Naxçıvan, 30 mart, AZƏRTAC

Naxçıvan Muxtar Respublikası Gənclər Fondunun yaradılmasının 10 illiyi qeyd olunub. Tədbir iştirakçıları əvvəlcə ümummilli liderimiz Heydər Əliyevin Naxçıvan şəhərindəki abidəsi önünə gül dəstələri qoyub, Heydər Əliyev Muzeyini ziyarət ediblər.

AZƏRTAC-ın Naxçıvan bürosu xəbər verir ki, Gənclər Mərkəzində keçirilən tədbirdən öncə ölkəmizin ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad olunub.

Naxçıvan Muxtar Respublikası Gənclər Fondunun icraçı direktoru, Milli Məclisin deputatı Cəbi Quliyev tədbirdə çıxış edərək bildirib ki, Gənclər Fondu Naxçıvan Muxtar Respublikası Ali Məclisin Sədrinin 2012-ci il 29 mart tarixli Fərmanı ilə yaradılıb, 2014-cü ilin aprel ayında Azərbaycan Respublikasının Prezidenti İlham Əliyevin iştirakı ilə Naxçıvan şəhərində Gənclər Mərkəzi istifadəyə verilib, fondun fəaliyyəti təmin olunub. Ali Məclis Sədrinin 2018-ci il 27 mart tarixli Fərmanı ilə Naxçıvan Muxtar Respublikası Ali Məclisinin Sədri yanında Gənclər Fondunun əsasında “Naxçıvan Muxtar Respublikasının Gənclər Fondu” Publik Hüquqi Şəxsin yaradılması isə diyarımızda gənclər siyasəti ilə bağlı elm, təhsil, mədəniyyət və digər sosial sahələrə yönəlmiş fəaliyyətin stimullaşdırılmasını, bu sahədəki tədbirlərin, gənclərlə bağlı layihələrin həyata keçirilməsini daha da genişləndirib.

Qeyd edilib ki, Gənclər Fondu ötən dövrdə muxtar respublikada yaşayan istedadlı gənclərin üzə çıxarılması istiqamətində həyata keçirilən tədbirlərə uyğun olaraq onlar arasında yaradıcılıq müsabiqələrinin keçirilməsini də daim diqqət mərkəzində saxlayıb. Muxtar respublikada fəaliyyət göstərən kütləvi informasiya vasitələrinin əməkdaşları, ali və orta ixtisas təhsili müəssisələrinin tələbələri, tam orta məktəblərin şagirdləri, məhdud fiziki imkanlı gənclər arasında müxtəlif mövzularda keçirilən müsabiqələrdə də yüzlərlə gəncin iştirakı və mükafatlandırılması təmin olunub. Könüllülük fəaliyyətinin yaradılması və stimullaşdırılması, gənclərin intellektual bacarıqlarının artırılması, gənclərə vətənpərvərlik tərbiyəsinin aşılanması, milli-mənəvi dəyərlərimiz və adət-ənənəmizin təbliği, müxtəlif dillərdə kursların keçirilməsi, onların innovativ biliklərinin, müxtəlif təlimlər vasitəsilə bilik və bacarıqlarının artırılması və digər istiqamətlərdə mütəmadi işlər görülüb. Gənclərin ölkə və beynəlxalq səviyyəli layihələrdə iştirakı da xüsusi diqqətdə olub, bir çox ölkə və beynəlxalq səviyyəli tədbirin və düşərgənin Naxçıvan Muxtar Respublikasında həyata keçirilməsi təmin edilib.

Cəbi Quliyev diqqətə çatdırıb ki, 10 il öncə təsis edilən fondun başlıca prinsipi hər zaman gənclərimizin milli ruhda, savadlı, geniş dünyagörüşlü, təşəbbüskar, Vətənə, dövlətə bağlı yetişməsi olub. Fond bundan sonra da öz işini günün tələbləri səviyyəsində quracaq, gənclərin muxtar respublikanın ictimai-siyasi və mədəni həyatında yaxından iştirakının təmin edilməsi üçün zəruri tədbirləri davam etdirəcək.

İcraçı direktor çıxışının sonunda Naxçıvanda gənclərin inkişafı üçün göstərilən diqqət və qayğıya, yaradılan şəraitə görə Ali Məclisin Sədrinə minnətdarlığını bildirib.

Sonra Naxçıvan Muxtar Respublikası Gənclər Fondunun yaradılmasının 10-cu ildönümü münasibətilə fəaliyyətlərində fərqlənən əməkdaşlara təşəkkürnamələr təqdim olunub, fondun gənclərlə iş sahəsində fəaliyyətinə həsr edilmiş videoçarxa baxılıb.