SİYASƏT
Naqif Həmzəyev: “Qobu Park-3” dövlət qayğısının daha bir nümunəsi oldu
Bakı, 30 may, AZƏRTAC
Cəmiyyətin, dövlətin tərəqqisini sürətləndirən mühüm amillərdən biri də yüksək səmərəliliyə malik sosial siyasətin həyata keçirilməsidir. Azərbaycanın sürətli sosial-iqtisadi inkişafının əsas xarakterik xüsusiyyətlərindən biri yaşanan tərəqqinin hər bir vətəndaşın həyatında öz əksini tapması, insanların rifahının günü-gündən yaxşılaşmasıdır. Dövlətimiz həyata keçirdiyi sosialyönümlü siyasət strategiyası ilə nümunəvi bir mövqeyin sahibi kimi çıxış etməyi bacarıb.
Bu fikirləri AZƏRTAC-a açıqlamasında Milli Məclisin deputatı Naqif Həmzəyev bildirib. Diqqətə çatdırıb ki, Azərbaycanda həyata keçirilən islahatlar Ermənistanın işğalçılıq siyasəti nəticəsində doğma yurd-yuvalarını tərk edərək qaçqın və məcburi köçkün həyatı yaşayan soydaşlarımızın sosial vəziyyətini də əhatə edir. Qaçqın və məcburi köçkünlərin yaşayış səviyyəsinin daha da yaxşılaşdırılması dövlətimizin siyasətinin əsas prioritetlərindən biridir.
Hələ 2003-cü il oktyabrın 1-də prezident seçkiləri ərəfəsində Biləsuvar rayonu ərazisində məcburi köçkünlərlə keçirdiyi görüşdə İlham Əliyev “ölkədə bir dənə də çadır düşərgəsi qalmayacaq”, - demişdi. Dövlətimizin başçısının rəhbərliyi ilə həyata keçirilən tədbirlər sayəsində məcburi köçkünlər müasir standartlara uyğun, tam infrastruktura malik yeni qəsəbələrə köçürüldülər. Belə qəsəbələrin açılışında Prezident İlham Əliyevin iştirakı isə qaçqın və məcburi köçkünlərə nə dərəcədə yüksək səviyyədə qayğı göstərildiyinin daha bir sübutudur. Yaradılan şəraitlə dövlət başçısının tanışlığı, məcburi köçkünlərin evində qonaq olması, onlarla birbaşa təması həm də Azərbaycan Prezidentinin bu insanlara xüsusi diqqətinin göstəricisidir.
“Ən böyük arzum, – əminəm ki, bu, hər bir azərbaycanlının ən böyük arzusudur, – doğma torpaqlarımızda, işğaldan azad olunmuş torpaqlarımızda Azərbaycan dövləti tərəfindən tikilmiş yeni mənzillərdə, yeni evlərdə sizin uşaqlarınızın, nəvələrinizin, nəticələrinizin toy mərasimində birgə iştirak edək”, – deyən Birinci vitse-prezident, Heydər Əliyev Fondunun prezidenti Mehriban Əliyevanın məcburi köçkünlərin mənzil-məişət şəraitinin yaxşılaşdırılması ilə bağlı fəaliyyəti intensiv və sistemli xarakter alıb. Mehriban Əliyevanın təşəbbüsü ilə Lökbatanda “Qobu Park-1”, “Qobu Park-2” və mayın 28-də istifadəyə verilən “Qobu Park-3” yaşayış kompleksləri məcburi köçkünlərin dövlət tərəfindən hərtərəfli diqqət və qayğı ilə əhatə olunmalarının daha bir sübutudur.
Qaçqın və məcburi köçkünlər üçün salınmış 111-ci qəsəbədə - “Qobu Park-3” yaşayış kompleksində istehsalat sahələri, ticarət obyektləri, park, uşaq əyləncə meydançaları, avtomobil dayanacaqları ilə yanaşı, ilk dəfə olaraq iki biznes layihəsi də sakinlərin ixtiyarına verilib. Müəssisələrdə çalışacaq işçi heyətin 80 faizinin “Qobu Park 3”ün sakinlərindən formalaşdırılması da məcburi köçkünlərin məşğulluğunun dövlət başçımızın diqqətindən kənarda qalmadığının göstəricisidir.
“Ancaq onu da bilməliyik və bütün Azərbaycan xalqı bilməlidir ki, bu, sizin üçün müvəqqəti yaşayış yeridir. Torpaqlarımız işğaldan azad ediləndən sonra biz bu gün hələ də işğal altında olan torpaqlarda buna oxşar gözəl binalar, şəhərciklər tikəcəyik, ermənilər tərəfindən dağılmış şəhərlərimizi yenidən quracağıq. Ermənilər tərəfindən dağıdılmış və məhv edilmiş milli irsimiz sənədləşdirilib. Biz öz tarixi keçmişimizi yaxşı bilirik və yaxşı bilirik ki, Dağlıq Qarabağ əzəli Azərbaycan torpağıdır. İşğal olunmuş torpaqlar azad ediləndən sonra bütün binalar yenidən qurulacaq, o cümlədən dağılmış tarixi abidələrin mövcudluğunu əks etdirən əməli memarlıq tədbirlərinin görülməsi də nəzərdə tutulur” - ölkə Prezidentinin görüşdə söylədiyi bu sözlər yurd nisgili ilə yaşayan insanların tezliklə ata-baba torpaqlarına qayıdacaqlarına əminliklərini daha da artırıb. Onlar yaxşı bilirlər ki, işğal altındakı ərazilər azad olunduqdan sonra bu yerlərdə dövlət başçısının rəhbərliyi ilə daha təmtəraqlı, yüksək şəraitə malik evlər inşa olunacaq.