SİYASƏT
NEFTÇİLƏR GÜNÜ TƏNTƏNƏ İLƏ QEYD EDİLMİŞDİR
Azərbaycan iqtisadiyyatının tarixən və indi də aparıcı sahəsi olan neft sənayesinin işçiləri, bütün ölkə sentyabrın 20-də Neftçilər gününü təntənə ilə qeyd etmişdir.
AZƏRTAC xəbər verir ki, Dövlət Neft Şirkətinin strukturuna daxil olan kollektivlərin nümayəndələri bu münasibətlə Fəxri xiyabana gələrək, müstəqil Azərbaycan dövlətinin memarı və qurucusu, ölkəmizin yeni neft strategiyasının müəllifi, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın da xatirəsi anılmış, qəbri üstünə gül dəstələri düzülmüşdür.
Həmin gün şirkətin inzibati binasında yığıncaq keçirilmişdir. Yığıncağı giriş sözü ilə açan ARDNŞ-in prezidenti Rövnəq Abdullayev ölkə neftçilərini bayram münasibətilə təbrik edərək, onlara ən xoş arzularını çatdırmışdır. Azərbaycanın neft sənayesinin son illər ərzində əldə etdiyi uğurlardan danışan şirkətin prezidenti bütün bu nailiyyətlərin xalqımızın ümummilli lideri Heydər Əliyevin böyük müdriklik və uzaqgörənliklə işləyib hazırladığı yeni neft strategiyasının bəhrəsi olduğunu vurğulamışdır. O demişdir ki, yeni neft strategiyasının tərkib hissələri olan Bakı-Tbilisi-Ceyhan əsas ixrac neft, Cənubi Qafqaz qaz boru kəmərlərinin, eləcə də Azərbaycanın və bütövlükdə Avropanın enerji təhlükəsizliyinin təmin edilməsində müstəsna rol oynamağa başlayan “Şahdəniz” qaz-kondensat yatağının istismara verilməsi ölkəmizin dünya miqyasında siyasi və iqtisadi mövqeyini daha da möhkəmləndirmişdir. Azərbaycan Prezidenti İlham Əliyevin ölkə neftçilərinə göstərdiyi diqqət və qayğıdan bəhs edən R.Abdullayev neft-qaz sənayesinin inkişafındakı xidmətlərinə görə ölkə başçısının Sərəncamı ilə şirkətin bir qrup əməkdaşının mükafatlandırılmasını həmin qayğının təzahürü kimi qiymətləndirmişdir.
Bayram tədbirində çıxış edən ARDNŞ-in birinci vitse-prezidenti, akademik Xoşbəxt Yusifzadə Azərbaycanda neft sənayesinin tarixindən, bugünkü inkişafından, xalqımızın ümummilli lideri Heydər Əliyevin iqtisadiyyatımızın tərəqqisində misilsiz xidmətlərindən bəhs etmişdir.
Neftçilər günü ərəfəsində Prezidentin fərdi təqaüdünə layiq görülmüş Minirə Məmmədbəyli, Fazil Məmmədov, eləcə də “Əməkdar mühəndis” adı almış Cavanşir Qayıbov çıxışlarında Azərbaycanın neft sənayesində əldə edilən nailiyyətlərin ulu öndərin və onun xəttinin layiqli davamçısı Prezident İlham Əliyevin adı ilə sıx bağlı olduğunu vurğulamış, onların əməyinə verilən yüksək qiymətə görə minnətdarlıqlarını bildirmişlər.
Bayram münasibətilə iki neftçiyə yeni mənzillərin orderləri təqdim edilmişdir.
Yığıncağın sonunda Azərbaycan neftçilərinin ölkə Prezidentinə müraciəti oxunmuşdur.
X X X
Şirkətin rəhbərliyi bayram günü Mərkəzi Neftçilər xəstəxanasına gələrək, yeni yaradılmış şüa-diaqnostika şöbəsi ilə tanış olmuşdur. Həmin şöbə bir müddət əvvəl alınmış nadir – “SOMATOM Definition Straton” və “MAGNETOM Avanto” qurğuları əsasında təşkil edilmişdir. Xəstəxananın baş həkimi Fəxrəddin Cavadov yeni avadanlıqlar barədə məlumat vermiş və bildirmişdir ki, nəinki Azərbaycanda, eləcə də yaxın regionda və bütün MDB məkanında analoqu olmayan bu müasir qurğular insan beynində, habelə orqanizmin digər hissələrində qan dövranının hərəkətini müşahidə etməyə imkan verir. Ən yeni skaner modeli olan “SOMATOM Definition Straton” dünyada iki rentgen şüalandırıcısı olan iki kompyuter tomoqrafıdır və gələcəyin diaqnostikasının tələblərinə tam cavab verir. “MAGNETOM Avanto” qurğusu isə ən mükəmməl skanerlər sinfindən olan güclü maqnit rezonans sistemidir. Kliniki imkanlarına görə dünya lideri olan bu qurğu təsvirlərin keyfiyyəti və maqnit rezonans müayinəsinin sürəti baxımından əvəzedilməzdir. Mütəxəssislərin fikrincə, dünya elminin ən yeni nailiyyətlərindən sayılan nadir avadanlığın hər birinin əhəmiyyəti yeni bir klinikanın açılması ilə müqayisə oluna bilər.
