SİYASƏT


Muxtariyyətin quruculuq, inkişaf və sabitlik dövrü

Şərur rayonunun Kərimbəyli kəndində yeni sosial obyektlər istifadəyə verilib

Şərur, 7 fevral, AZƏRTAC

Naxçıvan Muxtar Respublikası 95 illik yubileyini sosial-iqtisadi sahədə qazanılan yüksək nailiyyətlərlə qeyd edir. Həyata keçirilən çoxşaxəli quruculuq tədbirləri yaşayış məntəqələrini abadlığa, inkişaf və tərəqqiyə qovuşdurub. Yüksək iqtisadi potensiala malik olan muxtar respublikada dövlət proqramlarının və infrastruktur layihələrinin uğurla həyata keçirilməsi əhalinin rahat yaşayışını təmin edib. Bütün bunlar muxtariyyətimizi daha da möhkəmləndirib, digər yaşayış məntəqələri kimi, Şərur rayonu da müasirliyə qovuşub.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, fevralın 7-də - Naxçıvan Muxtar Respublikasının 95 illik yubileyi ərəfəsində Şərur rayonunun Kərimbəyli kəndində yeni sosial obyektlər istifadəyə verilib.

Kərimbəyli kənd tam orta məktəbinin açılışı olub

Fevralın 7-də Kərimbəyli kənd tam orta məktəbinin yeni binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib.

Məlumat verilib ki, 270 şagird yerlik məktəbdə 2-si elektron lövhəli olmaqla 18 sinif otağı, kimya-biologiya və fizika laboratoriyaları, hərbi kabinə, şahmat sinfi, kompüter, müəllimlər, psixoloq otaqları, kitabxana və idman zalı vardır. Gənclərin kompüter biliklərinin möhkəmləndirilməsi müasir tədris prosesində qarşıda duran əsas vəzifələrdəndir. Məktəbin kompüter otağında internetə çıxışı olan 19 kompüter quraşdırılıb ki, bu da informatika dərslərinin tədris proqramına uyğun keçirilməsinə imkan verəcəkdir.

Kərimbəyli kənd tam orta məktəbinin kitabxanasında 1567-si dərslik və 2790-ı bədii ədəbiyyat olmaqla, 4357 kitab, eləcə də “Oxunması zəruri olan kitablar”dan ibarət guşə vardır. Həmçinin burada “Naxçıvan Muxtar Respublikası-95”, “Cəlil Məmmədquluzadə-150” və “İmadəddin Nəsimi-650” guşələri də yaradılıb.

Kimya müəllimi Şəfa Əliyeva müasir laboratoriyaların istifadəyə verilməsinin dəqiq elmlərin tədris proqramına uyğun keçirilməsinə şərait yaratdığını bildirib.

Təhsil ocağının idman zalında yeniyetmələrin fiziki sağlamlığının qorunması üçün lazımi şərait yaradılıb. Şagirdlərin hərbi hazırlığının və vətənpərvərlik tərbiyəsinin yüksəldilməsi məqsədilə məktəbdə hərbi kabinə də fəaliyyət göstərir. Bildirilib ki, məktəbin şagirdlərindən 2-si Heydər Əliyev adına Hərbi Liseydə, 2-si isə ali hərbi məktəblərdə təhsil alır.

Ali Məclisin Sədri idman dərslərinin və şagirdlərin hərbi vətənpərvərlik tərbiyəsinin düzgün təşkilinin əhəmiyyətini vurğulayıb. Qeyd olunub ki, muxtar respublikada dəqiq elmlərin və şahmatın tədrisinə diqqətin artırılması uğurlu nəticələrin qazanılmasına imkan verir. Dövlət İmtahan Mərkəzinin ötən ilin buraxılış imtahanları ilə bağlı hazırladığı məlumatlarda Naxçıvan Muxtar Respublikasının nəticələri ölkə üzrə ümumi statistik göstəricilərindən yüksəkdir.

