Naxçıvan, 28 mart, AZƏRTAC

1918-ci ildə öz müstəqilliyini elan etmiş Azərbaycan Xalq Cümhuriyyəti Vətənimizin qarşılaşdığı daxili və xarici təhlükələri nəzərə alaraq 1919-cu il martın 28-də Hərbi Nazirliyin Baş Qərargahının general-kvartirmeystr şöbəsində kəşfiyyat və əks-kəşfiyyat bölməsini yaradıb. Lakin Azərbaycan Xalq Cümhuriyyətinin bolşevik Rusiyası tərəfindən işğalı burada milli kəşfiyyat və əks-kəşfiyyat sistemini daha da təkmilləşdirərək ərazi orqanlarının yaradılması səylərini yarımçıq qoyub.

AZƏRTAC-ın Naxçıvan bürosu Azərbaycanın təhlükəsizlik orqanlarının yaranmasının 103-cü ildönümü ilə əlaqədar Naxçıvan Muxtar Respublikası Dövlət Təhlükəsizliyi Xidmətinin məlumatı əsasında hazırlanmış materialı təqdim edir.

Təhlükəsizlik orqanlarının inkişafı Ulu Öndərimizin adı ilə bağlıdır

Azərbaycan xüsusi xidmət orqanlarının peşə bayramının rəsmi şəkildə qeyd olunması, zəngin və şərəfli ömür yolu təhlükəsizlik orqanları ilə sıx bağlı olmuş ümummilli lider Heydər Əliyevin adı ilə bağlıdır. Məhz Ulu Öndərin imzaladığı 1997-ci il 23 mart tarixli “Azərbaycan Respublikasının təhlükəsizlik orqanları əməkdaşlarının peşə bayramı gününün təsis edilməsi haqqında” Sərəncamı ilə hər il martın 28-i ölkəmizdə təhlükəsizlik orqanları əməkdaşlarının peşə bayramı günü kimi qeyd edilir.

Azərbaycan Respublikasında təhlükəsizlik orqanlarının inkişafında, bu sahədə fəaliyyətin xalqımızın milli maraqlarına uyğun qurulmasında ümummilli liderimiz Heydər Əliyevin xüsusi xidmətləri var. “Təhlükəsizlik işçisi yüksək mədəniyyətli, keyfiyyətli işçi olmalıdır. Elə bir işçi ki, şairlə də, bəstəkarla da, yazıçı ilə də, alimlə də, adi vətəndaşla da danışa bilsin. Əgər belə olmasa, o, ağı qaradan, pisi yaxşıdan, cinayəti səhvdən, səhvi cinayətdən ayıra bilməz”, - deyən Ulu Öndərimizin ötən əsrin 60-cı illərində Azərbaycan Dövlət Təhlükəsizlik Komitəsində rəhbərliyə gəlməsi bu qurumun tarixində milli prioritetlərin müəyyənləşməsi kimi xarakterizə edilən yeni dövrün başlanğıcı kimi qəbul olunur. Böyük şəxsiyyətin Azərbaycan xüsusi xidmət orqanlarına rəhbərliyi illərində kadr potensialının formalaşdırılması, təhlükəsizliyin təminatında xalqımızın milli maraqlarının ön plana çəkilməsi və qorunması məqsədilə mühüm tədbirlər həyata keçirilib. Ulu Öndər xalqımızın mənafelərini, milli-mədəni irsini, milli dəyərlərini sovet rejiminin amansız təhdidlərindən qorumaq naminə böyük iradə və dəyanət nümayiş etdirib.

Müstəqilliyin ilk illərində ölkəmizdə baş verən hərc-mərclik, silahlı birləşmələrin mərkəzi hakimiyyətə tabe olmaması, separatçılıq meyillərinin güclənməsi, digər tərəfdən Ermənistanın həyata keçirdiyi işğalçılıq siyasəti və o dövrdə ölkəyə rəhbərlik edənlərin səriştəsizliyi Azərbaycanın milli təhlükəsizliyinə qarşı ciddi təhdidlər yaratmışdı. Azərbaycanda və onun Naxçıvan Muxtar Respublikasında siyasi, sosial-iqtisadi, hərbi sahələrdə yaşanan böhran vəziyyəti daha da ağırlaşdırmışdı. Bu dövrdə ulu öndər Heydər Əliyevin öz doğma yurdu Naxçıvana qayıtması və siyasi fəaliyyətə başlaması xalqın itən inamını özünə qaytardı. Həmin dövrdə Ermənistan tərəfdən işğal təhlükəsi ilə üzləşən, blokadaya alınan muxtar respublikanın siyasi-iqtisadi tənəzzüldən çıxarılması, hərbi təhdidlərdən xilas olması yalnız Ulu Öndərin həyata keçirdiyi çevik və uğurlu siyasət nəticəsində mümkün oldu. İctimai-siyasi sabitlik təmin olunduqdan sonra dahi öndərin rəhbərliyi altında Azərbaycanın milli təhlükəsizlik siyasətinin əsas istiqamətləri işlənib hazırlandı, Azərbaycan xüsusi xidmət orqanları qarşısında duran vəzifələr müəyyənləşdirildi, respublikamızın digər dövlətlərlə təhlükəsizlik sahəsində strateji tərəfdaşlıq münasibətləri qurması yönümündə addımlar atıldı.

