SİYASƏT
Naxçıvanda Milli Qurtuluş Günü münasibətilə bayram konserti olub
Naxçıvan, 16 iyun, AZƏRTAC
İyunun 15-də Naxçıvan şəhərindəki muxtar respublika stadionunda Milli Qurtuluş Günü münasibətilə bayram konserti təşkil olunub.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, Naxçıvan Muxtar Respublikası Ali Məclisinin Sədri Vasif Talıbov tədbirdə iştirak edib.
Tədbirin aparıcıları qeyd ediblər ki, milli qurtuluşdan ötən 22 il ərzində Azərbaycan yüksək inkişaf yolu keçib, bütün sahələrdə böyük uğurlar qazanılıb, ölkəmiz dünya dövlətləri sırasında öz layiqli yerini tutub. Bu yüksəliş, inkişaf və tərəqqi müstəqil Azərbaycan tarixinə qızıl hərflərlə yazılmış Milli Qurtuluş Gününün bəhrələridir. 1993-cü ilin 15 iyun günü böyük xilaskarlıq missiyasının başlanğıcı, Milli Qurtuluş Günü kimi Azərbaycan xalqının tarixinə yazılıb. Həmin gün xalqın təkidli tələbi ilə yenidən siyasi hakimiyyətə qayıdan Ulu Öndər bütün qüvvəsini Vətənimizi üzləşdiyi bəlalardan, xalqımızı çətin günlərdən xilas etməyə yönəldib. “Bütün həyatımı təhlil edəndə görürəm ki, mən Azərbaycanın müstəqilliyini təmin edə bilmişəm. Onu daxili çəkişmələr alovunda, dağıntılar və qan içində məhv olmağa qoymamışam”, - deyən ümummilli lider Heydər Əliyev müstəqil Azərbaycanın qurucusu kimi xalqımızın qəlbində əbədiyaşarlıq hüququ qazanıb.
Naxçıvan Muxtar Respublikası Ali Məclisinin Sədri Vasif Talıbov Naxçıvandan başlanan Milli Qurtuluş tarixi barədə deyib: “Heydər Əliyevin Naxçıvandan Bakıya, böyük siyasətə qayıdışı şərəfli xilaskarlıq missiyasına – Azərbaycanı Azərbaycana qaytarmaq məramına xidmət edir”. Həqiqətən də Azərbaycana ikinci rəhbərliyi dövründə Ümummilli Liderimiz neçə-neçə qərinəyə sığmayan böyük işlər görüb, ölkə həyatının bütün sahələrində əsaslı dönüşə nail olunub, iqtisadi inkişaf təmin edilib.
Bu gün Azərbaycan ulu öndər Heydər Əliyev yolu ilə inamla irəliləyir. Ölkə Prezidenti cənab İlham Əliyevin rəhbərliyi ilə bütün sahələrdə uğurlar qazanılır. İnkişaf və intibah dövrünü yaşayan Azərbaycan dünyanın diqqət mərkəzinə çevrilib. Hazırda ölkəmiz ilk dəfə keçirilən Avropa Oyunlarına ev sahibliyi edir. Bu, ölkəmizdə idmanın inkişafına göstərilən diqqətin, eləcə də Azərbaycanın dünyadakı nüfuzunun daha bir ifadəsidir”.
Tədbirin aparıcıları deyiblər ki, blokada şəraitində yaşamasına baxmayaraq Naxçıvan Muxtar Respublikası da bu gün sürətlə inkişaf edir, şəhər, qəsəbə və kəndlər yenidən qurulur. Qədim Naxçıvanın müdafiə qabiliyyəti gücləndirilib, makroiqtisadi sabitlik bərqərar olunub, iqtisadi inkişafa təkan verilib, əhalinin yaşayış səviyyəsi yaxşılaşdırılıb. Bütün bunlar ulu öndər Heydər Əliyev yoluna sədaqətin və Milli Qurtuluşdan başlanan intibahın bəhrələridir.
Bayram konsertində müğənnilərdən Könül Kərimovanın, Cabbar Musayevin, Aşıq Əli Tapdıqoğlunun, Gülay Zeynalovanın və Röya Ayxanın çıxışları tamaşaçıların alqışları ilə qarşılanıb.
Sonda bayram atəşfəşanlığı olub.
Konsertdən sonra ifaçılarla görüşən Ali Məclisin Sədri onları Milli Qurtuluş Günü və uğurlu konsert münasibətilə təbrik edib.
Ali Məclisin Sədrinə bayram təbriklərini çatdıran ifaçılar onlara göstərilən diqqətə görə minnətdarlıq ediblər.
Sonra Ali Məclisin Sədri ifaçılarla xatirə şəkli çəkdirib.
Bayram konserti Naxçıvan Dövlət Televiziyası ilə canlı yayımlanıb.
Həmin gün muxtar respublikanın rayon mərkəzlərində də 15 İyun - Milli Qurtuluş Günü münasibətilə bayram konsertləri olub, el şənlikləri keçirilib.