Ali Məclisin Sədri kimya-biologiya və fizika fənlərinin tədrisinə xüsusi diqqət yetirilməsi, Dövlət İmtahan Mərkəzinin saytında yerləşdirilən elektron dərsliklərdən istifadə olunması ilə bağlı tapşırıqlar verib.

Məktəbə baxış zamanı Naxçıvan Dövlət Xalça Muzeyi ilə muxtar respublikanın ümumtəhsil məktəbləri arasında keçirilən interaktiv dərs izlənilib.

Sonra Ali Məclisin Sədri məktəbin müəllimləri ilə görüşüb.

Kərimbəyli kənd tam orta məktəbinin direktoru Zeynəb Həsənova çıxış edərək deyib ki, Kərimbəyli kəndində kompleks quruculuq və abadlıq işləri aparılıb. Bu gün müəllim və şagirdlərin istifadəsinə verilən, tədrisin keyfiyyətinin yüksəldilməsi üçün geniş imkanlar açan müasir məktəbdə şagirdlər hərtərəfli təhsil alacaqlar. Yeni məktəb binasında yaradılanlar tədrisin daha yüksək səviyyədə təşkilinə hesablanıb. Muxtar respublikada təhsilin inkişafı üçün həyata keçirilən tədbirlər və təhsil işçilərinin sosial qayğılarının daim diqqətdə saxlanılması məsuliyyətimizi artırır. Zeynəb Həsənova gənc nəslin təlim-tərbiyəsində, əsl vətəndaş kimi yetişməsində bilik və bacarıqlarını əsirgəməyəcəklərini bildirib.

Məktəbin müəllimi Səmrah Cəfərli deyib: Naxçıvanın muxtariyyət tarixinin 95 ili tamam olur. Tarixin heç bir dövründə Naxçıvan indiki qədər abad olmayıb və inkişaf etməyib. Göstərilən diqqət və qayğı sayəsində muxtar respublikamızın bütün şəhər və rayonları, o cümlədən kəndlərimizin siması dəyişib və müasirləşib. İndi ucqar dağ kəndinin infrastruktur təminatı baxımından paytaxt Naxçıvan şəhərindən heç də geridə qalmaması yaşayış məntəqələrinə və insan amilinə verilən dəyərin ifadəsidir. Kərimbəyli kəndi də müasir kəndlər sırasına qoşulur. Məktəbimizdə yaradılan şərait şagirdlərimizin daha yaxşı təhsil almalarına geniş imkan açmaqla yanaşı, həm də müəllimləri daha yaxşı işləməyə ruhlandırır. Səmrah Cəfərli təhsilə göstərdiyi diqqət və qayğıya, eləcə də yaradılan şəraitə görə müəllim, şagird və valideynlər adından Ali Məclisin Sədrinə minnətdarlıq edib.

Naxçıvan Muxtar Respublikası Ali Məclisinin Sədri Vasif Talıbov Kərimbəyli kənd tam orta məktəbinin yeni binasının istifadəyə verilməsi münasibətilə kollektivi və sakinləri təbrik edərək deyib: Kərimbəyli kənd tam orta məktəbi müasir tədrisin tələbləri səviyyəsində qurulub. Məktəbdə lazımi şərait yaradılıb, kompüter otağı, elektron lövhəli siniflər, laboratoriyalar və idman zalı istifadəyə verilib. Eyni zamanda, məktəbdə bütün fənləri tədris edəcək müəllim kollektivi vardır. Bütün bunlar ölkəmizdəki inkişafın nəticəsidir. Əgər ölkəmizdəki inkişaf və sabitlik olmasaydı, təhsil sahəsində bu işləri həyata keçirmək də mümkün olmayacaqdı. Bu gün ölkəmizdə digər sahələrlə yanaşı, təhsil də inkişaf etdirilir, məktəb quruculuğuna diqqət göstərilir.