Ulu Öndərin siyasi xətti dövlətimizin başçısı tərəfindən uğurla davam etdirilir, ölkəmiz yeni-yeni nailiyyətlər qazanır

Ümummilli lider Heydər Əliyevin milli inkişaf strategiyasını uğurla davam etdirən Azərbaycan Respublikasının Prezidenti İlham Əliyevin həyata keçirdiyi məqsədyönlü, ardıcıl və prinsipial daxili və xarici siyasət sayəsində bu gün davamlı inkişafda olan Azərbaycan bölgənin lider dövləti kimi beynəlxalq münasibətlər və təhlükəsizlik sistemində öz layiqli yerini tutub.

Azərbaycan Respublikasında xüsusi xidmət orqanlarının fəaliyyətinin səmərəliliyini artırmaq və dövlət idarəetmə strukturunu təkmilləşdirmək məqsədilə Prezident İlham Əliyevin 2015-ci il 14 dekabr tarixli Fərmanı ilə Azərbaycan Respublikası Milli Təhlükəsizlik Nazirliyinin əsasında Azərbaycan Respublikasının Dövlət Təhlükəsizliyi Xidməti və Azərbaycan Respublikasının Xarici Kəşfiyyat Xidməti yaradılıb. Naxçıvan Muxtar Respublikasında da idarəetmə strukturu təkmilləşdirilib, Naxçıvan Muxtar Respublikası Ali Məclisinin Sədri Vasif Talıbovun 2015-ci il 18 dekabr tarixli Fərmanı ilə Naxçıvan Muxtar Respublikasının Dövlət Təhlükəsizliyi Xidməti yaradılıb.

Naxçıvan Muxtar Respublikası Dövlət Təhlükəsizliyi Xidməti fəaliyyətini günün tələbləri səviyyəsində qurub

Dövlət quruculuğu prosesində yaxından iştirak edən Naxçıvan Muxtar Respublikası Dövlət Təhlükəsizliyi Xidməti muxtar respublikanın ictimai-siyasi, elmi-mədəni mühitinin inkişafında, ictimai asayişin qorunmasında, cinayətkarlığa qarşı mübarizənin bütün istiqamətləri üzrə işin səmərəli təşkilində, ən başlıcası vətəndaşların təhlükəsizliyinin təmin olunmasında digər dövlət qurumları ilə əlaqəli şəkildə fəaliyyət göstərir. Bu gün təhlükəsizlik xidməti Naxçıvan Muxtar Respublikası Ali Məclisi Sədrinin hüquq-mühafizə orqanları qarşısında mühüm vəzifə kimi qoyduğu ümumprofilaktik tədbirlərin keçirilməsi işini də daim diqqət mərkəzində saxlayır. Əməkdaşlar tərəfindən gənc nəslin milli və əxlaqi dəyərlərə, adət-ənənələrimizə, dövlətçiliyimizə sadiq, vətənpərvərlik ruhunda tərbiyə olunması məqsədilə ardıcıl tədbirlər həyata keçirilir. Mütəmadi olaraq əhali arasında maarifləndirici söhbətlər aparılır, onlara ölkə vətəndaşlarını şirnikləndirici, aldadıcı vədlərlə qanunazidd və cinayətkar əməllərə sövq etməyə çalışan ayrı-ayrı təşkilatlar, eləcə də son dövrlər beynəlxalq aləmi təhdid edən radikal, qeyri-ənənəvi dini qruplaşmalar və onların pozuculuq fəaliyyətləri barədə ətraflı məlumatlar verilir.

Bu gün milli maraq və təhlükəsizliyin müasir səviyyədə təmin olunması üçün bütün zəruri tədbirlər həyata keçirilir. Ötən dövrdə xidmətin maddi-texniki bazası davamlı olaraq gücləndirilib, xidmətin Culfa Rayon İdarəsi və Babək Rayon Şöbəsinin inzibati və yaşayış binaları əsaslı təmir olunaraq yenidən qurulub, Xüsusi Təyinatlı Şöbənin inzibati binası və Təlim Mərkəzi istifadəyə verilib, xidməti fəaliyyətin günün tələblərinə uyğunlaşdırılması məqsədilə islahatlar aparılıb, əməkdaşların maddi-sosial vəziyyətinin yüksəldilməsi, peşəkarlıqlarının artırılması istiqamətində zəruri addımlar atılıb.

