddi zərərlərin əvəzinin ödənilməsində sığortanın əhəmiyyətindən danışıb, tətbiq olunan sığorta növlərinin insanların sosial müdafiəsindəki rolunu vurğulayıb.

Tədbirdə çıxış edən Naxçıvan Muxtar Respublikası Dövlət Baş Sığorta Agentliyinin baş direktoru Hikmət Əsgərov sığortanı cəmiyyətin ümumi inkişafının nəticəsi kimi dəyərləndirib. O, muxtar respublikada sığorta işinin daha da inkişaf etdirilərək onun kütləviliyinin təmin olunmasında aparılan maarifləndirmə tədbirlərinin əhəmiyyətindən bəhs edib.

Qeyd olunub ki, bu vacib sahənin inkişafı, vətəndaşların sığortaya olan marağının artırılması istiqamətində həyata keçirilən dövlət qayğısı öz bəhrəsini verib. Bu gün muxtar respublikada reallaşdırılan uğurlu sosial-iqtisadi inkişaf strategiyasının mühüm tərkib hissəsini qəfil riskli hadisələr zamanı insanlara dəymiş zərərlərin əvəzinin ödənilməsinə yönəlmiş etibarlı sığorta sisteminin yaradılması təşkil edir.

Muxtar respublikada daşınmaz əmlakın, avtomobil nəqliyyatı sahiblərinin mülki məsuliyyətinin, habelə istehsalatda bədbəxt hadisələrdən və peşə xəstəliklərindən icbari sığorta genişləndikcə bu, əhali arasında sığorta ənənələrinin də dərinləşməsinə səbəb olur. Bundan başqa, muxtar respublikada əhalinin könüllü sığortanın müxtəlif növləri – fərdi qəza, əmlakın yanğın və digər risklərdən sığortalanması, avtonəqliyyat vasitələrinin tam sığortası və digər mühüm könüllü sığorta növlərinin əhali arasında geniş təbliğ olunması da öz bəhrəsini verməkdədir.

Bildirilib ki, gənclər sığortanın əhəmiyyətini daha dərindən dərk edərək, gələcək həyat və fəaliyyətlərində sığortaolunmaya ciddi yanaşmalı, bu sahədə fəal təbliğatçı olmalıdırlar.