“NEFTÇİ” FASİLƏ DÖVRÜNDƏ HEYƏTİNƏ ÜÇ OYUNÇU CƏLB ETMİŞDİR

AZƏRTAC AFFA-nın saytına istinadən xəbər verir ki, ölkə futbol çempionatının ikinci dövrəsinə hazırlığının əsas hissəsini Antalyada keçirən “Neftçi” komandası fasilə dövründə heyətinə üç oyunçu cəlb etmişdir. Bunlar birinci dövrədə “Karvan”da çıxış etmiş Hüseyn Məhəmmədov, “İnter”in şərəfini qorumuş Samir Əliyev və bir müddət futboldan kənarda qalmış Rəşad Sadıqovdur.

Hazırda turnir cədvəlinin 4-cü pilləsində qərarlaşan “Neftçi” ikinci dövrədə ilk görüşünü fevralın 16-da Bakıda “Xəzər-Lənkəran” komandasına qarşı keçirəcəkdir.