Ali Məclisin Sədri deyib: Ölkə üçün təhsil vacib sahədir. Müdriklər deyirdi ki, bir ölkənin gələcəyini bilmək üçün onun gəncliyinə nəzər salmaq lazımdır. Sağlam gənclik isə məktəbdə hazırlanır. Ümummilli liderimiz Heydər Əliyev tövsiyə edirdi ki, “Gənc nəslin təhsilinə ciddi fikir versək, onda gələcəyimiz üçün böyük işlər görmüş olarıq”. Ulu Öndərin bu fikirləri təhsilin ölkə həyatında nə qədər böyük rola malik olduğunu təsdiq edir. Bu gün Azərbaycan müharibə şəraitindədir, torpaqlarımız işğal olunub. Ordu quruculuğu sahəsində tədbirlər görülür. Lakin bununla yanaşı, ölkəmizin gələcəyinin hazırlanması sahəsində də tədbirlər görülür, təhsilin inkişafına ciddi diqqət yetirilir. Təhsil dövlətin himayəsindədir. Kərimbəyli kəndində müasir şəraiti olan məktəb binasının istifadəyə verilməsi də ölkəmizdə təhsilin inkişafına göstərilən qayğının nəticəsidir.

Ali Məclisin Sədri deyib: Kərimbəyli kənd tam orta məktəbinin nailiyyətləri vardır. Şagirdlərin ali və hərbi məktəblərə qəbul olması, eləcə də yüksək bal toplamaları məktəbdəki tədrisin səviyyəsinin göstəricisidir.

Ali Məclisin Sədri qazanılan nailiyyətlərə görə kollektivə təşəkkür edib, yaradılan şəraitdən düzgün istifadə ediləcəyinə, ölkəmiz üçün yararlı və peşə sahibi olan gənclər yetişdiriləcəyinə əminliyini bildirib.

Binanın həyətində şəhid Nüsrət İsmayılovun büstü qoyulub, müəllimlər və şagirdlər üçün bufet, fərdi qazanxana tikilib, açıq idman qurğuları quraşdırılıb, yaşıllıq salınıb.

Kərimbəyli Kənd Mərkəzi istifadəyə verilib

Fevralın 7-də Kərimbəyli Kənd Mərkəzinin açılışı olub.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib.

Məlumat verilib ki, kənd mərkəzində inzibati ərazi dairəsi üzrə nümayəndəlik, bələdiyyə, rabitə evi, polis sahə və baytarlıq məntəqələri, kitabxana, statistika otağı, klub, Yeni Azərbaycan Partiyası ərazi ilk təşkilatı, arxiv və 54 yerlik zal yerləşir. Kitabxanada 5789 ədəbiyyat oxucuların istifadəsinə verilib. Yeni Azərbaycan Partiyası Kərimbəyli kənd ərazi ilk təşkilatının 124 üzvü vardır. Onlardan 34-ü gənc, 33-ü isə qadındır.

Yeni Azərbaycan Partiyası Kərimbəyli kənd ərazi ilk təşkilatının sədr müavini Bəhlul Musayev minnətdarlıq edib.

Rabitə evində quraşdırılan 384 yerlik ATS Kərimbəyli kəndində 241 abonentə xidmət edir. Kənddə 106 abonent internetdən istifadə edir. Poçt bölməsində müvafiq xidmətlərlə yanaşı, həm də sakinlərin təqaüdləri ödənilir.

Kənd mərkəzində baytarlıq xidmətinin təşkili üçün yaradılan şərait mütəmadi olaraq baytarlıq müşahidələrinin aparılmasına, dezinfeksiya və dezinseksiya tədbirlərinin vaxtında həyata keçirilməsinə imkan verəcəkdir.

Ali Məclisin Sədri kənddəki ailə təsərrüfatlarının qeydiyyata alınması və onların fəaliyyətinin dəstəklənməsi, baytarlıq müşahidələrinin aparılması və lazımi tədbirlərin görülməsi barədə tapşırıqlar verib.

