Naxçıvan, 19 mart, AZƏRTAC 

Naxçıvan şəhərindəki Mərkəzi bazarda Novruz bayramı münasibətilə ənənəvi bayram yarmarkası təşkil olunub.

AZƏRTAC xəbər verir ki, bayram yarmarkasına muxtar respublikada fəaliyyət göstərən 29 istehsal müəssisəsi tərəfindən 117 adda 223 çeşiddə məhsul çıxarılıb. Burada 9 yerli sahibkar tərəfindən idxal kənd təsərrüfatı məhsullarının topdansatışı da təşkil olunub. Bundan əlavə, muxtar respublikanın müxtəlif bölgələrindən yarmarkaya 200-dən çox torpaq mülkiyyətçisi məhsul gətirib.

Yarmarkanın təşkil olunmasında məqsəd şəhər əhalisinin kənd təsərrüfatı və ərzaq məhsullarına olan tələbatının daha dolğun ödənilməsi, istehlakçıların seçim imkanlarının artırılması, süni qiymət artımının qarşısının alınmasıdır.

Naxçıvan şəhərinin sakinləri AZƏRTAC-ın müxbirinə müsahibələrində yarmarkadakı qiymətlərdən razılıqlarını ifadə ediblər. Naxçıvan şəhər sakini Lətafət Gülməmmədova bildirib ki, yarmarkanın təşkil olunması hər kəs kimi onun da ürəyincə olub. O deyib: “Bayramı keçirmək üçün almaq istədiyimiz məhsulların hamısına burada rast gəlmək olar. Qiymətlər də münasibdir. Sevindirici haldır ki, belə keyfiyyətli məhsulların hamısı yerli istehsaldır. Bu il də Novruz bayramında süfrələrimizi öz məhsullarımız bəzəyəcək. Bu, məni sevindirir. Çünki yerli məhsullarımız yüksək keyfiyyəti ilə seçilir”.

Digər sakin Ramin Əliyev də yarmarkadan razı qaldığını qeyd edib, Naxçıvan torpağında yetişən məhsulların əvəzolunmaz dad-tamından, keyfiyyətindən danışıb. O, bazarda məhsul bolluğu olduğunu vurğulayıb, yarmarkanın təşkil olunmasına görə minnətdarlığını bildirib.

Şahbuz rayonunun Aşağı Qışlaq kəndindən alça qurusu, şüşə qablaşdırmada çaşır, baldırğan və şomu turşuları gətirən Qeyrət Hüseynov Şahbuzun bu əvəzedilməz nemətlərinə alıcılar tərəfindən böyük maraq göstərildiyini deyib.

Mahizər Rüstəmova isə Şərur rayonunun Püsyan kəndindən öz ailə təsərrüfatından əsasən heyvandarlıq məhsulları gətirib. Piştaxtadakı camış qatığından, qaymağından, şorundan, pendirindən tutmuş, yumurta və beçəyə qədər bir çox məhsulların istehsalında ailə üzvlərinin hər birinin zəhməti olduğunu deyib. Müsahibimiz bayramqabağı belə yarmarkaların təşkilinin həm təsərrüfat sahibləri, həm də alıcılar üçün böyük əhəmiyyət daşıdığını qeyd edib.

Culfa rayon Saltaq kəndindən yarmarkaya süd məhsulları gətirən Vasif Məhərrəmov isə söhbətində bildirib ki, burada satıcılar üçün əlverişli şərait yaradılıb, istehsalçılardan rüsum alınmır. Onlar elektron tərəzi ilə təmin olunurlar.

Yarmarkaya gətirdiyi məhsulun çoxunu sataraq yaxşı qazanc əldə edən Vasif Məhərrəmov belə satış yarmarkalarının təşkilini onlara göstərilən böyük qayğı kimi dəyərləndirib və bu şəraiti yaradanlara öz minnətdarlığını bildirib.