ARDNŞ-in prezidenti Rövnəq Abdullayev demişdir ki, dünyanın ən məşhur tibb avadanlıqları istehsalçılarından olan “Siemens” şirkətinin bu nadir məhsullarının Mərkəzi Neftçilər xəstəxanasında quraşdırılması neftçilərimizin sağlamlığının təmin edilməsində mühüm rol oynayacaqdır. Xəstəxananın ən müasir tibbi avadanlıqla təchizatı bundan sonra da davam etdiriləcəkdir. Xəstəxananın hazırda nəinki Azərbaycanda, eləcə də yaxın regionda ən yaxşı təchiz olunmuş tibb ocağına çevrildiyini deyən R.Abdullayev bildirmişdir ki, regionların sosial-iqtisadi inkişafı Dövlət proqramına uyğun olaraq ölkənin 10-dan artıq bölgəsində tikilən müalicə-diaqnostika mərkəzləri də ən yeni avadanlıqla təchiz ediləcəkdir.
X X X
Sentyabrın 20-də Dövlət Neft Şirkətinin Bayıl yaşayış sahəsində Kompleks qazma işləri trestinin inzibati binasının əsaslı təmirdən sonra açılış mərasimi olmuşdur. ARDNŞ-in prezidenti R.Abdullayev qazmaçıları təbrik edərək demişdir ki, Azərbaycan Prezidenti bizim qarşımızda şirkəti beynəlxalq standartlara, müasir tələblərə cavab verən modern və güclü bir quruma çevirmək vəzifəsi qoymuşdur. Bu məqsədlə şirkətdə struktur islahatları aparılır. Qazmaçılarımız neft-qaz sənayesinin inkişafında həmişə özünəməxsus rol oynamışlar. Trestin əməkçiləri cari ilin 8 ayında proqnoza 147 faiz əməl etmişlər. ARDNŞ prezidenti xüsusilə vurğulamışdır ki, Kompleks qazma işləri tresti dənizdə və quruda ARDNŞ-ə məxsus 24 neft-qaz yatağında qabaqcıl texnika və texnologiyalara əsaslanan kompleks qazma işlərini həyata keçirir.
Trestin müdiri İskəndər Şirəli bildirmişdir ki, mobil, çevik, operativ iş qabiliyyətinə malik olan yeni yaradılmış bu qurum dünya standartlarına uyğunlaşma xətti götürmüşdür. Peşə bayramı ərəfəsində “Neft daşları” yatağındakı 2387 nömrəli meydançada 2399 nömrəli quyuda, “Cahandar” sahəsindəki 1 nömrəli kəşfiyyat quyusunda qazma işlərinə başlanmışdır. Bundan başqa, trest 1990-cı illərdən fəaliyyətsiz qalmış quyuların konservasiyadan çıxarılması, köhnə quyuların əsaslı təmiri ilə də məşğuldur. Trest 71 quyuda qazmaya başlamış, 72 quyuda bu işləri uğurla başa çatdırmışdır. Bundan əlavə, 66 quyuda tikinti işləri həyata keçirmişdir. Təhvil verilmiş quyularda orta gündəlik neft hasilatı 1146,3 ton, qaz hasilatı isə 1 milyon 961 min kubmetr təşkil etmişdir.
Mərasimdə çıxış edən Səbail Rayonu İcra Hakimiyyətinin başçısı Sahib Ələkbərov da neftçiləri peşə bayramı münasibətilə təbrik etmiş, neft gəlirlərinin ölkənin inkişafında, şəhər və rayonların abadlaşmasında mühüm rol oynadığını söyləmişdir.
Sonra qazmaçılara şirkətin fəxri fərmanları, yeni mənzillər verilmiş 2 nəfərə isə orderlər təqdim edilmişdir.
Mərasimdə çıxış edən qazmaçılar neft və qaz sənayesinin bütün əməkçilərinə göstərilən diqqət və qayğıya, onların əməyinə verilən yüksək qiymətə görə trestin kollektivi adından Prezident İlham Əliyevə minnətdarlığını bildirmişlər.
Həmin gün trestin yaxınlığında yerləşən “Kaspian Drillinq” birgə müəssisəsinin təzə binasının da açılışı olmuşdur.
X X X
Sentyabrın 20-də Dənizkənarı Milli parkda Neftçilər günü münasibətilə müxtəlif bayram tədbirləri keçirilmişdir.
Bakılılar və paytaxtın qonaqları burada təşkil olunmuş pavilyonlarda Azərbaycan neft sənayesinin inkişafını əks etdirən sərgiyə maraqla tamaşa etmişlər. Neftçıxarma və neftayırma sənayelərinin müxtəlif mürəkkəb qurğularının maketləri, rəngarəng stendlər və fotoşəkillər tamaşaçılarda şərəfli peşə sahiblərinin əməyi haqqında aydın təsəvvür yaradırdı.
Parkda quraşdırılmış səhnədə Azərbaycan incəsənət ustaları maraqlı konsert proqramı ilə çıxış etmişlər. Konsertin aparıcıları Azərbaycanın tarixinə qızıl hərflərlə yazılmış 1994-cü ilin 20 sentyabrını - “Əsrin müqaviləsi”nin imzalandığı günü, o vaxtdan bəri görülmüş nəhəng işlər barədə konkret faktları xatırlatmışlar.
Səhnənin kənarındakı böyük ekranlarda ölkə neftçilərinin rəşadətli əməyini, ümummilli liderimiz Heydər Əliyevin müdrikliyi, uzaqgörənliyi və qətiyyətinin təntənəsi olan yeni neft strategiyasının reallaşmasını, o cümlədən Bakı-Tbilisi-Ceyhan ixrac neft kəmərinin çəkilişini əks etdirən sənədli kadrlar nümayiş etdirilmişdir.
Milli Parkda bayram gəzintisi və konsert gecədən xeyli keçənə qədər davam etmiş, atəşfəşanlıqla başa çatmışdır.