Naxçıvan, 14 oktyabr, Rauf Əliyev, AZƏRTAC

Oktyabrın 14-də Naxçıvan şəhərində “Dövlət orqanları və media arasında əlaqələrin genişləndirilməsi” mövzusunda konfrans keçirilib.

AZƏRTAC xəbər verir ki, Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşkilatçılığı ilə Naxçıvan Dövlət Texniki Kollecinin akt zalında keçirilən konfransda Bakıda və Naxçıvan Muxtar Respublikasında fəaliyyət göstərən aparıcı kütləvi informasiya vasitələrinin rəhbərləri, eləcə də muxtar respublikadakı nazirlik, komitə və agentliklərin mətbuat xidmətlərinin əməkdaşları, Naxçıvan Dövlət Universitetinin jurnalistika fakültəsinin tələbələri iştirak ediblər.

Tədbiri giriş sözü ilə açan Naxçıvan Muxtar Respublikası Ali Məclisi Aparatının humanitar siyasət məsələləri və ictimai təşkilatlarla iş şöbəsinin müdiri Rəhman Məmmədov konfrans iştirakçılarını və qonaqları salamlayıb, təşkilatçılara minnətdarlığını bildirib, konfransın işinə uğurlar arzulayıb.

Rəhman Məmmədov qeyd edib ki, dövlət orqanları və media arasında əlaqələrin təməli ümummilli lider Heydər Əliyevin 1990-1993-cü illərdə Naxçıvanda fəaliyyəti dövründə qoyulub. Həmin vaxtlar ulu öndər Heydər Əliyev tərəfindən muxtar respublikada həyata keçirilən tədbirlər - milli dövlətçiliyin bərpası istiqamətində qəbul edilən qərarlar, bazar iqtisadiyyatı tələblərinə uyğunlaşdırılan aqrar islahatlar, qonşu ölkələrlə yaradılan iqtisadi, mədəni və humanitar əlaqələr muxtar respublikanın mətbuat orqanı olan “Şərq qapısı” qəzetində işıqlandırılırdı. Ulu Öndər Moskvadan doğma vətənə - Naxçıvana qayıtdıqdan sonra ilk müsahibəsini “Şərq qapısı” qəzetinə verib, həmin müsahibədə qəzetin fəaliyyətini yüksək qiymətləndirərək deyib: “Mən “Şərq qapısı” qəzetinin təsiri altında tərbiyələnmişəm. Hələ gənc ikən burada orta məktəbdə, pedaqoji texnikumda oxuyanda müxtəlif məsələləri öyrənmək üçün “Şərq qapısı”ndan çox istifadə etmişəm. O vaxtdan nüfuzlu qəzet kimi hafizəmdə qalıb”.

Diqqətə çatdırılıb ki, muxtar respublika reallıqlarını tam olaraq öz səhifələrində əks etdirən “Şərq qapısı” qəzeti Azərbaycanın digər regionlarında da oxucuların marağını qazanaraq, onların Naxçıvan həqiqətləri ilə tanış olmalarına şərait yaradıb.

“Ümummilli lider Heydər Əliyevin Naxçıvanda fəaliyyəti Azərbaycanın qurtuluş və müstəqillik tarixinin parlaq səhifəsini təşkil edib, dövlət orqanları və media arasında əlaqələr özünün yeni inkişaf mərhələsinə qədəm qoyub”, - deyən Rəhman Məmmədov vurğulayıb ki, Ulu Öndər Azərbaycana rəhbərliyi dövründə də hər zaman kütləvi informasiya vasitələrinin cəmiyyət həyatındakı roluna yüksək qiymət verib, jurnalistlərin peşə fəaliyyətləri üçün geniş imkanlar yaradıb. Azərbaycan Respublikasının Prezidenti cənab İlham Əliyev də kütləvi informasiya vasitələrinin inkişafına dövlət qayğısını öz siyasi fəaliyyətinin əsas istiqamətlərindən biri kimi qəbul edib. Ölkəmizdə söz, fikir və məlumat azadlığının təmin olunması, tam sərbəst şəraitdə yüzlərlə qəzet və jurnalın nəşri mətbu fəaliyyətin maneəsiz həyata keçirilməsinə yaradılmış şəraitin, mətbuata dövlət qayğısının bariz nümunəsidir.