Binada fərdi qazanxana quraşdırılıb, həyətdə abadlıq işləri aparılıb, yaşıllıq sahəsi salınıb, müasir suvarma və işıqlandırma sistemi çəkilib.

Kərimbəyli kənd həkim ambulatoriyasında əhaliyə müasir səhiyyə xidməti göstəriləcək

Fevralın 7-də Kərimbəyli kəndində həkim ambulatoriyası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib, tibbi xidmətin təşkili ilə maraqlanıb.

Məlumat verilib ki, lazımi tibbi avadanlıqlarla təchiz edilmiş ambulatoriya 8 otaqdan - baş həkim, stomatoloq üçün kabinə, fizioterapiya kabinəsi, doğuş, manipulyasiya, peyvənd, qeydiyyat otaqları və aptekdən ibarətdir. Həkim ambulatoriyasında stomatoloji qurğu, doğuş masası, quruducu şkaf, peyvənd və təcili tibbi yardım çantaları, mikroskop, sentrifuqa, hemometr, qlükometr və digər tibbi avadanlıqlar qoyulub. Həkim ambulatoriyasının qeydiyyat otağında kompüter quraşdırılaraq muxtar respublikanın elektron səhiyyə idarəetmə sisteminə qoşulub.

Fizioterapevtik kabinə elektroterapiya və ultrasəslə müalicə aparatı, ultrayüksək tezlikli cərəyanla müalicə aparatı, parafinəritmə qazanı və solyuks lampası ilə təmin edilib. Yaradılan şərait imkan verir ki, sakinlərin ilkin fizioterapevtik müalicələri ambulatoriyada həyata keçirilsin.

Tibb işçisi Lətifə Mustafayeva yaradılan şəraitə görə minnətdarlıq edib.

Ali Məclisin Sədri rayon mərkəzi xəstəxanaları ilə həkim ambulatoriyaları arasında əlaqələrin gücləndirilməsi, qarşılıqlı fəaliyyət proqramının hazırlanması, eləcə də maarifləndirici tibbi broşürlərin hazırlanması barədə tapşırıqlar verib.

Kərimbəyli kənd avtomobil yolu yenidən qurulub

Kərimbəyli kəndində aparılan tikinti işləri çərçivəsində kənd yolu da yenidən qurulub.

Fevralın 7-də Naxçıvan Muxtar Respublikası Ali Məclisinin Sədri Vasif Talıbov avtomobil yolunun açılışını edib.

Məlumat verilib ki, 3700 metrlik kənd yolu genişləndirilərək asfalt örtük salınıb. Yolun üzərində hərəkət nişanları qoyulub, 25 su keçidi və 1129 metrlik beton kanal çəkilib. Kəndin daxilində 21 kilometrdən artıq yol hamarlanaraq qum-çınqıl qatı verilib, 135 metr daş hasar tikilib, 595 metr metal çəpər çəkilib, həyətlərə yeni qapılar qoyulub.

Kənddə yeni xidmət mərkəzi sakinlərin istifadəsinə verilib

Həmin gün Naxçıvan Muxtar Respublikası Ali Məclisinin Sədri Vasif Talıbov Kərimbəyli kəndində xidmət mərkəzinin də açılışını edib.

Məlumat verilib ki, mərkəzdə 2 yerlik bərbərxana, 2 yerlik qadın gözəllik salonu, ət satışı yeri, ərzaq, sənaye, təsərrüfat malları mağazaları, elektrik avadanlıqlarının təmiri yeri, dərzi və anbar vardır. Burada xidmət sahələrinin fəaliyyəti üçün hərtərəfli şərait yaradılıb, 10 sakin işlə təmin olunub.

Dərzi Arzu Qocayeva və elektron cihazların təmiri ustası Habil Sadiqov xidmət mərkəzində onların fəaliyyəti üçün yaradılan şəraitə görə minnətdarlıq ediblər.

Xidmət mərkəzi ilə tanışlıqdan sonra sakinlərlə görüş olub.

