REGİONLAR


NDU-nun idmançı tələbələri mükafatlandırılıb

Naxçıvan, 11 iyun, AZƏRTAC

Naxçıvan Dövlət Universitetində (NDU) XV Universiada və 2021-ci ilin I yarısında muxtar respublika üzrə yarışlarda mükafata layiq görülmüş idmançılar təltif olunub.

NDU-nun Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, tədbirdə çıxış edən universitetin rektoru Elbrus İsayev ali təhsil müəssisəsində keçirilən yarışların əhəmiyyətini qeyd edib. Bildirib ki, hər il aprel və may aylarında təqvim planına uyğun olaraq universitetdə tələbələrin universiadası keçirilir. Rektor idman kompleksinin yenidən təmir olunmasını, yeni idman ixtisaslarının əlavə olunmasını muxtar respublikada idmana göstərilən yüksək dövlət qayğısının bariz nümunəsi kimi dəyərləndirib. Elbrus İsayev vurğulayıb ki, altı ay davam edən XV Universiada yarışlarında idmançı tələbələrlə yanaşı, qeyri-ixtisasdan olan tələbələr də yer alıb. Rektor tələbələri təbrik edib, onlara gələcək fəaliyyətlərində uğurlar arzulayıb.

XV Universiadanın yekun hesabatı mövzusunda çıxış edən universitet İdman Klubunun sədri, pedaqogika üzrə fəlsəfə doktoru, dosent Məmmədəli Rəhimov bildirib ki, ümumilikdə, universiadada 467 idmançı tələbə iştirak edib. Bunlardan 100 nəfəri əcnəbi tələbə olub.

Qeyd olunub ki, ümummilli lider Heydər Əliyevin anadan olmasının 98-ci ildönümünə həsr olunmuş peyntbol üzrə Naxçıvan Muxtar Respublikası açıq birinciliyində universitetin komandası 20 komanda arasında II yerə layiq görülüb. Ali və orta ixtisas təhsili müəssisələrinin komandaları arasında peyntbol üzrə keçirilən Naxçıvan Muxtar Respublikası açıq birinciliyində isə Naxçıvan Dövlət Universitetinin komandası I yerə layiq görülüb. Ali və orta ixtisas təhsili müəssisələrinin tələbələri arasında keçirilən “Vətən naminə” hərbi-idman oyununda universitetin “Qələbə” komandası bütün rəqiblərinə qalib gələrək I yerə layiq görülüb. Gənclər arasında keçirilən “Hədəf” atış təlimində fərqləndiyinə görə Məhəmməd Şahbazov fəxri fərmanla təltif edilib. Bakı şəhərində keçirilən cüdo güləşi üzrə Azərbaycan Cüdo Federasiyasının keçirdiyi seçmə yarışında Pedaqoji fakültənin I kurs tələbəsi Abbas Məmmədov II yerə çıxıb, Azərbaycan yığma komandasının tərkibinə daxil edilib. Naxçıvan Şəhər Gömrük İdarəsinin yanından Duzdağ mağarasına qədər keçirilən 5 kilometr məsafəyə kross qaçışında Xatun Orucova II yerə layiq görülüb.

Universiadanın ümumi nəticələrinə görə Tibb fakültəsi ümumi hesabla qalib olub. İqtisad fakültəsi ikinci, Pedaqoji fakültə isə üçüncü olub.

Bədən tərbiyəsi və idman ixtisası üzrə II kurs tələbəsi, Dünya ikincisi, Avropa üçüncüsu olan Aslan İsmayılov qazandığı uğurlar barədə danışıb, universiada iştirakçılarını təbrik edib

Sonda idmançı tələbələri mükafatlandırılıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.