REGİONLAR


Naxçıvanda biznes-planı ilə fərqlənən 20 qadına sərmayə kapitalı veriləcək

Naxçıvan, 4 iyun, AZƏRTAC

Amerika Birləşmiş Ştatlarının Azərbaycandakı səfirliyinin maliyyələşdirdiyi “İcma quruculuğu təşəbbüsləri Proqramı” çərçivəsində Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Azərbaycan Mikromaliyyə Assosiasiyası tərəfindən icra olunan “Naxçıvan Muxtar Respublikasında qadınların iqtisadi səlahiyyətlərinin artırılması” layihəsinin icrası ilə bağlı təlimlər davam edir.

Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, növbəti təlim “Sahibkar ol!” mövzusunda olub. Təlimdən əvvəl muxtar respublikada dövlət qadın siyasəti, bu sahədə görülən işlər və əldə olunan uğurlar haqqında iştirakçılara ətraflı məlumat verən Ailə, Qadın və Uşaq Problemləri üzrə Dövlət Komitəsinin sədri Ramilə Seyidova bildirib ki, Naxçıvan Muxtar Respublikası Ali Məclisi Sədrinin 2021-ci il 28 yanvar tarixli Sərəncamı ilə təsdiq edilmiş “2021-2025-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”nın icrası ilə bağlı muxtar respublikanın rayonlarında aztəminatlı və məhdud fiziki imkanlı qadınlar üçün toxuculuq peşəsinin öyrədilməsi ilə bağlı təlimlər keçirilir, qadınların özünüməşğulluqlarının təmin edilməsi üçün sərgi-satışlar təşkil edilir, qadınların əl işlərinin satılması məqsədilə müxtəlif tədbirlər görülür. Həmçinin muxtar respublikada qadınların sahibkarlıq fəaliyyəti ilə məşğul olması, kredit resurslarından, bazar və müxtəlif imkanlardan istifadəsi üçün mikro və makro sahibkar kimi fəaliyyət göstərməsi üçün dövlət tərəfindən dəstək göstərilir, bu da öz bəhrəsini verməkdədir.

Ramilə Seyidova qeyd edib ki, bu layihə çərçivəsində keçirilən təlimlərdə iştirakçılar maliyyə savadlılıqlarını artırmaqla öz təsərrüfatlarını və ya məşğul olacaq fəaliyyət sahələrini quracaq, sahibkar olacaqlar. Layihə çərçivəsində öz biznes-planı ilə fərqlənən 20 qadına maksimum 500 Amerika Birləşmiş Ştatları dolları məbləğində sərmayə kapitalı veriləcək ki, bu da muxtar respublikada ailə təsərrüfatlarının inkişafına, onların ailə və bizneslərində maliyyə idarəetməsi üzrə bilik və bacarıqlarının təkmilləşdirilməsinə şərait yaradacaq.

Qeyd edək ki, layihə çərçivəsində veriləcək sərmayə kapitalının 70 faizi ailə təsərrüfatlarının yaradılmasına, qalan məbləğlər isə qadınların məşğulluqlarının artırılması istiqamətindəki digər sahələrin yaradılması və inkişafına ayrılacaqdır.

Ramilə Seyidova muxtar respublika qadınlarına göstərdiyi diqqət, qayğı və dəstəyə görə Naxçıvan Muxtar Respublikası Ali Məclisinin Sədrinə minnətdarlığını bildirib.

Azərbaycan Mikromaliyyə Assosiasiyasının layihə rəhbəri Sevinc Rüstəmova çıxış edərək layihə çərçivəsində keçirilən “Sahibkar ol!” təlimi haqqında iştirakçılara ətraflı məlumat verib.

Təlim qarşılıqlı diskussiya şəklində keçirilib, qadınlar tərəfindən maraqla qarşılanıb.

Sonda layihədə iştirak edən qadınlara sertifikatlar təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.