“NEFTÇİ” FUTBOLÇULARI MDB KUBOKU YARIŞLARINDA QIRĞIZISTAN VƏ MOLDOVA ÇEMPİONLARI İLƏ OYNAYACAQLAR

Azərbaycan çempionu “Neftçi” komandası Qırğızıstan və Moldovanın ən güclü klubları ilə görüşəcəkdir. Bu, MDB və Baltikyanı ölkələri futbol federasiyaları nümayəndələrinin Birlik çempionları kuboku uğrunda yarışların təşkilatçıları ilə Moskvada keçirilən görüşündə məlum olmuşdur.

“Neftçi” futbol klubundan AZƏRTAC-ın müxbirinə bildirmişlər ki, bu dəfə turnir həmişəkindən tez – yanvarın 15-dən başlayaraq keçiriləcəkdir. Qrup mərhələsinin görüşləri yanvarın 16 və 18-də olacaq, yanvarın 19-da isə pley-off mərhələsi başlanacaqdır. Rusiya və Ukrayna çempionları, ötən il olduğu kimi, yenə də turnirdə əvəzedici heyətləri ilə çıxış edəcəklər.