REGİONLAR
Muxtar respublikanın Atıcılıq Federasiyası fəaliyyətini genişləndirir
Naxçıvan, 27 yanvar, AZƏRTAC
Muxtar respublikanın Atıcılıq Federasiyasında görülən işlər müsbət nəticələrini verməkdədir. Belə ki, ötən ilin iyun ayında Sumqayıt Paralimpiya İdman Kompleksində təşkil olunan yeniyetmələrin 12-ci respublika oyunlarında atıcılıq növündə muxtar respublikanın “Naxçıvan” komandası komanda hesabı üzrə, idmançımız Əsgər Cavadov isə şəxsi hesabda qalib adını qazanıb.
AZƏRTAC-ın Naxçıvan bürosu xəbər verir ki, bu barədə Naxçıvan Muxtar Respublikası Atıcılıq Federasiyasında 2019-cu ilin yekunları və qarşıda duran vəzifələrlə bağlı keçirilən yığıncaqda danışılıb.
Yığıncaqda çıxış edən federasiyanın sədri Səhət Həbibbəyli bildirib ki, muxtar respublikada atıcılıq idman növünün inkişaf etdirilməsi, bu sahədə kütləviliyin artırılması üçün 2019-cu ilin əvvəlində Naxçıvan Muxtar Respublikası Atıcılıq Federasiyasının tədbirlər və təqvim planı təsdiqlənib. Tədbirlər planına uyğun olaraq ötən il ərzində Naxçıvan Muxtar Respublikası Gənclər və İdman Nazirliyi ilə birgə 13 idman yarışı keçirilib. Stend yarışlarında 59, TİR atıcılığı yarışlarında 123, peyntbol üzrə birinciliklərdə 230 və çoxnövçülük üzrə 80, ümumilikdə, 492 idmançı yarışlarda mübarizə aparıb.
Federasiya sədri diqqətə çatdırıb ki, geridə qoyduğumuz il atıcılıq idman növünün muxtar respublikada təbliği, rayonlarda atıcılıq üzrə klubların yaradılması, idman infrastrukturunun yenidən qurulması və yeni avadanlıqların alınması istiqamətində mühüm işlər görülüb. Atıcılıq mərkəzinin peyntbol meydançasında maneələr yenidən qurulub, stend atışı üçün meydança müasir tələblərə uyğunlaşdırılıb, TİR atıcılığı üçün yeni maneələr quraşdırılıb, müasir görkəmi ilə seçilən kafe istifadəyə verilib, ərazidə abadlaşdırma işləri aparılıb.
Səhət Həbibbəyli deyib: “Naxçıvan şəhərindəki Atıcılıq əyləncə mərkəzi yenidən təmir olunub, TİR atıcılığı üçün yeni maneələr quraşdırılıb, yeni oyun qurğuları alınıb. Şərur şəhərindəki Atıcılıq mərkəzinin fəaliyyəti yenidən qurulub. Naxçıvan şəhərində fəaliyyət göstərən “Hədəf” və “Qələbə” Atıcılıq idman klubları ilə yanaşı, Şərur şəhərində “Ümid”, Culfa şəhərində “Uğur” və Kəngərli rayonunun Qıvraq qəsəbəsində “Zəfər” Atıcılıq idman klubları təsis edilib və onların idmançılarının muxtar respublika səviyyəli yarışlarda iştirakları təmin olunub”.
Vurğulanıb ki, qızların atıcılıq idmanına cəlb olunması istiqamətində işlər görülüb, təşkil olunmuş tədbirlərdə 25 qız idmançının iştirakı təmin edilib. Federasiya tərəfindən keçirilən yarışlarda iştirak edənlərin nəticələri nəzərə alınaraq atıcılığın müxtəlif növləri üzrə “Naxçıvan” komandasının tərkibi müəyyənləşdirilib, onlar təlim-məşq toplanışlarına cəlb olunublar.
Naxçıvan Muxtar Respublikası Gənclər və İdman naziri Azad Cabbarov çıxışında bildirib ki, Naxçıvanda idmanın inkişafına və idmançılara göstərilən qayğı yüksək səviyyədədir. Bunun ifadəsidir ki, diyarımızda gənc və yeniyetmələrin idmanın müxtəlif növlərinə marağı gündən-günə artmaqdadır. Qürurvericidir ki, Naxçıvan idmançıları respublika səviyyəli yarışlarda 179, beynəlxalq miqyaslı turnirlərdə 165, dünya səviyyəli yarışlarda 5, Avropa çempionatlarında 20 olmaqla, ümumilikdə, muxtar respublikadan kənar yarışlarda 369 medal qazanıblar.
Azad Cabbarov vurğulayıb ki, muxtar respublikada uğurla fəaliyyət göstərən idman federasiyalarından biri də 2013-cü ildə yaradılan Atıcılıq Federasiyasıdır. Federasiyanın bölmə və qruplarında idmanın bu növü ilə 13 qrupda 195 nəfər məşğul olur. Naxçıvan Muxtar Respublikası Gənclər və İdman Nazirliyi Atıcılıq Federasiyası ilə birgə idmanın bu növünü inkişaf etdirmək və kütləviliyinin təmin olunması məqsədilə çoxsaylı tədbirlər həyata keçirib. Federasiyada struktur dəyişikliyindən sonra Atıcılıq mərkəzində təmir-bərpa işləri aparılıb. İdmançıların asudə vaxtlarının səmərəli təşkili məqsədilə onların muxtar respublikada fəaliyyət göstərən muzeylərə gəzintiləri və Ağbulaq İstirahət Mərkəzində Yay məktəbləri təşkil olunub.
Yığıncaqda 2020-ci ildə görüləcək işlər və keçiriləcək tədbirlər barədə məlumat verilib.