Ali Məclisin Sədri sakinləri təbrik edərək deyib: Müasir yaşayış məntəqəsinə çevrilən Kərimbəyli kəndi məhsuldar torpaqları və zəhmətkeş insanları ilə seçilir. Yaradılan şərait imkan verəcəkdir ki, kənd sakinlərinin gündəlik qayğıları vaxtında həll olunsun. Kənddə 1300 hektardan artıq torpaq sahəsi əhalinin istifadəsindədir. 700 hektardan artıq torpaq isə bələdiyyə mülkiyyətindədir. Heyvandarlıq, meyvəçilik, tərəvəzçilik inkişaf etdirilir. Məhsuldar torpaqlara malik olması kənddə ildə iki dəfə əkin aparmağa imkan verir.

Ali Məclisin Sədri deyib: Kərimbəyli kəndində yaradılan şərait ümummilli liderimiz Heydər Əliyevin əsasını qoyduğu sabitlik və inkişaf yolunun ölkə Prezidenti cənab İlham Əliyev tərəfindən uğurla davam etdirilməsinin nəticəsidir. Sabitliyin və inkişafın bəhrələri ölkə həyatının bütün sahələrini əhatə edib. Yaradılan bu şərait də kənd sakinlərinin rahatlığına xidmət edir. Ona görə də sakinlər kəndin torpaqlarından səmərəli istifadə etməli, qurulanlar qorunub saxlanılmalıdır.

Ali Məclisin Sədri qarşıdan Naxçıvan Muxtar Respublikasının 95 illik yubileyinin gəldiyini bildirib, bu münasibətlə sakinləri təbrik edib, kənddə yaradılan şəraiti, tikilənləri, qurulanları muxtariyyət bayramına töhfə kimi dəyərləndirib.

Kənd ağsaqqalı Lətif Orucov sakinlər adından minnətdarlıq edərək deyib: Muxtar respublikada aparılan abadlıq-quruculuq işləri insanların böyük sevincinə səbəb olub. Bu gün Şərur rayonunun Kərimbəyli kəndi də abad kəndlər sırasına qoşulur. Göstərilən diqqət və qayğı nəticəsində kəndimizdə geniş quruculuq işləri aparılıb, məktəb binası, kənd mərkəzi, xidmət mərkəzi, həkim ambulatoriyası tikilib. Kənd yolu yenidən qurulub, elektrik xətləri yenilənib, qaz xətləri dəyişdirilib, artezian təmir olunub. Yaradılan bu şərait sakinlərin rahat və firavan yaşayışına xidmət edir. Bu il muxtar respublikada “Ailə təsərrüfatı ili” elan olunub. Kərimbəyli kəndinin sakinləri də çox zəhmətkeş, torpağa bağlıdırlar. Çalışacağıq ki, bundan sonra da torpaqlarımızı əkib-becərək, bol məhsul istehsal edərək ailə təsərrüfatlarımızı inkişaf etdirək. Muxtar respublikanın 95 illik yubileyi ərəfəsində Kərimbəyli kəndini abad formada bizim istifadəmizə verirsiniz. Bu, bizim üçün ən böyük bayramdır.

X X X

Kərimbəyli kəndində aparılan abadlıq-quruculuq işləri çərçivəsində 1085 metr fiberoptik, 4200 metr yeraltı kabel, 7000 metr hava rabitə, 3500 metr elektrik, 355 metr yeni qaz xətti çəkilib, 400 kilovoltluq 2 transformator yarımstansiyası əsaslı təmir olunub, 6669 metrlik qaz xəttində təmir-bərpa işləri aparılıb. Bundan başqa kəndi suvarma suyu ilə təmin edən “Kərimbəyli-1” nasos stansiyasının təzyiqli boru xəttinə diametri 250 millimetr olan 100 metrlik yeni boru əlavə edilib, 1 subartezian quyusu əsaslı təmir olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.