Bildirilib ki, muxtar respublikada dövlət-mətbuat əlaqələrinin inkişafı diqqətdə saxlanılır. Hazırda muxtar respublikada 1 muxtar respublika qəzeti, 8 şəhər və rayon qəzeti, 4 jurnal, universitet televiziya və radiosu da daxil olmaqla 3 televiziya, 3 radio, 6 nəşriyyat var. Muxtar respublikada Televiziya və Radio Şurasının, Mətbuat Şurasının yaradılması və fəaliyyətinin genişləndirilməsi də bu sahədə işin keyfiyyətinə müsbət təsir göstərib. Muxtar respublikanın bütün rayonlarında fəaliyyət göstərən mətbuat orqanları normal iş şəraiti ilə təmin edilib, onların maddi-texniki bazaları gücləndirilib. “Şərq qapısı” qəzeti redaksiyası, “Əcəmi” Nəşriyyat-Poliqrafiya Birliyi yeni bina və avadanlıqlarla təmin edilib. “Əcəmi” Nəşriyyat-Poliqrafiya Birliyində quraşdırılan müasir çap avadanlıqları sayəsində muxtar respublikada çıxan bütün qəzet və jurnallar artıq tam rəngli, yüksək poliqrafik keyfiyyətlə nəşr olunur.

Jurnalist kadrların hazırlanmasının, gənc jurnalistlərin işə cəlb olunmasının da mətbuatın inkişafında mühüm amil olduğunu qeyd edən Rəhman Məmmədov deyib ki, Naxçıvan Dövlət Universitetində “Jurnalistika” kafedrası fəaliyyət göstərir. Həmçinin buradakı “Universitet televiziyası” və “Nuhçıxan” radiosunda gənc jurnalistlər nəzəri biliklərlə yanaşı, ilkin peşə vərdişlərinə də yiyələnir, ixtisaslı kadr kimi yetişərək mətbuatın inkişafına öz töhfələrini verirlər. Universitetin “Jurnalistika” ixtisasının Naxçıvan Dövlət Televiziya və Radio Verilişləri Komitəsinə və “Şərq qapısı” qəzetinə hamiliyə verilməsi də ixtisaslı kadrların hazırlanmasında mühüm rol oynayır. Bunun nəticəsidir ki, bu gün muxtar respublikanın kütləvi informasiya vasitələrində çalışanların böyük əksəriyyəti gənclərdir.

Diqqətə çatdırılıb ki, muxtar respublikanın nazirlik, komitə və agentliklərində mətbuat xidmətləri fəaliyyət göstərir. Bu xidmətlər tərəfindən təşkilatların fəaliyyəti ilə bağlı materiallar hazırlanır və mətbuat orqanlarında yayılır. Bu isə oxucu, tamaşaçı və dinləyicilərin dövlət orqanlarının fəaliyyətindən məlumatlı olmalarına, dövlət orqanları və media arasında əlaqələrin inkişafına öz töhfəsini verir.

Naxçıvan Muxtar Respublikası Ali Məclisi Aparatının humanitar siyasət məsələləri və ictimai təşkilatlarla iş şöbəsinin müdiri konfransın dövlət orqanları və media arasında əlaqələrin genişləndirilməsinə mühüm mərhələ olacağına inandığını bildirib və konfransın işinə uğurlar arzulayıb.

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli bildirib ki, respublikamız müstəqillik əldə etdiyi ilk illərdə Azərbaycan mətbuatı böyük çətinliklərlə qarşılaşıb. Ulu öndər Heydər Əliyevin 1993-cü ilin iyununda xalqın təkidli tələbi ilə hakimiyyətə qayıdışından sonrakı dövrdə isə mətbuatın inkişafında tamamilə yeni mərhələ başlanıb. Kütləvi informasiya vasitələrinin fəaliyyətini tənzimləyən zəngin qanunvericilik bazası yaradılıb, mətbuatın maddi-texniki bazasının, iqtisadi müstəqilliyinin gücləndirilməsi, jurnalistlərin fəaliyyəti üçün əlverişli şəraitin təmin edilməsi məqsədilə çoxsaylı tədbirlər həyata keçirilib, mətbuat-dövlət münasibətlərində mütərəqqi ənənələrin əsası qoyulub. 1998-ci ildə Azərbaycanda ilk dəfə olaraq senzura ləğv edilib. Hazırda Azərbaycanda yüzlərlə mətbuat orqanı, informasiya agentliyi, teleradio şirkəti, sürətlə inkişaf edən internet resursları cəmiyyətimizin informasiyaya olan ehtiyacının ödənilməsində əhəmiyyətli rol oynayır.

