Nar festivalı: Göyçaydan Qarabağa!

Göyçay, 2 noyabr, AZƏRTAC

Noyabrın 1-də Göyçay rayonunda hər il təşkil olunan ənənəvi Nar festivalı bu il fərqli formatda keçirilib.

AZƏRTAC-ın bölgə müxbiri xəbər verir ki, “Göyçaydan Qarabağa!” adlı tədbirdə Göyçayın simvolu olan meyvələrin şahı narla yüklənən karvan ön xəttə olan cəbhə bölgəsində hərbçilərimizə göndərilib.

XV Nar festivalını - "Göyçaydan Qarabağa!" adlı tədbiri açan rayon icra hakimiyyətinin başçısı Mehdi Səlimzadə sentyabrın 27-də Prezident, Ali Baş Komandan İlham Əliyevin rəhbərliyi ilə Qarabağda Azərbaycan Silahlı Qüvvələrinin əks-hücum əməliyyatı nəticəsində qazandığı uğurlardan danışıb. Bildirilib ki, dövlət başçısının uğurlu daxili və xarici siyasətinin nəticəsi olaraq bu gün tarixi, əbədi və əzəli torpaqlarımızın xeyli hissəsi azad olunub. Xalqımız "Biz birlikdə güclüyük" şüarı ətrafında sıx birləşərək Böyük Qələbə gününün heç də uzaqda olmadığına inanır.

Tədbirin açılışında bu il keçirilən Nar festivalının cəbhə bölgəsində olan əsgərlərimizə nar karvanının yola salınması ilə əvəz olunacağı bildirilib, rayon sakinlərinin bu tədbiri böyük razılıqla qarşıladığı diqqətə çatdırılıb. Göyçaydan Qarabağa nar karvanının yola salınmasının XV Nar festivalı kimi yadda qalacağı vurğulanıb.

Sonda avtomobil karvanı alqış və cəngi sədaları ilə cəbhə bölgəsinə yola salınıb.

Tədbir pandemiya şəraitinin qaydalarına uyğun olaraq keçirilib.