Dövlət Təhlükəsizliyi Xidməti müasir texniki bazaya, bacarıqlı və peşəkar kadrlara malikdir

Naxçıvan Muxtar Respublikası Ali Məclisinin Sədri tərəfindən Dövlət Təhlükəsizliyi Xidmətinin fəaliyyəti hər zaman yüksək qiymətləndirilib və bunun nəticəsi olaraq əməkdaşlar dövlət mükafatlarına, müxtəlif medal və təltiflərə layiq görülüblər. Ali Məclisin Sədri Vasif Talıbov deyib: “Bu gün Azərbaycanın ayrılmaz tərkib hissəsi olan Naxçıvan Muxtar Respublikasında milli təhlükəsizliyin təmin edilməsi qarşıda duran başlıca vəzifədir”.

Muxtar respublikanın Dövlət Təhlükəsizliyi Xidməti müasir texniki bazaya, bacarıqlı və peşəkar kadrlara malikdir. Ulu öndər Heydər Əliyevin “Təhlükəsizlik оrqanlаrındа müasir tələblərə cavab verən, yüksək professional səviyyədə olan kadr korpusu hazırlanmalıdır” fikirləri əsas götürülərək təhlükəsizlik orqanlarına həqiqi hərbi xidmətə vətənpərvər, yüksək mədəniyyətə, geniş dünyagörüşünə malik, müvafiq psixoloji və fiziki hazırlıqlı, dövlətçiliyə sədaqətli gənclər qəbul olunur, xidmət dövründə gənc əməkdaşların peşəkarlıq səviyyələrinin artırılması, əqli və fiziki potensiallarından səmərəli istifadə olunması istiqamətində nəzəri və əməli köməkliklər göstərilir.

Ulu öndər Heydər Əliyevin siyasi xəttinin layiqli davamçısı olan Prezident İlham Əliyevin rəhbərliyi ilə ölkəmiz bütün sahələrdə durmadan inkişaf edir, günbəgün daha da qüdrətlənir. Bunun parlaq nümunəsi kimi 44 günlük Vətən müharibəsində Ali Baş Komandanın sərkərdəliyi altında xalqın və dövlətin sarsılmaz birliyi nəticəsində rəşadətli Ordumuz torpaqlarımızı düşmən işğalından azad etdi, Azərbaycanın çoxəsrlik tarixinin və hərbi uğurlarının yeni şanlı və şərəfli səhifələrini yazdı. Təhlükəsizlik orqanları da bu şanlı vəzifənin yerinə yetirilməsində qətiyyət nümayiş etdirərək, üzərinə qoyulmuş tapşırıqları layiqincə yerinə yetirdi.

Qarşıya qoyulan vəzifələr uğurla icra olunur

2019-cu il iyulun 9-da “Naxçıvan Muxtar Respublikasında təhlükəsizliyin təmin olunması sahəsində görülən işlər və qarşıda duran vəzifələr barədə” keçirilmiş müşavirədə Naxçıvan Muxtar Respublikası Аli Məclisinin Sədri Vasif Talıbov kəşfiyyat və əks-kəşfiyyat sahəsində işin düzgün təşkilinin birbaşa dövlətin və xalqın təhlükəsizliyinə zəmanət verdiyini bildirib, muxtar respublikanın təhlükəsizlik orqanlarının qarşısında müvafiq vəzifələr qoyub və xüsusi xidmət orqanlarının vacib vəzifəsinin dövlətin möhkəmləndirilməsinə, müdafiə potensialının yüksəlməsinə, sosial-iqtisadi inkişafın sürətlənməsinə xidmət etməkdən ibarət olduğunu qeyd edib. Naxçıvan Muxtar Respublikası Dövlət Təhlükəsizliyi Xidməti ötən dövrdə dövlət siyasətinin həyata keçirilməsində və sabit ictimai-siyasi mühitin yaradılmasında uğurlu fəaliyyət göstərib, dövlətimizin milli mənafelərinin qorunmasını təmin edib.

Naxçıvan Muxtar Respublikası Dövlət Təhlükəsizliyi Xidmətinin məlumatında vurğulanıb ki, xidmətin şəxsi heyəti dövlətə və xalqa şərəfli xidmət missiyasını bundan sonra da layiqincə davam etdirəcək, müstəqilliyimizin, təhlükəsizliyimizin və mövcud sabitliyin qorunması istiqamətində bütün qüvvə və səyini səfərbər edəcəkdir. Azərbaycan Respublikasının Prezidenti İlham Əliyevin dediyi kimi: “Ölkəmizin normal, hərtərəfli inkişafı üçün, Azərbaycan xalqının rifah, sülh şəraitində yaşaması üçün sabitlik, ictimai-siyasi asayiş qorunmalıdır, təhlükəsizliyimiz təmin olunmalıdır”.