Ümummilli liderimizin yolunu uğurla davam etdirən Prezident İlham Əliyevin kütləvi informasiya vasitələrinin inkişafına daim diqqət yetirdiyini vurğulayan Vüqar Səfərli qeyd edib ki, ölkəmizdə söz, fikir və məlumat azadlığının təmin olunması, tam sərbəst şəraitdə yüzlərlə qəzet və jurnalın nəşri mətbu fəaliyyətin maneəsiz həyata keçirilməsinə yaradılmış imkanların, mətbuata dövlət qayğısının bariz nümunəsidir. “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası”nın qəbul edilməsi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması da dövlətimizin başçısının bu sahədə atdığı uğurlu addımların məntiqi davamıdır. Ölkə rəhbəri həmişə mətbuatın himayədarı kimi çıxış edib. Yaradıldığı il, yəni 2009-cu ildə fondun hesabına 1 milyon 200 min manat vəsait köçürülüb, bu günədək köçürülən vəsaitlərin məbləği isə artıq 26 milyon 795 min manata çatıb. Azərbaycan milli mətbuatının yaranmasının 130, 135 və 140 illik yubileylərinin dövlət səviyyəsində qeyd edilməsi, yubiley münasibətilə Azərbaycan mətbuat işçilərinin təltif edilməsi, habelə kütləvi informasiya vasitələrinə maliyyə yardımlarının göstərilməsi, bir qrup jurnalistin mənzillə təmin olunması və bu gün jurnalistlər üçün binaların inşa olunması media nümayəndələrinin əməyinə dövlət tərəfindən verilən yüksək qiymətin bariz nümunəsidir.

Vurğulanıb ki, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu hər il yazı müsabiqələri keçirir. Həmin müsabiqələrdə muxtar respublikada fəaliyyət göstərən jurnalistlər də fəallıq nümayiş etdirirlər. Bu günədək muxtar respublika mətbuatında çalışan jurnalistlərin təqdim etdiyi 15 məqalədən 10-u yüksək peşəkarlıqla hazırlandığı üçün müsabiqənin qalibi seçilib.

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru vurğulayıb ki, bu gün muxtar respublikada həyatın bütün sahələrində inkişaf, tərəqqi, yenilənmə var. Əldə olunan böyük nailiyyətlər burada mətbuatın daha da inkişaf etməsinə şərait yaradıb. Bu gün muxtar respublikanın böyük quruculuq işləri aparılan hər bir şəhər və rayonundakı abadlığı, təmizliyi görən çoxsaylı mətbuat nümayəndələri Naxçıvan haqqında yüksək təəssüratlarını oxucularına çatdırırlar.

Sonra konfrans diskussiya şəraitində işini davam etdirib.

“Palitra” qəzetinin baş redaktoru Namiq Əliyev, Azərbaycan Respublikası Milli Məclisinin deputatı, yazıçı Aqil Abbas, Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli, “Yeni Müsavat” qəzetinin baş redaktoru Rauf Arifoğlu, “Şərq qapısı” qəzetinin baş redaktoru Tural Səfərov, “İki sahil” qəzetinin baş redaktoru Vüqar Rəhimzadə, Naxçıvan Muxtar Respublikası Mətbuat Şurasının üzvü Qahirə Hüseynova, “APA-Holdinq”in prezidenti Vüsalə Mahirqızı, Naxçıvan Muxtar Respublikası Mətbuat Şurasının sədri Rövşən Hüseynov, “Trend” informasiya agentliyinin baş direktorunun müavini Arzu Nağıyev, Naxçıvan Muxtar Respublikası Televiziya və Radio Şurasının üzvü Sara Əzimova, “Şərq” qəzetinin baş redaktoru Akif Aşırlı, “Şərqin səhəri” qəzetinin redaktor əvəzi Zaleh Novruzov, “Olaylar” informasiya agentliyinin baş direktoru və eyni adlı qəzetin baş redaktoru Yunus Oğuz çıxış edərək dövlət orqanları ilə media arasında əlaqələrin genişləndirilməsi istiqamətində atılacaq addımlar barədə fikirlərini səsləndiriblər.

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli tədbirə yekun vuraraq qeyd edib ki, konfransda dövlət orqanları və media arasında əlaqələrin genişləndirilməsinə dair maraqlı təkliflər səsləndirilib, diskussiyalar aparılıb. Vüqar Səfərli fəallıq göstərdiklərinə görə konfransın iştirakçılarına minnətdarlığını bildirib.

Qeyd edək ki, oktyabrın 14-də paytaxt Bakıdan gələn kütləvi informasiya vasitələrinin rəhbərləri “Əshabi-Kəhf” Ziyarətgahı Dini-Mədəni Abidə Kompleksi, Culfa rayonu ərazisində yerləşən Gülüstan türbəsi və Əlincəqala tarixi abidəsi və muzeyi ilə tanış olublar.