REGİONLAR


Muxtar respublikanın Daxili İşlər Nazirliyinin əməkdaşları güc çoxnövçülüyü üzrə birincilikdə qüvvələrini sınayıblar

Naxçıvan, 8 fevral, AZƏRTAC

Naxçıvan Muxtar Respublikası Daxili İşlər Nazirliyinin əməkdaşları arasında güc çoxnövçülüyü üzrə birincilik keçirilir.

AZƏRTAC-ın Naxçıvan bürosu xəbər verir ki, nazirliyin idman cəmiyyətinin zalında keçirilən yarışın açılış mərasimində çıxış edən nazirliyin Təşkilat-İnspeksiya İdarəsinin rəisi, polis polkovniki Rəşad Seyidov bu gün muxtar respublika rəhbəri tərəfindən idmana və idmançılara göstərilən yüksək qayğının tərkib hissəsi olaraq, polis əməkdaşlarının fiziki inkişafına və idman məşğələlərinin keçirilməsinə də xüsusi diqqət yetirildiyini bildirib. Qeyd edib ki, polis əməkdaşlarının da vəzifə borcu idman məşğələlərində mütəşəkkil iştirak etmək, qarşıya qoyulan tapşırıqları yerinə yetirməkdir. Rəşad Seyidov daxili işlər naziri adından idmançılara uğurlar arzulayıb.

Naxçıvan Muxtar Respublikası Daxili İşlər Nazirliyinin Veteranlar Şurasının sədri, istefada olan polis polkovniki Yusif Həsənov və idman cəmiyyətinin rəisi, polis baş leytenantı Elməddin Abdullayev çıxış edərək Naxçıvan idmançılarının mötəbər yarışlarda əldə etdikləri qələbələrdən danışıb, polis idmançıların təcrübələrinin ildən-ilə artdığını vurğulayıblar.

Yarışda 16 komandanın 108 idmançısı mübarizə aparıb. İdmançılar iki növdə – ağırlıq daşlarını qaldırma və qol güləşində qüvvələrini sınayıblar. Birinciliyin final görüşləri bu gün keçiriləcək.

Qeyd edək ki, yarışın məqsədi polis əməkdaşları arasında fiziki gücü, dözümlülüyü və dayanıqlılığı inkişaf etdirmək, həmçinin Azərbaycan Respublikası Daxili İşlər Nazirliyində keçiriləcək güc çoxnövçülüyü üzrə yarışda iştirak edəcək idmançılar seçməkdən ibarət olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.