REGİONLAR


Naxçıvanda “Mənim yay tətilim” adlı uşaq rəsm sərgisi açılıb

Naxçıvan, 14 sentyabr, AZƏRTAC

Naxçıvan Muxtar Respublikası Rəssamlar Birliyinin Bəhruz Kəngərli adına Sərgi Salonunda muxtar respublikanın 95 illiyinə həsr edilmiş uşaqlar arasında keçirilən İRS “Mənim yay tətilim” adlı sərgi-müsabiqənin yekun tədbiri olub.

AZƏRTAC-ın Naxçıvan bürosu xəbər verir ki, tədbirdə çıxış edən Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva muxtar respublikamızda uşaqlara diqqət və qayğı göstərildiyini vurğulayıb, mədəniyyətin hər bir sahəsində istedadı və bacarığı olan uşaqların sayının getdikcə artdığını bildirib.

Qeyd olunub ki, bu, rəssamlıqda da özünü göstərir. Mütəmadi olaraq uşaqlar arasında keçirilən ustad dərsləri, rəsm-sərgi müsabiqələri onların bu sahəyə marağını artırır, həmçinin uşaqlara öz istedad və bacarıqlarını nümayiş etdirmək imkanı verir. Bugünkü sərgi-müsabiqə də məktəblilərin yay tətili ərzində diqqətlərini çəkən hadisələri öz düşüncələrində formalaşdıraraq əks etdirmələri və bacarıqlarının inkişafı məqsədilə həyata keçirilir. Nümayiş etdirilən rəsm əsərlərində onlar yay istirahətlərini və tətildə yaddaqalan hadisələri müxtəlif üsullarla kağız üzərinə köçürüblər.

Naxçıvan Muxtar Respublikası Təhsil nazirinin müavini Heyran Əhmədova çıxışında qeyd edib ki, bu gün muxtar respublikada təhsilin inkişafına göstərilən diqqət və qayğı nəticəsində ümumtəhsil məktəblərində təhsil alan şagirdlərin uğurları hər il daha da artır. Onlar arasında mütəmadi keçirilən bilik yarışmaları, intellektual oyunlar istedadlı uşaqların üzə çıxarılmasında mühüm rol oynayır. Keçirilən rəsm sərgisi də belə tədbirlərin davamıdır.

Tədbirdə Naxçıvan Muxtar Respublikası Mədəniyyət Nazirliyinin nümayəndəsi İman Alrzayev, Əmək və Əhalinin Sosial Müdafiəsi Nazirliyinin əməkdaşı Əjdərəli Qafarov çıxış ediblər.

Qeyd edək ki, sərgidə 71 şagirdin 115 rəsm əsəri nümayiş olunub. Sərgidə qaliblərə diplomlar, fəxri diplomlar, təşəkkürnamələr və psixoloq-yazıçı Sevda Kərimovanın “Mavi portağal” adlı kitabı təqdim olunub.

Sərgi sentyabrın 18-dək davam edəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.